Ezekiela
E OTORAA I TE FEIA MANA, I TE PARABOLE O TE LIONA FANAUˈA I TE APOO RA.
19 E rave hoi oe i te tahi parau ei otoraa i te mau arii o Iseraela, e na ô atu,
2 Eaha to metua vahine? E liona maiaa; ua taoto oia i raro i roto i te mau liona ra; i ropu i te mau liona apî, na ˈna iho i faaamu i tana mau fanauˈa. 3 Hoê hoi a ˈna fanauˈa i paari ia ˈna; e riro atura oia ei liona puai apî; e ua haapii oia i te haru maa, e ua pau te taata ia ˈna. 4 Ite atoa aˈera te mau fenua ia ˈna: e noaa ihora oia i roto i ta ratou apoo, ua aratai ratou ia ˈna ma te fifi i te fenua ra o Aiphiti. 5 E ite aˈera oia i to ˈna tiairaa, e aita ˈtura o ˈna e manaˈoraa; ua rave aˈera oia i te hoê fanauˈa no ˈna, e ua haapao atura ia ˈna ei liona itoito apî. 6 Ua haere noa ihora oia i nia e i raro na roto i te mau liona; riro atura ei liona itoito e te apî; e ua haapii oia i te haru i te maa, e ia pau te taata ia ˈna. 7 E ua hopoi maira oia i te ino i nia i to ratou mau fare arii, e ua pau to ratou mau oire ia ˈna; ano atura te fenua ia ˈna, e te mau mea atoa ra i te pau, i te reo uuru no ˈna ra. 8 Ua fariu maira te mau fenua e rave ia ˈna, te mau fenua atoa e ati noa ˈˈe; ua titiri ratou i ta ratou upeˈa i nia ia ˈna; e noaa ihora oia i roto i te apoo i ôhia e ratou ra. 9 Ua tuu ihora ratou ia ˈna i roto i te vahi tiairaa ma te fifi, e ua aratai mai ia ˈna i te arii o Babulonia, e ua aratai atura oia ia ˈna i roto i te mau vahi itoito; ia ore to ˈna reo ia itea faahou i nia i te mau mouˈa o Iseraela.
10 E au to metua vahine i te vine, i to oe vai-hauti-ore-raa, i tanuhia i pihai iho i te pape; e hotu rahi to ˈna, e te ruperupe i te amaa, no taua pape ra e rave rahi. 11 E raau etaeta hoi ta ˈna, ei sepeta no te feia e mana ra; e ua teitei oia i nia e i roto i te mau amaa rahi ra, e te teitei maira oia ia hiˈohia ma te amaa atoa e rave rahi ra. 12 I taihitumuhia râ oia ma te riri, e ua hurihia i raro i te repo ra, e ua mǎrô te maa i nia ia ˈna i te mataˈi no te hitia o te râ mai; ua fati hoi te mau raau etaeta na ˈna e ua mǎrô; ua pau ïa i te auahi. 13 E teie nei, ua tanua oia i roto i te medebara, i te fenua mǎrô e te hiaai pape. 14 E ua reva ˈtu na te auahi no roto i te hoê raau i te mau amaa no ˈna ra, e ua pau hoi te maa no nia ia ˈna ra; e aore hoi e raau etaeta o roto ia ˈna ei sepeta e mana ˈi ra. Teie taua parau ra ei otoraa ra, e vaiiho noa ˈtu hoi ei otoraa.