Ieremia

ISEMAELA I TE TAPARAHI-HUNA-RAA IA GEDALIA, E TE MAU TAATA ATOA.

41 E tae aˈera i te hitu o te marama, i haere mai ai Isemaela, a Netania, a Elisama, no te fetii arii ra, e te feia rarahi toroa i ǒ te arii ra, tino ahuru tau taata, e oia atoa ra, ia Gedalia a Ahikama, i Mizepa, e ua amu ihora ratou i te maa i Mizepa. 2 Ua tia maira Isemaela a Netania ra, e na taata atoa tino ahuru i pee mai ia ˈna ra, ua tairi ihora ia Gedalia, a Ahikama, a Saphana, i te ˈoˈe, e pohe roa aˈera, tei faatavanahia e te arii o Babulonia i nia iho i taua fenua ra. 3 E te mau ati Iuda atoa i ǒ ˈna ra, i ǒ Gedalia ra i Mizepa, e te Kaladaio atoa i reira ra, te feia tamaˈi ra, o tei tairi-atoa-hia ïa e Isemaela. 4 E tae aˈera i te rui piti, i taua taparahiraa na ˈna ia Gedalia ra, e aore e taata i ite ra, 5 te haere maira te hoê pae taata mai Sekema mai, e mai Silo mai, e mai Samaria mai, e maha taau taua pue taata ra, ma te taa vauhia ra, e ma te ahu haea, e ma te ootihia ratou iho, ma te tusia e te mea noˈanoˈa i to ratou rima, i hopoi mai i te fare o Iehova. 6 Ua haere ihora Isemaela a Netania ra mai Mizepa atu e farerei ia ratou, haere noa ˈtura na te eˈatia ma te oto; e farerei atura oia ia ratou, ua parau atura, Mai haere tatou ia Gedalia a Ahikama ra. 7 E tae atura ratou i rotopu i taua oire ra, ua rave ihora Isemaela a Netania ra ia ratou ua taparahi, e ua huri i roto i te apoo, oia e te mau taata i pee ia ˈna ra. 8 Na taata râ tino ahuru, no roto ia ratou, tei parau mai ia Isemaela, Eiaha matou e taparahihia, e taoˈa ta matou ua hunahia i roto i te mau aua ra, te sitona, e te kerite, e te hinu olive, e te meli. Ore aˈera oia i rave, aore i taparahi ia ratou i roto i to ratou mau taeae ra. 9 Taua apoo ra ta Isemaela i huri i te mau taata pohe ta ˈna i taparahi e Gedalia atoa ra, o tei hamanihia ïa e te arii ra e Asa, i te mǎtaˈu i te arii o Iseraela ia Baasa ra, o te faaîhia ïa e Isemaela a Netania i taua mau taata pohe ra. 10 Tîtî atura te toea atoa o te taata i Mizepa ia Isemaela, te mau tamahine a te arii ra, e te mau taata atoa i toe i Mizepa, o tei pûpûhia ˈtu e te raatira o te feia faehau e Nebuzara-dana ia Gedalia a Ahikama ei tiai; o Isemaela a Netania, tei aratai tîtî ia ratou, e reva ˈtura i te ati Amona ra.

11 Ite aˈera râ Iohanana a Karea, e te mau raatira o te nuu atoa i reira ra, i te mau ino i ravehia e Isemaela a Netania ra, 12 ua aratai atura i te mau taata atoa, haere atura e aro ia Isemaela a Netania ra, e roohia ˈtura oia i te pape rahi i Gibeona ra. 13 Ite aˈera taua mau taata atoa i pee ia Isemaela ra ia Iohanana a Karea, e te mau raatira atoa o te nuu i te peeraa mai ia ˈna, oaoa aˈera ratou. 14 Ua fariu anaˈe atura te mau taata atoa ta Isemaela i aratai tîtî mai mai Mizepa atu, hoˈi atura ia Iohanana a Karea ra. 15 Ora ˈtura râ Isemaela a Netania i te rima o Ionatana, e na taata atoa hoi toovau, haere anaˈe atura i te ati Amona. 16 Ua rave aˈera Iohanana a Karea, e te mau raatira atoa o te nuu i parahi mai i o ˈna ra, i te toea atoa i te taata, i noaa mai ia ˈna ia Isemaela a Netania, i Mizepa, i muri aˈe i te taparahiraa ia Gedalia a Ahikama, i te feia puai no te tamaˈi ra, o te vahine, e te tamarii, e te mau eunuka, ta ˈna i faahoˈi mai mai Gibeona mai; 17 haere anaˈe atura ratou, parahi atura i Geruta-kimihama, i pihai iho i Bete-lehema, ia faaineine ratou e haere i Aiphiti, 18 ia ore ia noaa i te Kaladaio; te mǎtaˈu ra hoi ratou i te Kaladaio, no te mea ua taparahi Isemaela a Netania ia Gedalia a Ahikama, tei faarirohia e te arii o Babulonia ei tavana no te fenua ra.