Ieremia

41 I te hitu o te avaˈe, haere maira Isemaela+ te tamaiti a Netania te tamaiti a Elisama, e huaai o te arii* e hoê o te feia tiaraa teitei o te arii, e hoê ahuru tane tei pee mai ia ˈna ia Gedalia ra te tamaiti a Ahikama i Mizepa.+ A tamaa ˈi ratou pauroa i Mizepa, 2 tia maira Isemaela te tamaiti a Netania e na tane hoê ahuru tei pee mai ia ˈna e haapohe aˈera ratou ia Gedalia te tamaiti a Ahikama te tamaiti a Saphana i te ˈoˈe. Haapohe aˈera ïa ratou i te taata ta te arii o Babulonia i faatoroa i nia i te fenua. 3 Haapohe atoa ihora Isemaela pauroa te ati Iuda ia Gedalia ra i Mizepa, tae noa ˈtu te mau faehau Kaladaio i reira.

4 I te piti o te mahana, i muri iho i to Gedalia haapoheraahia, hou a itehia ˈi te reira, 5 tae maira e 80 taata na Sekema,+ Silo+ e Samaria mai.+ Ua hahuhia to ratou taa, ua mahae to ratou ahu, ua otioti ratou ia ratou,+ e e tusia huero maa e te tapau libano+ to roto i to ratou rima no te fare o Iehova. 6 Haere atura ïa Isemaela te tamaiti a Netania na Mizepa ˈtu e farerei ia ratou, ma te taˈi a haere noa ˈi. I to ˈna farereiraa ia ratou, na ô atura oia: “A haere mai a hiˈo ia Gedalia te tamaiti a Ahikama.” 7 I to ratou râ tomoraa i te oire, taparahi pohe aˈera Isemaela te tamaiti a Netania e to ˈna mau taata ia ratou e huri aˈera ia ratou i roto i te tura pape.

8 Parau maira râ hoê ahuru o taua mau taata ra ia Isemaela: “Eiaha e haapohe ia matou, e haapueraa sitona, kerite, e te hinu e te meri hoi ta matou i huna i rapae i te oire.” Aita ˈtura ïa oia i haapohe ia ratou e to ratou mau taeae. 9 Huri ihora râ Isemaela pauroa te tino pohe o te feia ta ˈna i haapohe i roto i te hoê tura pape rahi ta te arii Asa i hamani a aro ai oia ia Baasa te arii o Iseraela.+ O taua tura pape ra ta Isemaela te tamaiti a Netania i faaî i te feia tei pohe ia ˈna.

10 Tapea ihora Isemaela pauroa te toea o te huiraatira o Mizepa,+ tae noa ˈtu te mau tamahine a te arii e pauroa te taata e toe ra i Mizepa, ta Nebuzaradana te raatira o te mau tiai i tuu i raro aˈe i te tiaauraa a Gedalia+ te tamaiti a Ahikama. Tapea ihora Isemaela te tamaiti a Netania ia ratou ei tîtî e reva ˈtura no te haere i ǒ te ati Amona.+

11 I te faarooraa Iohanana+ te tamaiti a Karea e pauroa te raatira nuu na muri ia ˈna i te ino atoa ta Isemaela te tamaiti a Netania i rave, 12 rave aˈera ratou pauroa te faehau e reva ˈtura e aro ia Isemaela te tamaiti a Netania. Noaahia ˈtura oia e ratou i pihai iho i te mau pape* rahi i Gibeona.

13 Oaoa ihora pauroa te taata ta Isemaela i tapea ei tîtî i to ratou iteraa mai ia Iohanana te tamaiti a Karea e pauroa te raatira nuu na muri ia ˈna. 14 Faahoˈi maira ïa i muri pauroa te taata ta Isemaela i tapea ei tîtî i Mizepa+ e haere faahou atura na muri ia Iohanana te tamaiti a Karea. 15 Ora ˈtura râ Isemaela te tamaiti a Netania e vaˈu o to ˈna mau taata ia Iohanana e haere aˈera ratou i ǒ te ati Amona.

16 Rave aˈera Iohanana te tamaiti a Karea e pauroa te raatira nuu tei pee mai ia ˈna, i te toea o te huiraatira o Mizepa, oia hoi te feia ta ratou i faaora i te rima o Isemaela te tamaiti a Netania, i muri iho i to ˈna haapoheraa ia Gedalia+ te tamaiti a Ahikama. Faahoˈi aˈera ratou i te tane, te faehau, te vahine, te tamarii e te tia mana na Gibeona mai. 17 Reva aˈera ïa ratou e faaea aˈera i te vahi nohoraa i Kemehama i pihai iho i Betelehema,+ ua opua hoi ratou e haere i Aiphiti+ 18 ia ore ratou ia noaahia e te mau Kaladaio. Te mǎtaˈu ra hoi ratou i te mau Kaladaio, no te mea ua haapohe Isemaela te tamaiti a Netania ia Gedalia te tamaiti a Ahikama, ta te arii o Babulonia i faatoroa i nia i te fenua.+