Ieremia

I TUUHIA IEREMIA E TE RAATIRA RA E NEBUZARA-DANA.

40 Te parau i tae mai ia Ieremia ra no ǒ mai ia Iehova ra, ia oti oia i te tuuhia e te raatira o te feia faehau e Nebuzara-dana i Rama ra; i tapea-atoa-hia hoi oia i te fifi i roto i taua mau tîtî atoa ra i Ierusalema e Iuda, o tei hopoihia i Babulonia ra.

2 Ua rave ihora te raatira o te mau faehau ia Ieremia, e ua na ô atura ia ˈna, Na to Atua ra na Iehova i faaite hua mai i teie nei ino i teie nei vahi. 3 E ua tii mai hoi Iehova e ua rave i ta ˈna i faaite maira; no te mea ua rave outou i te hara ia Iehova ra, e aore i faaroo i tana reo; i roohia mai ai outou i teie. 4 E tena na, ua tuuhia oe e au i te mau fifi i nia i to rima na. E ia tia ia oe ra ia haere atoa tâua i Babulonia, a haere mai; e na ˈu e hamani maitai atu ia oe ra; e mea ino ia oe ia haere atoa tâua i Babulonia, eiaha; inaha, te vai noa ra te fenua atoa i mua ia oe ra; o tei au ia oe ra, e tei tia ia oe ra ia haere, a haere i reira; 5 e aitâ ra oia i reva ra, ua parau atura oia, A parahi maori ia Gedalia a Ahikama a Saphana, tei faarirohia e te arii o Babulonia ei tavana i nia i te mau oire i Iuda nei, a parahi atua ai i o ˈna ra i roto i te mau taata atoa nei: e aore ra, o ta oe ra vahi i hinaaro i te haere ra, a haere. Ua tuu maira te raatira o te feia faehau ra i te maa na ˈna, e te tahi taoˈa na ˈna, e ua tuu noa ˈtura. 6 Haere atura Ieremia ia Gedalia a Ahikama, i Mizepa, parahi ihora i o ˈna ra, i roto i te taata atoa i vaiiho-hia i nia i te fenua ra.

7 Ite aˈera te mau raatira o te nuu i parahi i taua vahi atea ra, ratou, e to ratou atoa ra mau taata, e ua faarirohia Gedalia e te arii o Babulonia ei tavana no te fenua, e ua tuuhia te mau tane, e te mau vahine, e te tamarii, te tahi pae taata rii no taua fenua ra, tei ore i hopoi-atoa-hia i Babulonia: 8 ua haere maira ratou i Mizepa ia Gedalia ra, o Isemaela a Netania ra, e o Iohanana, e o Ionatana, na tamarii a Karea ra, e o Seraia a Tanahumeta e na tamarii a Ephai i Netopha, e o Iezania a Hosaia, ati Maaka, o ratou e to ratou mau taata. 9 Ua tǎpǔ atura Gedalia, a Ahikama, a Saphana, ia ratou, e to ratou atoa ra mau taata, na ô atura, Eiaha outou e mǎtaˈu ia auraro i te Kaladaio; e parahi noa i te fenua nei ma te auraro i te arii o Babulonia, e maitai ïa outou i reira. 10 Area vau nei, ei Mizepa vau parahi ai, ei tavini no te Kaladaio, ia haere mai i ǒ tatou nei; area outou e haaputu mai outou i te uaina, e te maa auhune ra, e te hinu olive, a tuu ai i roto i te vairaa ra; parahi noa ˈi i roto i to outou mau oire, i parahihia e outou ra. 11 Ite aˈera te mau ati Iuda i Moabi, e i roto i te mau tamarii o Amona, e Edoma hoi, e tei parahi i te mau fenua ra, e ua horoahia e te arii o Babulonia te tahi toea no Iuda, e ua faariro oia ia Gedalia, a Ahikama, a Saphana, ei tavana i nia ia ratou; 12 ua hoˈi anaˈe maira te mau ati Iuda mai te mau vahi atoa mai i tiahihia ˈtu ai ratou ra, e ua haere maira i te fenua ra i Iuda, ia Gedalia i Mizepa ra; e ua haaputu ihora i te uaina e te mau maa auhune atoa ra e rave rahi. 13 Ua haere maira Iohanana a Karea, e te mau raatira atoa no te nuu i parahi i te vahi atea ra, ia Gedalia i Mizepa ra; 14 e ua parau atura ratou ia ˈna, Te ite maitai ra anei oe, e ua tono mai te arii o te mau tamarii a Amona a Baalisa ia Isemaela a Netania e rave ia oe ia pohe? Aita aˈera râ Gedalia a Ahikama i faaroo atu. 15 Ua parau atura Iohanana a Karea ia Gedalia, i Mizepa, ohumu atura, na ô atura, E tuu aˈe na oe ia ˈu, e tii au e tairi ia Isemaela a Netania ra, e aore roa e taata e ite. Eaha ta ˈna hara ia taparahi mai ia oe, e purara ê atura Iuda atoa, te feia i haaputuputu mai ia oe ra, e te toea o Iuda ia pau atoa i te pohe? 16 Ua parau maira Gedalia a Ahikama ia Iohanana a Karea ra, Eiaha roa ia na reirahia; e riro râ ta oe parau ia Isemaela i te haavare.