Ieremia

TE TONO NEI ZEDEKIA I TE VEA IA IEREMIA, E UI I TE HOPEA O TAUA TAMAˈI RA.

21 Te parau i tae mai ia Ieremia no ô mai ia Iehova ra, a tono atu ai te arii ra o Zedekia ia Pasura a Melekia, e ia Zephania a Maaseia tahuˈa ra, i te parauraa ˈtu e.

2 Te titau atu nei matou ia oe ia parau maitai atu oe ia Iehova ia matou nei, no te mea te tamaˈi nei te arii o Babulonia o Nebukanesa ia matou nei; peneiaˈe o te rave mai Iehova i ta ˈna mau ravea taa ê ia matou, e ia hoˈi atu oia ra.

3 Ua parau maira Ieremia ia ratou, E na ô atu outou ia Zedekia; 4 Te na ô maira te Atua o Iseraela ra, o Iehova, Inaha, e ruri ê au i te mau mahana tamaˈi i roto i to outou rima, ta outou e tamaˈi atu i te arii o Babulonia, i te Kaladaio, tei na rapae au mai i te aua ra i te aro, e haaputuputu vau ia ratou i rotopu i teie nei oire. 5 O vau iho te aro atu ia outou ma te faatoro atu i te rima, ma te rima puai, ma te riri, e ma te tahoo, e ma te tairoiro rahi. 6 E tairi au i to teie nei oire, i te taata e te puaa; e pau rahi to ratou ia pohe. 7 E muri aˈe i te reira, te parau maira Iehova, o te arii o Iuda ra o Zedekia, e to ˈna ra mau tavini, e te taata atoa, te toea no te maˈi, e no te ˈoˈe, e no te poia, ta ˈu ïa e tuu atu i te rima o te arii o Babulonia, ia Nebukanesa, e te rima o to ratou mau enemi, e te rima o te feia i titau mai ia ratou ia pohe; e na ˈna ratou e tairi i te ˈoˈe; e ore roa oia e aroha ia ratou; e ore e faaherehere, e ore e hamani maitai atu.

8 E parau atu oe i teie nei feia, Te na ô maira Iehova, Inaha, te tuu nei au i te eˈa ora i mua ia outou, e te eˈa pohe. 9 O te parahi i roto i teie nei oire, e pohe ïa i te ˈoˈe, e te poia, e te maˈi; o te haere râ i rapae, e ua horoa ia ˈna iho i te rima o te Kaladaio e haaati mai ia outou ra, e ora ïa oia, e riro to ˈna ora ei taoˈa na ˈna. 10 Ua fariu hoi au i tau mata i teie nei oire ia ino, eiaha ia ora, te parau maira Iehova; e tuuhia teie nei oire i te rima o te arii o Babulonia, e ama ïa ia ˈna i te auahi.

11 Area te fare o te arii o Iuda ra, E faaroo mai outou i te parau a Iehova; 12 E te utuafare o Davida, te na ô maira Iehova, A faatupu na i te parau au i te poipoi roa ra, a faaora ˈtu i tei pau i te rima o te hamani ino ra, o te puroro atu tau riri mai te auahi ra, e ama ˈtura, e aore e tinai, no te ino o ta outou e rave ra. 13 Inaha, aore au i ǒ na ia oe na, e tei parahi i te mato haapapu-hua-hia ra, te parau maira Iehova; o outou o tei parau e, O vai te faaô mai i roto ia tatou nei? na vai e tomo mai i to tatou mau fare? 14 E tahoo atu vau ia outou i ta outou i rave ra, te parau maira Iehova; e tutui au i te auahi i to ˈna ra vahi uru raau, e na te reira e ama e ati noa ˈˈe.