Ieremia
TE AˈO NEI TE ATUA IA TATARAHAPA, E TE FAAITE MAIRA I TE MAITAI.
22 Ua na ô maira Iehova, Haere i raro i te fare o te arii o Iuda, a parau atu ai oe i teie nei parau i reira a na ô atu ai,
2 E faaroo mai i te parau na Iehova, e te arii o Iuda, e tei parahi i nia i te terono o Davida; o oe, e to mau tavini, e to mau taata, tei na teie nei mau uputa i te tomoraa: 3 Te na ô maira Iehova, A faatupu na i te parau au e te parau-tia, a faaora ˈtu i tei pau i te haru i te rima o te feia hamani ino; e te taata ê, e te otare, e te vahine ivi, eiaha e haavarehia ˈtu, eiaha e hamani-ino-hia ˈtu i te haru ra, eiaha hoi te toto hara ore ia manii i teie nei vahi. 4 Ia na reira hoi outou i te rave mai teie nei parau, e hui arii anaˈe te tomo na roto i te mau uputa o teie nei fare, e te parahiraa i nia i te terono o Davida, e i nia i te mau pereoo, e i nia i te mau puaahorofenua, ratou atoa ma to ˈna atoa ra mau tavini, e to ˈna atoa ra mau taata. 5 Ia ore râ outou ia faaroo mai i teie nei mau parau, te na ô maira Iehova, ua tǎpǔ vau ia ˈu iho, e riro mau teie nei fare i te ano. 6 Ua na ô maira hoi Iehova i te fare o te arii o Iuda ra, Ua riro oe mai ia Gileada ia ˈu nei, e mai te upoo o Lebanona ra; e faariro-mau-hia râ oe e au ei medebara, e mai te mau oire taata ore ra. 7 E na ˈu e faaue i te rave ia oe ra, o te taata atoa ma ta ˈna ra mauhaa; e na ratou e tâpû i te mau arezi hinaaro na oe ra, e huri atu hoi i roto i te auahi. 8 E rave rahi te fenua e haere na pihaiiho i teie nei oire, ma te paraparau ratou te tahi i te tahi, Eaha te mea i na reira ˈi Iehova i te rave i teie nei oire rahi? 9 Ei reira ratou e parauhia ˈtu ai i teie nei parau, No te mea ua faarue ratou i te faufaa a to ratou Atua, a Iehova, e ua haamori i te mau atua ěê, e tavini atura ia ratou.
10 Eiaha outou e oto i tei pohe ra, eiaha oia e arohahia ˈtu; ia rahi râ te oto i tei reva ê ra, e ore roa hoi oia e hoˈi faahou mai, i to ˈna fenua i fanau ai ra, e ore ïa e ite. 11 Te na ô maira hoi Iehova ia Saluma, i te tamaiti a Iosia, e arii no Iuda ra, o tei riro ia ˈna te hau ei mono i tana metua, ia Iosia ra, o tei reva ˈtu mai ǒ nei atu; E ore oia e hoˈi faahou mai i reira: 12 taua vahi ra i aratai-tîtî-hia ˈtu ai oia ra, ei reira oia e pohe ai, e ore oia e ite faahou mai i teie nei fenua.
13 E pohe to ˈna to tei faatia i to ˈna fare ma te parau-tia ore, e te mau piha i nia ra ma te hamani ino; o tei faahepo i te taata-tupu ia rave noa i te ohipa aore e hoo, aore i faautua ˈtu ia ˈna i ta ˈna ohipa; 14 o tei parau e, E faatia vau i te fare no ˈu iho ei fare rahi, e te piha teitei anaˈe; e te raveraa i te haamaramarama no ˈna iho, e te vehîraa i nia iho i te arezi, e te parairaa i te sesera. 15 E vai tamau maite anei te hau ia oe ra, o oe i faafaito i te tahi pae i te faatiaraa i to oe fare i te arezi? aore anei to metua i amu i te maa e te inu i te uaina, e ua faatupu i te parau au e te parau-tia? maitai atura hoi oia i reira. 16 Ua faatia oia i te parau a te feia i ati e tei veve ra; aita anei oia i maitai i reira i te iteraa mai ia ˈu ra? te parau maira Iehova. 17 Area to oe mata e to oe aau, tei nia anaˈe ïa i te mau mea hinaarohia e oe ra, e te titau noa ra i te toto hara ore ia manii â, e te raveraa na te faauˈana e te nounou taoˈa. 18 E teie nei, te na ô maira Iehova ia Iehoiakima, i te tamaiti a Iosia, i te arii o Iuda, Eiaha ratou e oto ia ˈna, i te na ôraa e, E tau taeae e, e te arii vahine hoi, E tau tuahine e. Eiaha ratou e oto ia ˈna, i te na ôraa e, E te Fatu e, e te vahine ra, Auê, o to ˈna ïa unauna. 19 Mai te tanuraa o te asini to ˈna tanuraa, e arato-noa-hia e hurihia ˈtu i rapae au mai i te mau uputa o Ierusalema.
20 A haere i nia i Lebanona, pii hua ˈi; e ei nia ia Basana faateitei ai i to reo, a pii hua ˈtu ai i te mau otia ra: te feia atoa i hinaaro mai ia oe ra, ua hope ïa i te mou. 21 Ua parau atu hoi au ia oe i to maitairaa ra, ua parau maira oe, E ore au e faaroo atu: o to oe ïa huru mai to apîraa mai â, aitâ hoi oe i faaroo mai i tau reo. 22 E hopoi-ê-hia tei faaamu ia oe ra i te mataˈi, e te feia e hinaaro mai ia oe ra, e hopoi-ê-hia ïa ei tîtî; ei reira mau oe e haama ˈi, e maheahea hoi i te mau parau ino atoa na oe ra. 23 E to Lebanona e, o tei hamani i to ofaaraa i roto i te mau arezi ra, atae hoi te aroha ia oe ia roohia mai oe e te mauiui, mauiui mai to te vahine fanau ra. 24 Te na ô maira Iehova, Te ora nei au ra, riro noâ Konia a Iehoiakima, arii no Iuda, ei hetemi i nia i tau rima atau, e iritihia oe e au i reira; 25 a horoa ˈtu ai au ia oe i te rima o te feia i titau mai ia oe ia pohe, e te rima atoa o te feia ta oe e mǎtaˈu ra; i te rima o te arii o Babulonia o Nebukanesa ra, e i te rima atoa o te Kaladaio. 26 E faarue ê atu vau ia oe, e to metua vahine na ˈna oe i fanau ra, i te hoê fenua ê, aore outou i fanau i reira, e ei reira outou e pohe ai. 27 Area te fenua ta ratou e hinaaro ia hoˈi maira, e ore ratou e hoˈi mai i reira. 28 E idolo parari anei, e te vahavahahia teie nei taata o Konia? e e farii au ore anei oia na te taata atoa ra? eaha ra hoi ratou i faarue-ê-hia ˈi, oia e tana huaai atoa ra, e ua hurihia i nia i te fenua aore i itea e ratou ra? 29 E te fenua e! e te fenua e! e te fenua e! e faaroo mai i te parau a Iehova. 30 Te na ô maira Iehova, E papai outou i teie nei taata ei fanautama ore, ei taata e ore e maitai i to ˈna ra anotau; e ore roa hoi to ˈna huaai e maitai, ma te parahi i nia i te terono o Davida e te mana faahouraa i nia ia Iuda.