Ieremia

PASURA NO TE MEA I MOTO IA IEREMIA I MAIRIHIA ˈI TE IˈOA APÎ.

20 Ite aˈera te tahuˈa ra o Pasura a Imera, te tavana o te fare o Iehova, i te parau a Ieremia i tohu ra: 2 ua tairi ihora Pasura i taua peropheta ra, ia Ieremia, e tuu atura ia ˈna i roto i te tapearaa i te uputa teitei i ǒ Beniamina ra, i pihaiiho i te fare o Iehova. 3 E ao aˈera, ia tuuhia mai Ieremia e Pasura mai roto mai i te tapearaa ra, ua parau atura Ieremia ia ˈna, Ua mairihia to oe iˈoa e Iehova, eiaha o Pasura, o Magora-misabiba râ. 4 Te na ô maira hoi Iehova, Inaha, teie au a faariro ia oe ei mǎtaˈuraa na oe iho, e na to mau hoa atoa ra; e topa hoi ratou i te ˈoˈe a to ratou mau enemi, e to mata atoa i te hiˈo-atoa-raa; e horoa hoi au ia Iuda atoa ra i te rima o te arii no Babulonia, e na ˈna ratou e hopoi i Babulonia ei tîtî, e e tairi hoi ia ratou i te ˈoˈe. 5 E na ˈu e horoa i te etaeta o teie nei oire, e te hopea o to ˈna faaitoito, e te mau mea maitatai i roto ra, e te mau taoˈa atoa a te mau arii no Iuda, o ta ˈu ïa e horoa i te rima o to ratou mau enemi, e pau ïa ratou ia ratou, e rave hoi ia ratou e hopoi i Babulonia. 6 E o oe hoi, e Pasura, e te feia atoa e parahi i to fare ra, e haere atoa ïa outou ei tîtî; e tomo hoi oe i Babulonia, e ei reira oe e pohe ai; e ei reira oe e tanuhia ˈi, o oe e to mau hoa atoa ta oe i tohu haavare atu.

7 Ua faatianiani mai oe ia ˈu, e Iehova, e ua vare ihora vau; ua faaitoito mai oe ia ˈu, e o ta oe atura tei tupu; ua riro vau ei ataraa i te mau mahana atoa nei; e ua tâhitohitohia vau e ratou atoa e ati noa ˈˈe. 8 E ia parau anaˈe au ra, ia pii noa vau i te rave uˈana, e ia parau i te haru ra, ua ruri-ê-hia te parau a Iehova ia ˈu ei faainoraa, e ei tâhitohitoraa, eita e faaea. 9 Ia parau râ vau ra, E ore au e parau i te reira, e ore au e parau faahou i to ˈna ra iˈoa; riro atura taua parau ra mai te auahi ama i roto i tau aau ra, ua opanihia i roto i to ˈu ra mau ivi; rohirohi aˈera vau i te faaoromai-noa-raa, e aita ˈtura e tia ia mamû. 10 Ua faaroo hoi au i te vavi-noa-raa o te taata atoa e rave rahi, e parau haamǎtaˈutaˈu e ati noa ˈˈe. Te na ô maira ratou, E parau na outou, e na matou e parau atoa ˈtu: te tiai anaˈe maira tau mau hoa au atoa ra ia ˈu i te faaearaa; te na ô ra ratou, Peneiaˈe oia o te tapae ê noa i te haavare, a noaa ˈtu ai oia ia tatou, a tahoo atu ai tatou ia ˈna. 11 Tei ia ˈu râ Iehova, ei aito riariahia ïa; e riro te mau hamani ino ia ˈu ra i te turori, e ore roa hoi ta ratou e tupu; ua haama roa ratou, no te mea aore to ratou hinaaro i tupu; ei haama vaiiho-tamau-roa-hia e te mure ore to ratou, eita e moe ra. 12 E Iehova sabaota ra, tei tamata i te feia parau-tia ra, tei hiˈo i te manaˈo i roto i te aau ra, e ite au i to riri tahoo i nia ia ratou, ua hohora hua hoi au i tau parau ia oe ra. 13 E himene outou ia Iehova, e haamaitai outou ia Iehova, no te mea ua faaora oia i te rima o te feia hamani ino ra, i te varua o te taata haehaa ra.

14 Ia katarahia te mahana i fanau mai ai au ra; eiaha te mahana i fanau mai ai tau metua vahine ia ˈu ra, ia haamaitaihia. 15 Ia katarahia te taata i parau i tau metua tane, o tei na ô atu e, Ua fanau maira ta oe e tamaroa; ei faaoaoa-hua-raa ˈtu ia ˈna. 16 Ia riro te reira taata mai te mau oire i taihitumuhia e Iehova, e aore i tatarahapa; ia ite oia i te pii tamaˈi i te poipoi, e te faaehuehu i te avatea: 17 o vau i ore i ravehia e vetahi i roto i te opu ia pohe, e ia riro tau metua vahine ei apoo no ˈu, te opu o tei tô ia ˈu ra e a muri noa ˈtu. 18 Eaha te mea i fanau mai ai au mai roto mai i te opu ra, i ite ai hoi i te pohe e te oto, e ia hope roa o ˈu pue mahana ma te haama?