Isaia

TO MOABI ROOHIARAA I TE ATI.

15 Te parau ia Moabi ra. No te mea i pau hotuapo noa iho nei Ara i Moabi! no te mea i pau hotuapo Kira i Moabi! 2 Te haere aˈera oia i Baita e i Dibona, i te mau vahi teitei oto ai: e auê Moabi ia Nebo e ia Medeba: e pahure tei te mau upoo atoa ra, e ua pau te mau umiumi i te paotihia. 3 Ua tatua ratou i te ahu oto i to ˈna ra mau aroâ; e tei nia i to ˈna ra mau fare te auê anaˈe ra, e te pou anaˈe i te mau vahi atea i o ˈna ra ma te oto. 4 Ua pii hua Hesebona e o Eleale; e ua tae to ratou reo i Iahaza, e te feia mauhaa atoa i Moabi i te pii-atoa raa, e ua riro te ora ei mea riaria no ˈna. 5 Te auê nei tau aau ia Moabi; tana ra hoi mau tîtî, e tae noa ˈtu i Zoara, i te pii-noa-raa; mai te oto o te puaatoro apî ufa ra: e paiuma ratou i te paiumaraa i Luhita ma te oto. E te haere-noa-raa na te eˈa Horonaima, a pii ai ratou i te pii pau ra. 6 I te pape hoi i Nimirima, e riro ïa i te ore: ua mǎrô hoi te aihere e ua pau; te mea rii no oteu aˈera, e te raau rii apî, ua ore ïa. 7 E teie nei, ta ratou taoˈa rahi i noaa ra, te mau mea atoa i vaiihohia e ratou ra, o ta ratou ïa e hopoi i te peho arobe ra. 8 Ua haaatihia hoi te hiti o Moabi i te pii; e ua tae roa to ˈna autâ i Egelaima; e to ˈna auê i Bere-elima. 9 Ua î te pape i Dimona i te toto: e hopoi â râ vau i te ino i nia ia Dimona; e te liona i nia i to Moabi i ora ra e i nia atoa i te toe i vaiihohia i te fenua nei.