Isaia

TO ISERAELA FAAHOˈIRAAHIA MAI E TE ATUA.

14 E aroha hoi Iehova ia Iakoba, e maiti faahou â oia ia Iseraela, e haamau hoi oia ia ratou i to ratou ihora fenua; e taati atoa mai hoi te taata ê ia ratou, e au mai hoi i te utuafare o Iakoba ra. 2 Na te taata e rave ia ratou, e ua aratai i to ratou ra vahi mau; e rave hoi te utuafare o Iseraela ia ratou, ei tavini tane e ei tavini vahine i te fenua o Iehova ra: e o tei faariro ia ratou ei tîtî ra, o te riro mai ïa ei tîtî na ratou, e mana hoi ratou i nia iho i te feia i hamani ino mai ia ratou ra.

3 E ia tae i taua mahana ra, e haamâha mai ai Iehova i to oe ra rohirohi, e to oe ra mǎtaˈu, e to oe ra ati i te ohipa i tuuhia mai i nia ia oe ra; 4 e na oe e parau atu i teie nei parabole i te arii o Babulonia, a na ô ai e, Auê te hamani ino i ore e! e te titau auro i ore e! 5 Te raau a te taata hara ua ofatihia e Iehova, te sepeta a te feia tavana ra. 6 O tei tairi i te taata ma te riri ma te tairi tamau ra; o tei faahepo i te mau fenua ma te riri, o tei rave-ino-hia nei ïa, e aore e faaore. 7 Ua parahi hau noa te fenua atoa nei, e aore e parau; ua puroro noa mai to ratou reo umere ma te oaoa: 8 oia â ǐa, te mau berusi teie e oaoa nei ia oe, te mau arezi o Lebanona: o oe i tuuhia i raro ra, aore ïa e tâpû i tae mai ia matou nei.

9 O hade i raro ra tei arepurepu iho nei ia oe, ia farerei mai ia oe i te haereraa ˈtu; te faaaraara ra oia i te feia mana i pohe ra, i te feia rarahi atoa o te fenua nei ra; e te faatiatia anaˈe ra te mau arii atoa o te mau fenua, i to ratou mau terono ra. 10 E parau atoa mai ratou, e na ô ïa ia oe, O oe nei hoi, ua riro atoa oe mai ia matou atoa nei i te paruparu? ua faariro-atoa-hia oe mai ia matou atoa nei? 11 Ua tuuhia to teoteo i raro roa i te apoo ra? e te haruru hoi o to mau nabala arearea ra? ua riro hoi te toˈe ei vauvau no oe, e te tuˈa ei tapoˈi ia oe?

12 O to oe hoi mairi mai te raˈi mai, e Eilela, e te tamaiti a te poipoi e! o to oe hoi tâpûraahia i raro i te repo, e tei haavîvî i te mau fenua nei e! 13 Ua parau ra oe i roto i to aau ra e, E haere au i nia roa i te raˈi ra; e faateitei au i tau terono i nia ˈˈe i te mau fetia o te Atua ra; e parahi hoi au i nia i te mouˈa amuiraa ra, i te pae i apatoa ra: 14 e aˈe â vau i nia ˈˈe i te mau ata ra; e ia faito vau i Tei Teitei ra. 15 E hopoi-roa-hia râ oe i raro roa i te tanuraa ra, i te hiti roa o te apoo ra.

16 Te feia e ite ia oe ra, e riro i te tiatonu maite ia oe; e haapao maite â ratou ia oe, a parau ai e, O te taata teie i rurutaina ˈi te fenua nei, i aueue atoa ˈi te mau basileia ra? 17 I riro ai te mau fenua mai te medebara; e pau roa aˈera te mau oire atoa; e aore roa e tuu i tana mau tîtî ia haere noa na i te utuafare? 18 Te mau arii atoa no te mau fenua ra, ratou atoa, te tarava anaˈe ra i raro ma te nehenehe, i to ˈna ihora menema; 19 ua huaihia râ oe i rapaeau mai i te apoo ra; mai te amaa i faafaufauhia ra; i vehîhia i te feia pohe, i tei puta i te ˈoˈe ra; i tei reva i raro i te mau ofai i te apoo ra; mai te pera taataahihia e te avae ra. 20 E ore oe i amui-atoa-hia ia ratou i te tanuraa ra, no te mea, ua pau to fenua ia oe, e to oe ra mau taata ua taparahihia e oe: e ore roa te huaai o te feia rave parau ino ra e haamaitaihia.

21 A faaineine i te taparahi i ta ˈna mau tamarii, i te hara a to ratou mau metua; o te tupu hoi ratou, e ǐî aˈera te fenua, e apǐapǐ aˈera te fenua atoa nei i te oire. 22 Te na ô maira hoi Iehova, E tia vau e rave ia ratou, e tâpû ê atu vau i te iˈoa i Babulonia nei, e na toea; e te tamaiti, e te tamaiti na taua tamaiti ra, te na reira maira Iehova sabaota. 23 E faariro hoi au i te reira ei parahiraa no te kephoda, e riro hoi ei pape hopuna anaˈe; e huri roa vau i raro roa i te pohe, te na reira maira Iehova sabaota ra.

24 Ua tǎpǔ hoi Iehova sabaota ra, na ô maira: o ta ˈu mau i imi ra, o te reira te tupu; e o ta ˈu i opua ra, o te reira te mau: 25 e haaparuparu vau i te ati Asura i to ˈu nei fenua, e taataahi au ia ˈna i nia i to ˈu aˈera mau mouˈa. E poe ê atu ta ˈna zugo i nia ia ratou i reira, e ore aˈera ta ˈna hopoia i to ratou mau tapono i reira. 26 O taua parau ra teie i opuahia no te fenua atoa nei; teie hoi taua rima i faatorohia na nia i te mau fenua atoa nei: 27 ua opua hoi Iehova sabaota ra, e na vai hoi e faaore? to ˈna hoi te rima i faatorohia ra, e na vai e faahoˈi mai?

28 Te matahiti i pohe ai te arii ra o Ahaza i tuuhia mai ai teie nei parau.

29 Eiaha na oe e oaoa paatoa, e to Philiseti e; i te mea ua fati te raau i papai ia oe ra; e zepho hoi te tupu na roto i te ophi na, e to ˈna fanauˈa e ophi maue ïa mai te auahi ra. 30 E amu hoi te taata rii i ta ˈu ra maa oho matamua ra; e taoto hoi te veve ma te ora: o to oe ra tumu, o te pohe ïa ia ˈu i te oˈe; i te feia toea i ǒ oe ra, e taparahihia ïa e ana.

31 A auê, e te mau uputa e; a oto, e te oire e! auê oe, e Philiseti taatoa e, ua tarapape roa! e au auahi tei pee mai mai te pae i apatoerau ra; e aore roa e huoi o roto i tana ra nuu. 32 Eaha te parau ia parau atu i te mau vea a te mau fenua nei? Ua tiahia Ziona e Iehova; e noaa te haapuraa o to ˈna ra taata rii i reira.