Isaia
UA AˈOHIA ˈTURA TO MOABI IA FAAROO I TE MESIA.
16 E hapono outou i te pinia mamoe i te taata fenua ra, mai Sela ˈtu i te medebara i te mouˈa ra o Ziona. 2 Mai te manu e maue haere, i haapuehuhia i te ofaaraa ra, oia atoa te mau tamahine i Moabi i te vahi haerehia i te Aranona ra. 3 A tuu atu i te aˈo; a imi i te parau au; e faariro i to mǎrǔ mai te po i te avatea nei â; e faatapuni i tei faaruehia ra; eiaha e faˈi i te tîtî. 4 To Moabi i faaruehia ra, ia parahi noa na ïa ia oe na; ei paruru oe no ratou i te feia taparahi ra. Ua ore aˈenei hoi te hamani ino; ua ore te taparahi o tei taataahi mai ia outou na, ua mou ïa i nia i te fenua nei. 5 E papu hoi te terono i te aroha; e parahi hoi te hoê i nia iho ma te parau mau; e te tahi haava i roto i te sekene o Davida, i te imiraa i te parau au, e te faatupuraa i te parau-tia.
6 I faaroo na tatou i te teoteo o Moabi; teoteo rahi to ˈna: to ˈna faateitei, e te teoteo, e to ˈna riri; e mea faufaa ore râ tana haavare. 7 E teie nei, e riro Moabi i te auê ia Moabi, o taua fenua atoa ra te auê: te mau niu o Kira-haraseta i pau ra ta outou e oto; ua tairi-mau-hia ïa. 8 Ua mǎrô te mau ô i Hesebona; ua ofati te feia tavana o te mau fenua i te vine i Sibema, o tei tae roa to ˈna aveave i Iazera; e ua tae roa to ˈna amaa i te medebara; e ua faatoro noa ˈturâ a, e tae atura i te tahi pae miti ra. 9 E teie nei, e oto vau ma te oto o Iazera i te vine i Sibema; e faararirari au ia oe i tau roimata, e Hesebona, e Eleale e! o to auhune hoi e te auhune vine, ua roohia mai ïa e te umere tamaˈi. 10 E ua rave-ê-hia te oaoa e te rearea i te ô hotu ra; e ore hoi ratou e himene, e ore hoi e umere i roto i te ô vine ra; e ore hoi tei taataahi e taataahi i te vine i te farii ra; ua faaore aˈenei hoi au i te umere. 11 E teie nei, te oto nei tau aau mai te oto kinura ia Moabi; e o roto ia ˈu nei, te oto nei ïa ia Kera-haraseta. 12 E ia ite anaˈe Moabi e, e ua faarohirohi noa oia ia ˈna iho i nia i te mau vahi teitei, e tomo ai oia i roto i to ˈna iho vahi moˈa e ani i to ˈna hinaaro; e ore râ e tiahia mai.
13 Teie te parau i parauhia e Iehova ia Moabi i mutaaihora; 14 i teie nei râ, ua parau mai â Iehova, te na ô maira, Ua tae anaˈe i te toru o te matahiti, mai te matahiti o tei tarahuhia ra, e vahavahahia ˈi te unauna o Moabi, i to ˈna atoa ra mau taata e rave rahi; e riro hoi te toea i te mea iti aore rea, e te puai ore hoi.