Sire a Solomona
TE FAAITE NEI TE MESIA I TE MAITAI O TE EKALESIA RA.
4 Inaha! te aiai ra oe, e tau here e, inaha! te aiai ra oe! e na mata no oe i raro aˈe i to io rouru ra, e au ïa i to te uuairao ra; e te rouru, e au ïa i to te nǎnǎ puaaniho e vai i te mouˈa ra o Gileada. 2 E au to niho ra i te nǎnǎ paoti-apî-hia, i te haerea mai mai raro i te pape horoiraa ra, o tei tataipiti anaˈe te fanauˈa ra, e aore roa te hoê o ratou i ere ra. 3 E au to utu i te aho uteute ra, e to reo ra tei navenave. Mai te maa remuna ra to oe ïa pue papariˈa i raro aˈe i to io rouru ra. 4 E au to aˈî i te pare o Davida, i patuhia ei vairaa mauhaa tamaˈi; hoê tausani i te paruru i faautahia i reira, e mauhaa anaˈe no te feia tamaˈi ra. 5 E au o pue û ra i na pinia e piti ra, e maehaa no te zabi, i roto i te lili i te amuraa. 6 Ia ao ra ia pee ê atu te mǎrǔ, ei nia vau i teie nei mouˈa mura, i teie nei aivi libano. 7 Aiai rahi to oe, e tau here e; aita roa o oe ino.
8 E haere mai ia ˈu nei, e tau hoa, e faarue ia Lebanona, e haere mai ia ˈu nei e faarue ia Lebanona. Na te upoo o Amana i te hiˈo mai, na te upoo o Senira, e te upoo o Heremona; na te mau parahiraa o te mau liona, na te mau mouˈa o te nemera. 9 Ua riro tau aau ia oe, e tau tuahine, e tau hoa, ua riro tau aau ia oe i to mata na hoê roa ra, i te fifi hoê o to aˈî na. 10 E maitai rahi tei to aroha, e tau tuahine, e tau hoa e, e momona rahi tei to aroha i to te uaina, e te hauˈa o to monoˈi i te mau faanoˈanoˈa atoa ra! 11 To vaha na, e au hoa, mai te meli i te topataraa mai; e meli e te û tei raro aˈe i to arero, e te hauˈa o to ahu na, e au ïa i to Lebanona. 12 E aua haaatihia tau tuahine, tau hoa, e pape pihaa opanihia, e tumu pape piahia ra. 13 E aua remuna tei tanuhia e oe ra, e te mau maa maitatai ra, te kaphara, e te naradi; 14 te naradi, e te karakema, e te kane, e te kinamo, e te mau raau atoa ra, e te libano; te mura, e te aloe, e te raau noˈanoˈa atoa ra: 15 te apoo pape o taua aua nei, e tumu ïa no te pape ora, mai Lebanona te taheraa mai.
16 A ara, e te mataˈi ra, e te faapiti e! e farara atoa mai oe, e to apatoa ra! ei puhauhau mai i nia i tau ô nei, ia itea to ˈna noˈanoˈa i te maniiraa mai; ia tomo mai tau here i roto i ta ˈna nei ô; e ia amu oia i te maa maitatai no reira.