Sire a Solomona
TE FAAARA NEI TE MESIA I TE EKALESIA I TE TIAORO NO ˈNA RA.
5 Ua tae mai au i roto i tau ô nei, e tau tuahine, e tau hoa e; ua haaputu vau i tau mura e tau raau noˈanoˈa; ua amu vau i tau meli i te topataraa mai; ua inu au i tau uaina ma te û atoa ra. E amu, e au mau hoa e, e inu hoi; oia â ïa, e inu hua, e au mau here e!
2 Te taoto ra vau, area tau aau te ara noa ra ïa; e reo no tau here, te patoto ra, ua parau maira, A iriti aˈe na ia ˈu, e tau tuahine, e tau here; e tau uuairao; e tau nehenehe; ua îî hoi to ˈu rouru i te hau, e tau io rouru i te topata o te raˈi ra. 3 Ua haapae au i tau ahu, eaha e tia ˈi ia ahu faahou? ua horoi au i tau avae, eaha e tia ˈi ia faarepo faahou? 4 Ua oomo maira tau here i tana rima na te apoo ra, aroha roa ˈtura tau aau ia ˈna. 5 Ua tia aˈera vau e iriti i te opani i taua here no ˈu ra, te topata noa ra te mura no nia i tau rima, e te mura noˈanoˈa rahi no nia i tau rimarima ra, e ua iri ihora i nia i te haamauraa i taua uputa ra. 6 Ua iriti aˈera vau i taua here no ˈu ra; aita ra râ tau here, ua reva ïa; aita ˈtura o ˈu varua i te manaˈoraa i ta ˈna parau. Ua imi au ia ˈna, e aita ˈtu râ oia i itea ˈtu e au; ua pii hoi au ia ˈna, aita râ oia i parau mai. 7 Itea ihora vau e te mau tiai oire; e ua papai mai ratou ia ˈu, e ua paruparu ihora vau; e ua haru mai te feia tiai patu ra i te paruru no ˈu.
8 Teie tau aˈo ia outou, e te mau tamahine i Ierusalema nei, peneiaˈe o te itea ˈtu ia outou taua here no ˈu nei, e parau atu outou ia ˈna e, te pohe nei au i te aroha.
9 Eaha te vahi iti hau i taua here no oe ra i to te tahi ê ra, e tera ra vahine faito ore i te mau vahine atoa nei? eaha te vahi iti hau i taua here no oe ra i to te tahi ê ra, i na reira mai ai oe i te poroˈi ia matou nei?
10 E teatea to taua here no ˈu nei e te uteute hoi, oia tei hau ê i te taata atoa e hoê ahuru i te tausani. 11 Tana upoo ra, mai te auro maitai roa ra ïa; e tana io rouru i te ofirifiri, e mai to te oreba i te ereere maitai ra; 12 o na mata ra mai to te uuairao ïa ia horoihia i te û ra, i te parahi-maite-raa i te hiti o te pape ra, e ia faaau-maite-hia ra; 13 o na aariˈa no ˈna ra, e tanuraa raau noˈanoˈa tiare hauˈa ra ïa; e na utu ra, mai te lili uteute ïa ma te monoˈi ra e mura i te topatapataraa; 14 o na rima no ˈna ra, e tapea auro ïa i haaatihia i te tarisisa; to ˈna tino ra, e sena anaana ïa, i târotohia i te saphira; 15 na avae ra, e pou sisa ïa i haamauhia i nia i te tiaraa auro maitai ra; to ˈna mata e au ia Lebanona, e te faahiahia ia hiˈo mai te arezi ra. 16 To ˈna vaha, e maitai rahi roa ïa, ua ati roa oia i te maitai, e te hinaaro-rahi-roa-hia. O te huru ïa o taua here no ˈu ra; o te huru ïa o to ˈu nei hoa, e te mau tamahine i Ierusalema e.