Salamo

E FAAITOITORAA IA HAAMAITAI TATOU I TE ATUA.

95 Tatou e himene ia Iehova! e himene hua tatou i te mato e ora ˈi tatou nei. 2 E haere tatou i mua i tana aro ma te haamaitai, e ma te salamo e himene hua ˈtu ai ia ˈna. 3 E Atua rahi hoi Iehova! e arii rahi i nia i te mau atua atoa ra! 4 Tei tana rima te vahi hohonu o te fenua nei; e te teiteiraa o te mau mouˈa ra, no ˈna ïa. 5 Na ˈna te tai, na ˈna hoi i hamani, e na tana rima i hamani i te repo mǎrô.

6 E haere mai tatou, e haamori ma te piˈo i raro; e tuu i to tatou turi i te aro o tei hamani ia tatou nei, ia Iehova; 7 oia hoi to tatou Atua, o tatou hoi te nǎnǎ no ta ˈna ra aua; te mau mamoe i arataihia e ta ˈna rima. Ia tia ia outou, i teie nei mahana i te faaroo i tana reo, 8 Eiaha e faaetaeta i to outou aau mai tei Meriba ra; e mai tei te mahana i Masa, i te medebara ra; 9 i ta to outou mau metua i faaooo mai ia ˈu ra, e ua aa mai ia ˈu, ite noa ˈi ratou i ta ˈu ra mau ohipa. 10 A maha aˈera ahururaa o ˈu matahiti i te oooraa i te reira ui e ua na ô aˈera vau. E feia aau hapa ratou, e aore i haapao i ta ˈu ra parau; 11 o tei tǎpǔhia e au i tau ririraa ra, e eiaha roa ratou ia ô i to ˈu ra faaearaa.