Salamo
TE ANI RA TE TAATA SALAMO I TE PARAU-TIA.
94 E te Atua ra, e Iehova, e tei tahoo ra; e te Atua, e tei tahoo ra, e faaite hua mai oe. 2 A haere oe i nia, e te haava o te fenua nei; e tuu mai i te utua i tei teoteo ra. 3 E Iehova, mai te aha ra te maoro te taata iino, mai te aha ra te maoro te taata iino, i te fanaˈoraa? 4 Ia mutamuta noa anei ratou e ia parau noa anei i te parau etaeta, atire anei te feia parau iino ra ia faaahaaha noa na?
5 O to oe ra mau taata, e Iehova, ta ratou e hamani ino nei; e te nenei nei i ta oe ra tufaa. 6 Te taparahi nei ratou i te vahine ivi e te taata ê; e te rave-pohe-roa-hia nei te feia otare. 7 E te parau nei ratou, E ore Iehova e hiˈo mai; e ore te Atua o Iakoba e haapao mai. 8 Ia ite mai outou, e tei hau i te ite ore i te taata atoa nei! o outou hoi, e te tau maamaa na! afea ra outou e ite ai? 9 E ore anei tei hamani i te tariˈa nei e faaroo? e ore anei tei hamani i te mata nei e hiˈo? 10 O te papai i te mau etene ra e ore anei e aˈo mai? o tei haapii i te taata nei i te aravihi, e ore anei e ite? 11 Te ite nei Iehova i tei opuahia e te taata nei, e mea faufaa ore anaˈe ïa.
12 E ao to te taata ta oe i haapii, e Iehova, ta oe i haapii i ta oe ra ture; 13 ia noaa ia ˈna te faaearaa ia tae i te mahana e ati ai ra, ia oti te apoo i te ôhia no te paieti ore ra. 14 E ore hoi Iehova e faarue i to ˈna taata, e ore e haapae i ta ˈna ra tufaa. 15 E fariu te utua i te parau-tia, e tei tia te aau ra te pee i te reira.
16 O vai te faatia ia ˈu i te feia rave parau ino ra? o vai te tia i nia e faatia ia ˈu i te feia hamani ino? 17 Ia ore Iehova ia tauturu mai ia ˈu, e riro vave tau varua i te parahi mamû noa. 18 Ia parau vau ra, Te pahee nei tau avae, e tauturu mai to hamani maitai ra ia ˈu, e Iehova. 19 I rotopu i to ˈu nei manaˈo tapitapi i roto ia ˈu nei, na to haamahanahana e faaoaoa mai i tau varua.
20 E ite atu anei oe i te terono parau hapa, o tei faatia i te hamani ino i te ture ra? 21 Te amui maira ratou e rave i te taata parau-tia ia pohe, e te faahapa nei i te toto o te hara ore ra. 22 O Iehova râ to ˈu tauturu, e o tau Atua te mato o to ˈu nei haapuraa, 23 na ˈna e hopoi mai i to ratou ino i nia ia ratou iho, e tâpû ê atu oia ia ratou ma te hara atoa; na to matou Atua na Iehova ratou e tâpû ê atu.