Salamo

TE UNAUNA, E TE MAITAI O TE EKALESIA.

E himene, e Salamo na te tamarii a Kora.

48 E rahi Iehova, e ia rahi to ˈna haamaitairaahia, i te oire o to tatou Atua, ei nia i to ˈna ra mouˈa moˈa. 2 E nehenehe rahi to te tiaraa, e oaoaraa no te fenua atoa taua mouˈa ra o Ziona; tei te pae i apatoerau ra, te oire o te arii rahi: 3 i roto i to reira ra mau fare, o te Atua te haapuraa itea i reira.

4 Inaha! ua amui te hui arii; ua haere atoa hoi ratou e rave: 5 ia hiˈo râ ratou ra, ua maere ihora; ua puauau ihora e reva oioi atura. 6 Roohia ihora ratou e te rurutaina i reira, e te mauiui rahi, mai te fanauraa tamarii ra. 7 Ua riro ratou mai te mea ua roohia i te mataˈi no te hitia o te râ mai, e parari ai te mau pahi no Taresisa ra.

8 Mai ta matou i faaroo aˈenei, ua ite hua iho nei matou, i te oire o Iehova sabaota ra, te oire o to matou Atua, e na te Atua ïa e haamau roa e a muri noa ˈtu. Sela. 9 Ua manaˈo matou i to aroha hamani maitai, e te Atua e, i rotopu i to oe iho nao: 10 mai to oe atoa ra iˈoa, e te Atua, oia atoa te haamaitai ia oe, e tae i te hopea mai o te fenua ra: ua î hoi to rima atau i te parau-tia ra. 11 Ia oaoa te mouˈa ra o Ziona, ia haapopou te mau tamahine no Iuda i te mau parau i faaauhia e oe ra.

12 A haaati na ia Ziona, a haaati haere na ia ati roa, a taio i te mau pare, 13 a hiˈo maitai na i te mau patu faaetaeta, a haamanaˈo i to ˈna mau fare: ei parauraa na outou i tera ˈtu ui. 14 O te Atua nei â hoi to matou Atua e a muri noa ˈtu: e aratai tamau â hoi oia ia matou e tae noa ˈtu i te pohe ra.