Salamo
I AˈOHIA TE TAATA IA MANAˈO I TE TIA-FAAHOU-RAA RA.
Na te Menasehe. E Salamo na te tamarii a Kora.
49 E faaroo i teie, e te mau taata na, e fariu mai i to outou tariˈa, e to te ao atoa na; 2 o tei haehaa e tei teitei, o tei veve e te taata taoˈa rahi atoa ra. 3 E parau hoi tau vaha i te parau paari, e te manaˈoraa o tau aau ei te ite ïa. 4 E faaroo tau tariˈa i te parabole, e tatara vau i tau parau moe ma te kinura.
5 Eaha vau ia mǎtaˈu i te mau mahana iino nei, ia ati au i te hara a te feia haavare ra? 6 Na te feia i tiaturi i ta ratou ra taoˈa o tei faaahaaha i te rahiraa o ta ratou ra taoˈa; 7 e ore roa e tia i te taata ia faaora i tana taeae, e aita a ˈna hoo ia hopoi i te Atua e noaa mai ai oia ra: 8 (i te rahi hoi o te hoo ia ˈna e ora ˈi, e ore roa ˈtu ïa e taea:) 9 ia ora noa mai â oia e a muri noa ˈtu, e eiaha roa ia tae i te tahuti. 10 Ua itea-mau-hia hoi, e pohe atoa te taata paari; o te maamaa ra e te taata ite ore, te pohe atoa nei ïa, e te vaiihohia nei ta ratou taoˈa na vetahi ê. 11 Te manaˈo nei ratou e e tia to ratou mau fare i te vai-maite-raa e a muri noa ˈtu; to ratou ïa parahiraa e tae noa ˈtu i te mau ui atoa ra; te haamairi nei ratou i to ratou mau iˈoa i nia i to ratou ra mau fenua ra. 12 E ore hoi te taata ma te maitai atoa ra e vaiiho-tamau-hia; e au ïa i te mau puaa e pohe noa ra.
13 O taua haerea no ratou ra, o to te feia maamaa ïa, te faatia nei râ ta ratou tamarii i ta ratou parau. Sela. 14 Ua tuu-atoa-hia ratou i hade mai te mamoe ra; ei maa ratou na te pohe; e na te feia parau-tia, ia tae i te poipoi ra, e faahepo i nia ia ratou; e pee to ratou unauna i hade, i to ratou ra parahiraa. 15 Na te Atua e faaora i tau varua i te puai o hade; na ˈna e rave mai ia ˈu. Sela.
16 Eiaha roa oe e mǎtaˈu ia taoˈa-rahi-hia ta te tahi, e ia faarahihia te unauna o to ˈna ra fare: 17 ia pohe hoi oia ra, aita a ˈna e taoˈa hopoi, e ore hoi to ˈna unauna e pee ia ˈna i raro ra. 18 Tana oraraa ra, ua haamaitai oia ia ˈna iho, e ua haamaitaihia oe e te taata nei i to oe rave-maitai-raa ia oe iho. 19 E reva râ oia i te ui ra o to ˈna ra hui metua, o te ore roa e ite faahou mai i te maramarama.
20 O te taata ma te maitai atoa ra, e aore oia i ite ra, e au ïa i te mau puaa e pohe ra.