Ioba

TE MANA O TE ATUA I TE ITERAA, I TAUA TAOˈA RAHI RA I TE LEVIATANA.

41 E noaa anei Leviatana ia oe i te mǎtau? E mau anei to ˈna taa ia oe ia ruuruu i te taura? 2 A parau na, na oe anei e haamau i te taura i nia i te ihu ra? E puta anei te taa ia oe i te auri? 3 E rahi anei to ˈna taparuraa mai ia oe? E haapaia mai anei ta ˈna parau ia oe? 4 E faaau mai anei oia i ta ˈna parau ia oe? E rave anei oe ia ˈna ei tavini mau? 5 E omiri noa ˈtu anei oe ia ˈna mai te manu ra? E tapea anei oe ia ˈna no to mau tamarii tamahine? 6 Na to mau taua anei e amu ia ˈna? E tufa anei ratou ia ˈna i na feia hoo ra? 7 E î anei to ˈna iri ia oe i te auri tara? E tana afii i te patia iˈǎ? 8 A tuu na i to rima i nia ia ˈna; e haamanaˈo i te mârô, atira ˈtu ai. 9 Inaha! e mea faufaa ore ia manaˈo atu ia ˈna: e ore anei te taata nei e taiâ ia ˈna, i te huru anaˈe ra? 10 Aore roa e taata e tia ˈi ia faaara ˈtu ia ˈna; o vai hoi te taata e mau i mua ia ˈu? 11 O vai tei horoa mai i ta ˈu ia faautua ˈtu vau ia ˈna? To raro aˈe i te raˈi atoa nei, na ˈu ïa.

12 E ore au e huna i to ˈna huru, e to ˈna etaeta, e te tupu maitai. 13 Na vai e heheu i te vehî o to ˈna mata? E na vai e hopoi mai i te tavaha piti? 14 Na vai e iriti i te opani o to ˈna mata? Te nanairaa o tana niho e ati noa ˈˈe, e mea riaria ïa. 15 To ˈna paruru etaeta ra, to ˈna ïa teoteo; ua ati roa te poa no ˈna ra mai te mea tapirihia ra. 16 Ua faaauhia te tahi i te tahi, e ore roa te mataˈi e ô i roto ra. 17 Ua faaauhia te tahi i roto i te tahi, ua tiafetuhia e ore roa e taa. 18 Ua maitihe anaˈe oia, ua pura ïa te auahi; e au to ˈna mata i te opani mata o te poipoi. 19 E rama tei puroro mai no roto i to ˈna vaha; e te pura auahi e reva ˈtura. 20 E au auahi tei pǔpû mai no roto i to ˈna apoo ihu, mai to te pani ia pihaa ra e mai te pani rahi. 21 E ama te arahu i te aho no ˈna, e auahi ura tei puroro mai no roto i tana vaha. 22 Te noho maira te puai i nia i tana aˈî, e te ori maira te pohe i mua ia ˈna. 23 Ua taati-roa-hia te iˈo no ˈna, ua piri roa i nia ia ˈna, e ore roa e ataataa noa ˈˈe. 24 E au te mafatu i te ofai i te etaeta; e ore roa e mofai, e au i te ofai oro i rara ra. 25 Ua tia anaˈe oia i nia ra, ua mǎtaˈu te feia etaeta; e ua haamoˈa ratou ia ratou iho no te riaria. 26 E ore te ˈoˈe a te taata i aa ˈtu ia ˈna e mau. E te mahae, e te ihe, e te hoto. 27 E aihere te auri nei ia ˈna, e te veo ra, e raau pe ïa. 28 E ore oia e horo i te ohe, e te ofai maa ra, e patê mai ïa ia ˈna mai te aihere ra. 29 Ua riro hoi te omore ei aihere ia ˈna; e te ata noa ra i te ueueraa o te mahae. 30 E ofai pǎpǎ to ˈna roi, o te mato parari ra ta ˈna i ueue i raro i te vari. 31 Ua pihaa te moana ia ˈna mai te pani ra; e te miti ra mai te mea faareruhia ra ia ˈna. 32 Te anaana maira te eˈa i muri aˈe ia ˈna, e taohia te moana ua hinahina. 33 Aita o ˈna e faito i nia i te fenua nei; aore o ˈna e mǎtaˈu i roto ia ˈna. 34 Ua hiˈo oia i te feia faaahaaha; ua hau oia i nia i te feia teoteo atoa.