Ioba
TE FAAHAEHAA NEI IOBA I MUA I TE ARO O TE ATUA.
40 Ua parau mairâ, Iehova ia Ioba na ô maira, 2 E tia anei tei mârô mai i te Puaihope ia haapii mai ia ˈna? na tei aˈo mai i te Atua ra e parau mai.
3 Ua parau atura Ioba ia Iehova, na ô atura, 4 Inaha, e viivii to ˈu! e nahea ˈtu vau ia oe? E tapoˈi na vau i tau vaha i tau rima. 5 Hoê aˈenei a ˈu parauraa, e ore râ vau e parau faahou: apiti aˈenei, e ore râ vau e tamau.
6 Ua parau maira Iehova ia Ioba na roto i te puahiohio, na ô maira, 7 A tatua na i to tauupu mai ta te taata ra: e ui na vau ia oe, e na oe e parau mai ia ˈu. 8 E faaore mau â ta oe i ta ˈu ra faaauraa? E faahapa mai â oe ia ˈu ia tiahia oe ra? 9 Te faito atoa ra anei to oe rima i to te Atua? E faito atoa anei to reo patiri i to ˈna? 10 E faaunauna na ia oe i te hanahana e te hinuhinu, e faaahu na ia oe i te tura e te nehenehe. 11 A tuu na taua riri rahi uˈana na oe ra; a hiˈo i tei teoteo a faahaehaa ˈtu; 12 a hiˈo i tei teoteo, a tuu atu ai i raro, a taataahi i te paieti ore i to ratou vahi. 13 Huna atoa ˈtu ia ratou i raro i te repo: e e taamu atoa ˈtu i to ratou mata i te vahi moe ra: 14 ei reira vau e parau atu ai ia oe, e ora oe i to rima atau ra.
15 Inaha hoi te Behemota: ta ˈu i hamani mai ia oe atoa na; e aihere ta ˈna i amu mai ta te puaatoro atoa ra. 16 Inaha, tei to ˈna tauupu to ˈna etaeta, e to ˈna puai tei te pito ïa o tana opu. 17 Ua faatia oia i tana aero mai te arezi ia hinaaro; e te uaua o to ˈna humaha, ua taviri-atoa-hia ïa. 18 E au to ˈna mau ivi i te maa veo paari ra; e te ivi tuamoo mai te auri taatoa ïa. 19 O tei hau ïa i te ohipa a te Atua; e na tei hamani ia ˈna e faatae atu i ta ˈna reo ˈoˈe ia ˈna. 20 Inaha! ua riro te mouˈa ei maa na ˈna; e tei reira te mau puaa taehae i te hauti-haere-raa. 21 Ei raro aˈe i te raau mǎrǔmǎrǔ to ˈna taotoraa; i roto i te uruaeho e te vahi pape. 22 Na ratou oia i tapoˈi, na te raau mǎrǔmǎrǔ i tamaru i nia ia ˈna. E ua haaatihia oia e te raau o te pape ra. 23 Ia uˈana noa mai te pape ra, e ore oia e ru; e ore oia e hauti, ia uˈana noa mai Ioridana i tana vaha. 24 Na vai oia e rave faaite noa? A here ai i to ˈna ihu i te taura?