Ioba

TO IOBA TUU HAEHAARAA I MUA I TE ARO O TE ATUA RA.

42 Ua parau atura Ioba ia Iehova, na ô atura,

2 Ua ite au e, e puaihope to oe, e e ore ta oe i opua ra e tia ia faaore. 3 O vai teie e haamoe i te parau e ore e taea e te ite ra? Ua parau vau i tei ore i itea e au ra; e parau taa ê, e ore e taea, e ore e itea e au. 4 E faaroo mai oe, i tena na, e na ˈu e parau atu; e ui noa na vau ia oe, e na oe e faaite mai ia ˈu. 5 Ite aˈenei au ia oe i te ite tariˈa nei, teie nei râ, te hiˈo nei tau mata ia oe. 6 E teie nei te faafaufau nei au ia ˈu iho. E te tatarahapa nei au i raro i te repo e te rehu auahi.

7 E oti aˈera taua parau nei i te parauhia ˈtu e Iehova ia Ioba, ua parau atura Iehova ia Eliphaza ati Temani, Ua riri au ia oe, e na hoa atoa no oe ra toopiti; aore hoi ta outou parau i au ia ˈu, mai ta tau tavini mai ta Ioba. 8 E tena na, e rave outou i na puaatoro e hitu, e na mamoe oni hoi e hitu, a haere atu ai i tau tavini ra ia Ioba, a hopoi ai i te tahi tusia taauahi na outou, e na tau tavini na Ioba e pure ia outou, oia ta ˈu taata e ite atu, o te tahoo atu hoi au ia outou i ta outou parau faufaa ore. Aore hoi i au ta outou parau ia ˈu, mai ta tau tavini mai ia Ioba. 9 Ua haere ihora Eliphaza, ati Temani, e o Biladada, ati Sua, e o Zophara, ati Naama, e ua na reira i ta Iehova i faaue mai ia ratou ra. E ua ite maira Iehova ia Ioba.

10 Ua ruri ê aˈera Iehova i taua pohe o Ioba ra, ia oti aˈe ta ˈna pure i na hoa no ˈna ra: ua tataipiti maira Iehova i ta Ioba taoˈa i tei noaa ia ˈna i mutaaihora. 11 Ua haere anaˈe maira tana mau taeae, e te mau tuahine, e te mau taata tupu atoa ra; ua amu ihora i te maa i o ˈna ra i roto i to ˈna iho fare; e ua aroharoha ihora ia ˈna, haamahanahana aˈera, i te mau ino i hopoihia mai e Iehova i nia ia ˈna, e ua hopoi atura te taata atoa i te hoê maa moni na ˈna, e te tahi tapea auro e ati noa aˈera ratou atoa ra.

12 Maitai roa aˈera to Ioba hopea i tei mutaaihora ia Iehova; hoê ahuru ma maha a ˈna tausani i te mamoe, e ono tausani i te kamela, e piti tausani i te puaatoro, hoê hoi tausani i te asini ufa.

13 Toohitu hoi a ˈna pue tamarii tamaroa, tootoru tamahine: 14 mairihia ihora tei mutaaihora o Imima, e te toopiti ra o Kezia e te tootoru ra o Kerena-haphuka. 15 E aore roa i itea i taua fenua atoa ra te vahine e au i te mau tamahine a Ioba i te maitatai. Ua horoa maira to ratou metua tane i te hoê parahiraa i roto atoa i to ratou mau tuaane. 16 E muri aˈe i te reira, te ora noa ra Ioba e hoê aˈera hanere, e maha ahuru i te matahiti, e ua ite i ta ˈna mau tamarii, e te mau tamarii atoa a taua na tamarii na ˈna ra, e maha atoa ui ra. 17 Pohe ihora Ioba ma te ruhiruhia, e ma te î i to ˈna ra pue mahana.