Ioba

TE RIRI NEI ELIHU IA IOBA, E TO ˈNA RA PUE HOA TOOTORU RA.

32 Ore aˈera taua na taata tootoru ra e parau ia Ioba, no te mea, te parau ra oia ia ˈna iho e taata parau-tia. 2 Ua tupu aˈera te riri o Elihu a Barakela, e ati Buza, no te fetii o Rama; i riri oia ia Ioba, no te mea, te faatia ra oia ia ˈna iho, aore i te Atua. 3 Riri aˈera hoi oia i na taua tooturu no ˈna ra, no te mea, aore i tia ta ratou parau, faahapa noa ˈi ratou ia Ioba. 4 Te tiai ra Elihu i ta ratou parauraa ia Ioba, no te mea, e tau taata paari aˈe ratou ia ˈna. 5 Ia hiˈo râ o Elihu e aita e parau o roto i te vaha o taua na taata tooturu ra, ua tupu aˈera to ˈna riri. 6 Ua na ô aˈera Elihu a Barakela, e ati Buza ra, te vai apî nei au, e ua paari roa outou; i orai tia ˈi au i muri, e mǎtaˈu aˈera ia faaite noa ˈtu vau i ta ˈu parau i roto ia outou na. 7 I na ô noa na vau, Tei to ˈna ra mau mahana te parau, e na te rahi o te matahiti e faaite mai i te ite. 8 E varua râ tei roto i te taata nei; e na te uru a te Puaihope ra i noaa ˈi ia ˈna te ite. 9 E ere hoi tei te feia rarahi te ite; e ore hoi e parauhia e, tei te feia tahito te tiaraa o te parau, 10 I parau noa ˈtu ai au nei e, A faaroo mai na ia ˈu; e tuu atoa ˈtu vau i ta ˈu nei parau.

11 Inaha, i tiai noa na vau i ta outou feruri-noa-raa; te faarooroo noa ra vau i ta outou imiraa; e te noaaraa i ta outou paraparauraa. 12 E ua manaˈo vau i ta outou i paraparau atura; e inaha! aore roa Ioba i ite; aore roa ta ˈna parau i faataahia e outou; 13 oi parau hoi outou e, Ua noaa ia matou te ite, na te Atua oia i tuu i raro eiaha te taata nei. 14 Aore hoi oia i parau tia mai ia ˈu i ta ˈna parau, e ore hoi au e rave i ta outou parau ei parauraa ˈtu ia ˈna. 15 Ua maere noa ratou, e aore atura ratou e parau; ua moe ê ta ratou parau. 16 I tiai noa na vau, (e aore roa e parauraa ˈtu ia ˈna; tia noa ˈi ratou i nia, aore roa i parau atu,) 17 e parau noa na vau i ta ˈu ra vahi; na ˈu iho e faaite atu i to ˈu ra manaˈo. 18 Inaha! te î nei tau aau i te parau, e te ru nei te varua i roto ia ˈu nei. 19 Inaha, tau opu mai te uaina aore e pǔpûraa; mai te hue iri pî i fatata i te amaha. 20 E parau noa na vau ia maha ˈˈe au; na tau vaha e parau, e ua faaite atu. 21 E ore au e haapaia noa ˈtu i te taata i teie nei, e ore au e parau faaahaaha noa ˈtu i te taata. 22 Aore hoi au i mataro i te faaiˈoa faaahaaha, a riro vau i te hopoi-ê-hia e tei hamani ia ˈu ra.