Ioba
TE FAAITE NEI IOBA I TE HAAVARE ORE NA ˈNA I TE MAU PARAU ATOA RA.
31 Ua faaau vau i te faufaa i o ˈu nei pue mata; e eiaha vau e tiatonu i te paretenia: 2 eaha hoi tei tuuhia mai e te Atua no nia mai? e te kelero a te Puaihope no te raˈi mai? 3 E ere anei i te pohe o te taata ino? e ia hurêpaapaa roa i te feia i rave i te parau piˈo ra? 4 E ere anei oia te ite i to ˈu nei mau haerea, e ua taiohia tau mau taahiraa? 5 I haerea haavare to ˈu ra, e ua taahi tau avae i te parau-tia ore; 6 e faito oia ia ˈu i roto i te faito tia ra, ia ite te Atua i te haavare ore no ˈu ra. 7 I ohipa ê to ˈu taahiraa i te eˈa mau ra, e ua pee tau aau i tau mata; e ua mau te viivii i nia i tau rima; 8 ia ueue noa ˈtu vau, e na te tahi ê e amu, e ia taihi-tumu-hia ta ˈu i rave ra. 9 Ua haavarehia to ˈu aau i te vahine, e ua tiai au i te uputa o tau hoa; 10 ia rave tau vahine i te oˈiraa sitona na vetahi ê; e na vetahi ê e rave ia ˈna. 11 E riro hoi te reira i te hara imi-atea-hia; e te hara faautuahia e te haava ra. 12 E riro hoi te reira ei auahi e pau roa ˈtu ai, e hope roa ˈi ta ˈu atoa ra i te pau. 13 I faaroo atâ na vau i te parau a tau tavini tane, e tau tavini vahine, i to ratou mârôraa mai ia ˈu nei; 14 eaha ra hoi au ia tia mai te Atua? e ia paheru mai oia, e na hea vau i te parauraa ˈtu? 15 E ere anei hoê â hamani to ˈu, e to ˈna? e ere anei hoê Atua i te hamani ia mâua atoa i roto i te opu? 16 Ua faaere au i te taata rii i ta ratou hinaaro, e ua tiai taiata te mata o te vahine ivi ia ˈu; 17 e ua amu noa i ta ˈu ra vahi iti o vau anaˈe ra, e aore te otare i amu atoa; 18 (mai to ˈu apîraa râ te faaamuraa ia ˈna mai te metua ra, e mai te opu mai o tau metua vahine i te poihereraa ia ˈna.) 19 Ua ite au i te taata i te poheraa i te veve, e te taata rii haehaa i te vehî ore; 20 e aore tona tauupu i haamaitai mai ia ˈu, e aore oia i mahanahana i te huruhuru o tau mau mamoe; 21 ua hopoi au i tau rima i nia i te tamarii otare ra, a ite ai au i to ˈu ra mana i te tomoraa ra; 22 ia taa ê mai tau tapono i to ˈna pǎpǎ i reira, e ia ofatihia tau rima i te ponaraa ra. 23 Ua riro hoi te pohe no ǒ i te Atua ra ei mea riaria na ˈu, e aita ˈtura o ˈu e puai i te aro o to ˈna mana.
24 Ua faariro vau i te auro ei tiaturiraa no ˈu, e ua parau vau i te auro mâ maitai ra, Oe to ˈu manaˈoraa; 25 ua oaoa vau i te mea ua rahi tau taoˈa, e no te mea ua rahi tei noaa i tau rima; 26 ua hiˈo vau i te mahana i te anaanaraa mai, e te marama i te tupuraa to ˈna anaana; 27 e ua riro noa ˈtura tau aau i reira, e ua hôˈi tau vaha i tau rima; 28 ua riro te reira ei hara e faautuahia e te haava; ua huna ïa vau i reira i te Atua i nia i te raˈi ra.
29 Ua oaoa vau i te pohe o tau enemi, e ua faateitei a roohia mai ai oia e te ino ra; 30 aore au i tuu i tau vaha ia rave noa na i te hara, i te aniraa i te ino i nia i tana varua. 31 Aore anei te mau taata o to ˈu ra tiahapa e parau e, O vai tei hiaai i ta ˈna maa e aore i paia; 32 aore roa e taata ê i taoto i te aroâ; e ua iriti au i tau uputa i te taata haere. 33 Ua tapoˈi au i ta ˈu ra hara, mai ia Adamu; i te hunaraa i te piˈo i roto i tau aau; 34 ua mamu noa anei au i te aro o te feia rahi ra? e ua vi anei au i te vahavaha o te mau fetii ra? i mamu noa vau, e eiaha ia tomo i rapae au? 35 Ahiri te tahi e faaroo mai ia ˈu! inaha ïa, tau tapao, na te Puaihope e parau mai ia ˈu! e na tau enemi e papai i te parau ia ˈu nei; 36 e tuuhia e au i nia i tau tapono; e ua haamau i nia ia ˈu mai te korona ra; 37 e faahope au i to ˈu mau taahiraa ia ˈna; e haere atu vau ia ˈna mai te haere o te arii ra. 38 Ua faaino mai to ˈu iho fenua ia ˈu; e ua oto paatoa te mau irava; 39 ua amu vau i tei faahotuhia mai e aore e utua, e ua haapaupau i te aho o te feia fenua; 40 ei motuu tei tupu mai, eiaha ei sitona, e te raau faufaa ore, eiaha ei kerite. Tirara ta Ioba parau.