Ioba

TO IOBA TURA RAHI E TE MANA, RIRO ATURA EI MEA VAHAVAHA, E TE MAITAI UA RIRO EI INO.

30 I teie nei râ, o tei iti to ratou pue mahana i to ˈu iho nei, o tei tâhitohito mai ia ˈu; e ore hoi to ratou mau metua e au ia ˈu, ia faanoho e te mau urî o te nǎnǎ na ˈu nei. 2 Eaha ta ˈu faufaa e noaa i te etaeta o to ratou rima tei ore te puai o te taata nei i roto ia ratou? 3 No te poia e te oˈe i ripâ roa ˈi, i auau noa na ratou i te medebara, i te vahi arehurehu taata ore, e te aihere i mutaaihora; 4 i te huhutiraa i te metue no roto i te aihere, e te aa o te retama ei maa na ratou. 5 Ua tiahi-ê-hia ratou i te vaha taata; (e ua piihia ratou na muri, mai te pii eiâ ra.) 6 Ia parahi i roto i te taˈoa mato teitei i te mau peho ra; i roto i te mau apoo i raro i te repo ra, e te mau ana o te mato ra. 7 I roto i te aihere to ratou uâ-noa-raa, i roto i te mau raau taratara to ratou haaputuraa. 8 E feia taiata, e fanauˈa no te taata iino, e ino rahi to ratou i to te repo ra. 9 Ua pehehia ra vau e ratou i teie nei, e ua riro ei parauraa na ratou. 10 E taata riaria vau na ratou, e horo ê ratou ia ˈu; e tufa hoi ratou i te huare i mua i tau aro. 11 Ua tatara oia i tau taura, e ua ati au, ua tuu ratou i te tavaha i mua ia ˈu.

12 E taata apî anaˈe tei tia mai i tau rima atau ra; te tute ê nei ratou i tau avae; te opani nei ratou ia ˈu nei i to ratou mau eˈa pohe ra. 13 Ua ôhia e ratou tau aratia; e te faauˈana ra ratou i to ˈu pohe e aita roa a ˈu e tauturu ia ratou. 14 Ua horo maira ratou i nia ia ˈu mai te mea e, na roto i te hoê vahi parari rahi ra, ua huri maira ia ratou iho i nia ia ˈu i taua pohe rahi ra. 15 Ua hurihia mai te mǎtaˈu i nia ia ˈu; ua ore aˈenei tau mana nei mai te mataˈi e pee ra; e ua ore te ora no ˈu mai te ata e moe ra.

16 Ua tarapape roa tau varua i roto ia ˈu i teie nei, ua roohia vau e te mahana ahoaho. 17 Ua puta roa tau ivi i te po nei e ua pǔpû; e te amuhia nei au aore roa e faaea. 18 Te iriti-taiata-hia nei tau ahu, te piri maira mai te auvaha tiaputa.

19 Ua hurihia vau e ana i raro i te vari; e ua riro vau mai te repo e te rehu auahi. 20 Te tiaoro nei au ia oe, aita râ oe e faaroo mai ia ˈu; te tia nei au i nia, aita râ oe e haapao mai ia ˈu. 21 Ua riro oe ei hamani ino ia ˈu. E ua rave hua mai to rima puai ia ˈu. 22 Te hopoi nei oe ia ˈu i nia e ua haaparahi ia ˈu i nia i te mataˈi; e ua faaorehia e oe to ˈu nei puai. 23 Inaha! ua ite au e riro oe i te hopoi hua ia ˈu e ia pohe roa ˈtu, e i te fare i haapaohia no te feia atoa e ora nei. 24 E ore râ oia e faatoro atu i tana rima i roto i te menema, pii noa ˈi ratou i to ˈna ra pohe.

25 Aore anei au i oto i tei roohia i te ahoaho? e aore anei au i taiâ i tei ati i te veve? 26 I tiai hoi au i te maitai, e roohia ihora i te ino; i nounou hoi au i te maramarama, e roohia ihora i te pouri. 27 Ua roohia tau aau i te horuhoru, aore e faaea; e anotau maˈi teie i nenei mai i nia ia ˈu. 28 Te haere omoe noa nei au, ma te mahana ore; te tia nei au i nia ei auê noa i roto i te taata atoa ra. 29 Ua riro vau ei taeae no te teni; e ei taua no te ione; 30 ua riro tau iri i nia ia ˈu nei ei mea ereere; e ua ama tau ivi i te veavea. 31 Ua riro tau kinura ei auê; e tau vivo, ua riro mai te reo o te feia oto ra.