Ioba

TE FAAITE NEI ZOPHARA I TE HURU O TE TAATA RAVE HARA, E TO ˈNA HOPEA.

20 Ua parau atura Zophara ati Naama, na ô atura,

2 Te taa noa nei te parau ia ˈu ia parau; e teie nei, te ru nei au i te tuu atu i taua parau ra. 3 Ua ite au i tena na faaino i te aˈoraa mai ia ˈu nei, e no te ite o to ˈu nei aau e parau atu ai au. 4 Aita oe i ite i teie nei parau mai tahito mai? e faanohohia ˈi te taata i nia i te fenua nei, 5 E e poto â te oaoaraa o te paieti ore, e to te haapao taiata maitai, mai te amoraa mata nei ïa? 6 Tae noâ ˈtu to ˈna teoteo i nia i te raˈi; e tana upoo ia taea noa ˈtu te ao; 7 e pohe roa râ oia mai te taoˈa viivii roa ra e a muri noa ˈtu, e na te feia i ite ia ˈna e parau e, Teihea oia nei? 8 E pee ê atu oia mai te taoto, e ore e itea ia imi; e mou roa ˈtura mai te orama i te po ra. 9 Te mata i hiˈo ia ˈna, e ore e hiˈo faahou atu e ore roa hoi to ˈna vahi e ite faahou atu ia ˈna. 10 E haapaia ta ˈna mau tamarii i te taata rii ra, e na to ˈna iho rima e hopoi faahou atu i te taoˈa ta ˈna i rave. 11 Te î ra to ˈna ivi i te hara o to ˈna ra apîraa, e taoto ïa e oia atoa ra i raro i te repo.

12 Te maitai noa ra te parau ino i to ˈna vaha; e te hunahia ra i raro aˈe i to ˈna arero; 13 faaherehere noa iho oia, e ore e tuu ra; te vaiiho noa ra i roto i tana vaha; 14 ua faahuru-ê-hia te maa i roto i tana opu; e ua riro ei au asepi i roto ia ˈna. 15 O te taoˈa i horomiihia e ana ra, e pau ïa i te ruaihia; na te Atua ïa e faaruai i rapae i to ˈna ra opu. 16 Te vahi taero o te asepi ta ˈna e ote; e pohe oia i te arero o te ophi. 17 E ore oia e ite i te maaraa o te pape ra; te taheraa meli e te bata. 18 E faahoˈi oia i tei noaa i te ohipa, e ore e amu; e au hoi ta ˈna e faahoˈi ra i te rahi o ta ˈna ra taoˈa, e aita o ˈna e oaoaraa. 19 No te mea ua hamani ino, e ua faarue i te taata rii; e ua rave hua oia i te fare, e ere tana i faatia ra; 20 no te mea e ore to ˈna opu e paia, e ore roa hoi ta ˈna i hinaaro ra e faatoehia. 21 Aita hoi a ˈna maa e toe ra: i ore ai ta ˈna taoˈa i imihia ˈi. 22 I te mahana taoˈa-rahi-hia ra, e ati to ˈna i reira; e faaô noa mai te rima o te feia haapeapea i nia ia ˈna i reira. 23 Te rave ra oia e faaî i tana opu, te huri maira te Atua i te uˈana o to ˈna riri i nia ia ˈna; e te amu noa ra oia, te haamairi noa maira i tana riri i nia ia ˈna. 24 Ia horo oia i te mauhaa auri ra, e puta pǔpû roa oia i te fana veo. 25 Ua iritihia mai ïa, mai roto mai i te opu; te ohe anaana no roto i to ˈna au; ua roohia e te riaria. 26 Ua hunahia te pouri ei taoˈa na ˈna, e pau oia i te auahi puhipuhi-ore-hia; e tei toe i roto i to ˈna fare e roohia ïa i te ino. 27 Na te raˈi e faaite i to ˈna piˈo, e tia mai te fenua e faahapa ia ˈna. 28 E faataa-ê-hia te taoˈa o to ˈna fare, e e mou ïa i te mahana e riri ai ra. 29 O te huru ïa o ta te taata paieti ore tufaa i te Atua ra; o ta ˈna ïa taoˈa i haapaohia e te Atua na ˈna.