Ioba

 2 “No reira to ˈu mau manaˈo arepurepu e turai ai ia ˈu ia pahono,

No te mauiui i roto ia ˈu.

 3 Ua faaroo vau i te tahi faahaparaa tei faaino ia ˈu.

E e faahepo to ˈu maramarama* ia ˈu ia pahono.

 4 Papu ua ite ê na oe i te reira mai te haamataraa mai,

Mai te reira hoi mai te tuuraahia te taata* i nia i te fenua,+

 5 E mea poto te reo oaoa o te taata ino

E no te hoê taime poto te oaoa o te taata faatura ore i te Atua.*+

 6 Noa ˈtu e tae roa to ˈna rahi i te raˈi

E e raea roa te mau ata i to ˈna upoo,

 7 E mou oia e a muri noa ˈtu mai to ˈna tutae.

E parau te feia tei ite noa na ia ˈna: ‘Teihea oia?’

 8 E pee oia mai te tahi moemoeâ, e eita ratou e ite mai ia ˈna.

E tiahihia oia mai te tahi orama i te po.

 9 Eita te mata tei ite na ia ˈna e ite faahou ia ˈna,

E eita oia e ite-faahou-hia i to ˈna vahi.+

10 E imi ta ˈna iho mau tamarii i te hamani maitai o te feia veve,

E na to ˈna iho rima e faahoˈi atu i ta ˈna faufaa.+

11 Ua î to ˈna mau ivi i te itoito o te apîraa,

E tarava râ te reira* e o ˈna i roto i te repo.

12 Mai te peu mea momona te mea ino i to ˈna vaha,

Mai te peu e huna oia i te reira i raro aˈe i to ˈna arero,

13 Mai te peu e tamata oia i te reira e eita e tuu atu,

E tapea noa râ i roto i to ˈna vaha,

14 E maramarahia ta ˈna maa i roto ia ˈna.

E riro te reira mai te taero o te asepi i roto ia ˈna.

15 Ua horomii oia i te faufaa, e pihaˈe râ oia i te reira.

E haapihaˈe te Atua ia ˈna i te reira i rapae i to ˈna opu.

16 E ote oia i te taero o te asepi.

E pohe oia i te niho* o te tahi ophi taero.

17 Eita roa oia e ite i te mau tahora pape,

Te mau anavai meri e pata.

18 E faahoˈi atu oia i ta ˈna mau maitai ma te ore e faaohipa i te reira.*

Eita oia e oaoa no te faufaa o ta ˈna tapihooraa.+

19 Ua taataahi e ua faarue hoi oia i te feia veve.

Ua haru oia i te tahi fare ta ˈna i ore i patu.

20 Eita râ te hau e tupu i roto ia ˈna.

Eita ta ˈna faufaa e faaora ia ˈna.

21 Aita e mea e toe e pau ia ˈna.

No reira ta ˈna mau taoˈa e ore ai e vai maoro.

22 Ia rahi roa ta ˈna faufaa, e roohia oia i te ahoaho.

E tairi te ati rahi ia ˈna.

23 A faaî ai oia i to ˈna opu,

E faatae te Atua* i to ˈna riri rahi i nia ia ˈna,

A faatopa ˈi i te reira i nia ia ˈna mai te ûa i roto roa i to ˈna opu.

24 Ia horo ê oia i te mau mauhaa tamaˈi auri,

E puta oia i te mau teˈa o te hoê fana veo.

25 E huti mai oia i te tahi teˈa no roto i to ˈna tua,

Te tahi mauhaa tamaˈi anaana no roto i to ˈna upaa,

E e roohia oia i te mehameha.+

26 E poiri taˈotaˈo te tiai mai ra i ta ˈna mau taoˈa.

E pau oia i te tahi auahi tei ore i tahirihia.

E ati te tiai mai ra i tei ora mai i roto i to ˈna fare ie.

27 E faaite te raˈi i ta ˈna hape.

E tia te fenua no te patoi ia ˈna.

28 E mou to ˈna fare i te ûa rahi.

E riro te reira ei tahora uˈana i te mahana o to te Atua* riri.

29 Tera te tuhaa a te taata ino no ǒ mai i te Atua,

Te tuhaa ta te Atua i faataa no ˈna.”