Ioba

TE PATOI NEI IOBA I TA ZOPHARA, I TE MEA TE ROAA NEI TO TE PAIETI ORE MAITAI I TEIE NEI AO.

21 Ua parau maira Ioba, na ô maira.

2 E faaroo maitai mai na i ta ˈu nei parau, ei haamauruuru teie na outou. 3 E faaoromai mai i ta ˈu nei parau, e a oti taua parau na ˈu nei, e tâhitohito mai ai. 4 O te taata anei ta ˈu e parau nei? ahiri te reira, eaha te mea i ore i paupau ai tau aho? 5 E hiˈo mai outou ia ˈu, a maere atu ai, a tapoˈi ai i to outou vaha i te rima. 6 Te riaria nei au i to manaˈo-noa-raa ˈtu; e ua roohia tau iˈo nei i te rurutaina.

7 Eaha te mea i ora ˈi te paieti ore nei? e i paari ai; e i rahi ai i te mana? 8 Ua itoito ta ratou mau tamarii i mua ia ratou, e to ratou huaai i mua i to ratou mata. 9 Te vai hau noa ra to ratou mau fare, aore e mǎtaˈuraa; aore te ao a te Atua i iri mai i nia ia ratou. 10 Te hapû nei ta te puaatoro oni na ratou, eita e ore! e te fanau nei te puaatoro ufa, e ore ta ˈna e fanau e maihihia. 11 Te tuu nei ratou i te mau fanauˈa mai te nǎnǎ; e te ori nei ta ratou mau tamarii. 12 Te tiatia nei ratou i te pahu e te kinura, e te oaoa nei ratou i te oto o te vivo; 13 te faahope nei to ratou pue mahana i te navenave, e mai te amoraa mata nei reva ˈtura i hade. 14 I parau ai hoi ratou i te Atua, Ia atea ê atu! aore matou i hinaaro i te ite i ta oe parau. 15 Eaha te Puaihope, ia faaroo atu tatou ia ˈna? eaha ta tatou faufaa e noaa, ia pure atu tatou ia ˈna? 16 Inaha! e ere tei to ratou iho rima to ratou maitai i te vairaa; e ore râ vau e faatia i te aˈo a te paieti ore! 17 O te pohe vave hoi te mori o te paieti ore e! e to ratou pohe i te tuu-vave-raahia mai e! e tuu riri maira oia i te ati i nia ia ratou. 18 Ua riro ratou mai te aihere i te aro o te mataˈi ra, e mai te ota e puehu i te vero ra. 19 Te vaiiho nei te Atua i ta ˈna hara no te tamarii; oia ihora ta ˈna e faautua mai, e ia ite hoi oia. 20 Ia ite hua hoi to ˈna mata i to ˈna pohe, e oia iho te horomii i te riri o te Puaihope. 21 Eaha oia e haapao ai i tana utuafare i muri aˈe ia ˈna, tei hope roa to ˈna mau marama?

22 Na vai e faaite atu i te Atua i te parau? tei faaau i te utua i te feia teitei. 23 Te pohe nei vetahi taata o te etaeta te etaetâ, aore roa e mauiui, aore e ino. 24 Ua ati oia i te poria, e te mǎrû ra to ˈna ivi i te meˈî. 25 Te pohe nei te tahi ma te ati rahi i te mauiui, e aore roa i fanaˈo i te amuraa maa. 26 Hoê â râ taotoraa i raro i te repo, e ua haaatihia ratou e te toˈe.

27 Inaha! ua ite au i to outou manaˈo, e te patoi ta outou e imi ei ati no ˈu nei. 28 Te parau nei hoi outou e, teihea te fare o te taata mana? teihea te tiahapa parahiraa no te paieti ore? 29 Aita outou i ui i te feia e haere i te eˈatia? e aore outou i ite i ta ratou tapao? 30 Te vaiiho-hia ra te feia parau ino no te mahana e pohe ai? e ia tae i te mahana tahooraa ra, e arataihia ratou i rapae au ra. 31 Na vai râ e faaite i to ˈna haerea i mua i to ˈna mata? a tahoo atu ai ia ˈna i ta ˈna i rave ra? 32 E hopoi-puehuehu-hia ra oia i te apoo, e e tiai-maite-hia hoi to ˈna menema. 33 Te repo o te peho te mǎrû ra i nia ia ˈna; e peehia oia e te taata atoa, mai te feia atoa e rave rahi na mua ra. 34 Eaha hoi au e mauruuru ai i tena na parau faufaa ore? te vai na hoi te haavare i roto i ta outou parau.