Ezera

TO EZERA AROHARAA, E TA ˈNA PURE I TE TAATA, MA TE FAˈI I TE HARA.

9 E oti aˈera te reira, ua haere maira te feia rarahi ia ˈu nei, e ua na ô maira, Te mau taata o Iseraela, e te mau tahuˈa, e te mau ati Levi, aore i faataa ia ratou i te mau taata o teie nei fenua; i te rave-atoa-raa i te parau faufau a te ati Kanaana, e te ati Heta, e te ati Perezi, e te ati Iebusi, e te ati Amona, e te ati Moabi, e ta to Aiphiti, e te ati Amori. 2 Ua rave ratou i ta ratou mau tamahine na ratou iho, e na ta ratou mau tamarii: e ua anoi noa te feia moˈa i te mau taata no teie nei mau fenua: e te feia rarahi e te mau tavana tei na mua ïa i taua hara nei. 3 E tei te faarooraa ˈtu vau i te reira parau, ua hahae au i tau ahu e tau ahu tipona, e ua huhuti au i te rouru o tau upoo e tau umiumi, e ua parahi ihora ma te maere. 4 Ua haaputuputu maira te feia atoa e rurutaina i te parau a te Atua o Iseraela, no te hara a te feia i reva ê ra; parahi noa ihora vau ma te maere e tae noa ˈtura i te hopoiraa i te tusia ahiahi ra.

5 E tae aˈera i te hopoiraa i te tusia ahiahi ra, ua tia aˈera vau i taua teiaha no ˈu ra; ua motu ihora hoi taua ahu no ˈu ra e te ahu, tipona; ua tuu ihora vau i tau turi i raro, ua mahora aˈera tau rima i tau Atua ia Iehova. 6 E ua na ô atura vau, E tau Atua e, ua haama vau, ua uteute tau mata i te haama, ia nânâ noa ˈtu vau ia oe, e tau Atua e: ua rahi iho nei hoi ta matou hara i nia i to matou upoo, e ua tae taua hara rahi na matou nei i nia i te raˈi. 7 Mai te anotau mai â o to matou mau metua ra, e tae noa aˈenei i teie nei mahana, ua rahi â ta matou hara; e no ta matou hara i tuuhia ˈi matou, e to matou mau arii, e ta matou feia tahuˈa, i te rima o te mau arii no te mau fenua nei, ia tâpûhia i te ˈoˈe, e ia pau, e ia haruhia, e i te mata haama, mai tei teie nei mahana. 8 E teie nei vahi iti poto, ua hamani maitai mai to matou Atua o Iehova ia matou, i te horoaraa mai i te taata rii toea ia ora, e te tahi mauraa i to ˈna nei vahi moˈa: ua aputa mai te maramarama i to matou nei mata i to matou Atua, e ua horoa mai i te tahi mapuhiraa aho no matou i to matou atiraa nei. 9 E feia tapeahia hoi matou; aita râ to matou Atua i faarue taue mai ia matou nei i to matou tapearaa ra, ua faatupu râ oia i te aroha ia matou i mua i te aro o te mau arii no Peresia ia anaanaea ˈˈe matou nei; e ia faatia hoi i te fare o to matou Atua, e ia maitai faahou te mau vahi pau, e ia horoa mai i te tahi paruru no matou i Iuda nei, e i Ierusalema. 10 E teie nei, e to matou Atua, e nahea hoi matou i teie nei? ua rave faarue hoi matou i ta oe parau, 11 i ta oe i parau mai i te vaha o to mau tavini ra i te mau peropheta, a na ô mai ai ra e, O teie nei fenua ta outou e haere e parahi nei, e fenua viivii ïa, no te viivii o te feia fenua nei i ta ratou mau peu faufau; ua îî roa hoi teie nei fenua i ta ratou mau parau faufau mai te tahi otia, e tae roa ˈtu i te tahi. 12 E tena na, eiaha e horoahia ta outou mau tamahine i ta ratou mau tamarii, eiaha hoi e rave i ta ratou mau tamahine na ta outou mau tamarii; eiaha roa e imihia te hau e te maitai no ratou e a muri noa ˈtu; ia etaeta hoi outou, e ia amu outou i te maitai o teie nei fenua, a vaiiho ai ei aiˈa tupuna vairaa roa na ta outou mau tamarii. 13 E teie nei, tei roohia mai matou i ta matou nei parau ino, e ta matou nei hara rahi e pohe iti hoi to matou ia oe, e to matou Atua, e ore e au i ta matou nei hara; e ua horoa mai hoi oe i te ora mai teie nei. 14 E tia anei hoi ia matou ia faarue faahou i ta oe parau, a faaau ai i te feia i rave i teie nei mau parau ino; e ore anei oe e riri mai ia matou e ia pau roa ˈtu matou nei, e ia ore roa ia toe te taata ia ora? 15 E te Atua o Iseraela, e Iehova e; e parau maitai ta oe: inaha hoi matou nei te toe nei ua ora mai tei teie nei mahana: inaha, te faˈi nei matou i ta matou hara ia oe: i ore ai matou nei e mau i mua i to aro na.