Ezera

TE MAU IˈOA O TE FEIA I PEE IA EZERA RA; E TO RATOU HAEREA.

8 Teie taua feia matahiapo ra, teie hoi te parau i te feia i haere atoa i taua tere no ˈu ra mai Babulonia mai, i te hau o te arii ra o Aretehasaseta. 2 To te mau tamarii a Phinehasa ra, o Geresoma ïa: to te mau tamarii a Itamara ra, o Daniela ïa: to te mau tamarii a Davida ra, o Hatusa ïa: 3 to te mau tamarii a Sekania ra, to te mau tamarii o Parosa ra, o Zekaria ïa: oia, e na tamarii tamaroa i te taio-atoa-raahia te fanauraa, hoê hanere, e pae ahuru. 4 To te mau tamarii a Pahata-moabi ra, o Elihoenai a Zeraia ïa; oia, e na tamarii tamaroa ra e piti hanere. 5 To te mau tamarii a Sekania ra, te tamaiti a Iahaziela: oia, e na tamarii tamaroa ra e toru hanere. 6 To te mau tamarii a Adina ra, o Ebeda a Ionatana ïa; oia, e na tamarii tamaroa ra e pae ahuru. 7 To te mau tamarii a Elama ra, o Iesaia a Atalia ïa; oia, e na tamarii tamaroa ra e hitu ahuru. 8 To te mau tamarii a Sephatia ra, o Zebadia a Mikaela ïa; oia, e na tamarii tamaroa ra e vau ahuru. 9 To te mau tamarii o Ioaba ra, o Obadia a Iehiela ïa; oia, e na tamarii tamaroa ra, e piti hanere hoê ahuru e ma vau. 10 To te mau tamarii a Selomita ra, te tamaiti a Iosiphia; oia, e na tamarii tamaroa ra hoê hanere, e ono ahuru. 11 To te mau tamarii a Bebai ra, o Zekaria a Bebai ïa; oia, e na tamarii tamaroa ra hoê taau ma vau. 12 To te mau tamarii a Azagada ra, o Iohana a Hakatana ïa; oia, e na tamarii tamaroa ra hoê hanere, hoê ahuru. 13 To te mau tamarii hopea a Adonikama, teie to ratou iˈoa, o Elipheleta ïa, o Iehiela ïa, e o Semaia ïa; o ratou, e na tamarii tamaroa ra e ono ahuru. 14 E to te mau tamarii atoa a Bigavai, o Utai, e o Zabuda; o ratou e na tamarii tamaroa ra e hitu ahuru.

15 Ua haaputu ihora vau ia ratou i te pae pape e tahe tia i Ahava ra: rui toru matou i te parahiraa i reira i roto i te fare rii ahu; e ia hiˈo-haere-hia e au taua mau taata ra, e te mau tahuˈa, aita ˈtura e tamarii na Levi i te itearaahia e au. 16 Ua tono atura vau i te vea ia Eliezera, e ia Ariela, e ia Semaia, e ia Elenatana, e ia Iariba, e ia Elenatana, e ia Natana, e ia Zekaria, e ia Mesulama, o na taata rarahi ïa; e ia Ioiriba, e ia Elenatana, e feia ite ïa. 17 Ua tono atura vau ia ratou ma te parau ia Ido, e raatira no taua vahi ra no Kasiphia, e ua faaite atura vau i ta ratou parau ia parau atu ia Ido, e to ˈna mau taeae, i te mau Netinimi, i taua vahi ra i Kasiphia, e ia aratai mai ratou i te feia tahuˈa no te fare o to tatou Atua. 18 E no te hamani maitai a to matou Atua ia matou, ua aratai mai ratou i te hoê taata ite, no te mau tamarii a Maheli a Levi, a Iseraela, e o Serebia, e ta ˈna mau tamarii, e te mau taeae, hoê ïa ahuru e ma vau; 19 e o Hasabia, oia, e o Iesaia no te mau tamarii a Merari, to ˈna ra mau taeae, e to ratou mau tamarii hoê taau. 20 E to te Netinimi, o tei haapaohia e Davida e te feia rarahi atoa ra no te rave i te ohipa a te ati Levi, e piti hanere, e piti ahuru i te Netinimi: e ua faaite-atoa-hia to ratou mau iˈoa.

21 Ua faaite atura vau i te hoê haapaeraa maa i reira i taua pape ra o Ahava, ia faaahoaho ia matou i te aro o te Atua, ia imi hoi i te tahi eˈa maitai no matou, e no ta matou mau tamarii, e no ta matou taoˈa atoa. 22 Haama aˈera hoi au ia ani atu i te arii i te feia faehau e te feia puaahorofenua ei tauturu ia matou i te mau enemi i te eˈatia ra: no te mea i parau na matou i te arii e, Tei te feia i imi i te parau maitai ra te rima o to matou Atua; te vai ra râ to ˈna mana e to ˈna riri i te feia i faarue ia ˈna. 23 Ua haapae ihora matou i te maa, e ua imi i to matou Atua i taua mea ra, e ua faaroohia mai matou e ana.

24 Ua faataa ˈtura vau i na tahuˈa rarahi hoê ahuru e ma piti, o Serebia, e o Hasabia, e na taeae no raua tino ahuru, 25 e ua faito atura vau i te ario e te auro, e te mau mea atoa ra, ei taoˈa no te fare o to matou Atua, ta te arii e na taata i aˈo mai ia ˈna, e te feia rarahi no ˈna ra, e o Iseraela atoa i horoa i reira: 26 faito atura hoi au i e ono hanere, e pae ahuru i te taleni ario, e te mau tauhaa ario ra, hoê hanere ïa taleni, e te auro hoê hanere i te taleni; 27 hoê taau hoi auˈa auro, tai hoê tausani i te darekona; e piti auˈa veo anaana, mai te auro atoa ra te maitai. 28 Ua parau atura vau ia ratou, Ua moˈa outou no Iehova, e te mau tauhaa atoa ra, ua moˈa atoa ïa; e te ario e te auro, e taoˈa hopoi-noa-hia ïa na te Atua o to outou mau metua na Iehova. 29 E ara, e tiai i taua mau taoˈa ra, e ia faito outou i te aro o te feia rahi tahuˈa e te ati Levi, e te feia matahiapo i Iseraela nei, ia tae i Ierusalema, i roto i te mau piha o te fare o Iehova. 30 Ua rave ihora te mau tahuˈa e te mau ati Levi i taua ario ra, e te auro, e te mau tauhaa, ua oti i te faitohia ra, e hopoi i Ierusalema i te fare o to tatou Atua ra.

31 Faarue ihora matou i taua pape ra i Ahava, i te mahana hoê ahuru e ma piti i te marama hoê ra, e ua haere ihora i Ierusalema: tei ia matou hoi te rima o to matou Atua, e ua faaora oia ia matou i te enemi i tiai mai ia matou i te eˈatia ra. 32 Tae maira hoi matou i Ierusalema, e ua parahi ihora e rui toru aˈera.

33 E tae aˈera i te maha o te mahana, i faitohia ˈi te ario, e te auro, e te mau taoˈa, i roto i te fare o to tatou Atua, i te rima o Meremota a Uria tahuˈa; i reira atoa Eleazara a Phinehasa; ratou o Iozabada a Iesua, e o Noadia a Binui, e ati Levi anaˈe. 34 Ua hope roa i te taiohia e i te faitohia, e ua papaihia taua faitoraa ra i reira ra. 35 E te mau tamarii no te pau i hoˈi maira, ua hopoi ïa i te tusia taauahi na te Atua o Iseraela, hoê ahuru ma piti i te puaatoro oni na Iseraela atoa ra, e iva ahuru ma ono i te mamoe oni, e hitu ahuru ma hitu i te pinia mamoe, hoê ahuru ma piti i te puaaniho oni, ei taraehara: ei tusia taauahi anaˈe te reira na Iehova.

36 Ua hopoi atura ratou i te parau a te arii ra i te mau tavana e tauturu i te arii, e te feia mana atoa i teie nei pae pape: e ua tauturu mai ratou i te taata e te fare o te Atua ra.