Ezera

TE TATARAHAPA A TE MAU TAATA E TE FARIU-Ê-RAA I TE PARAU MAITAI.

10 E oti aˈera te pure a Ezera, e ua faˈi oia i te hara, ma te oto e ma te taoto noa i raro i mua i te fare e te Atua, ua haaputuputu maira no roto ia Iseraela atoa ra te tahi amuiraa rahi, te tane, e te vahine, e te tamarii; e oto rahi hoi to te taata atoa. 2 Ua parau maira Sekania a Iehiela, no te mau tamarii a Elama, na ô maira ia Ezera, Ua hara matou i to matou Atua, ua rave i te vahine ěê no te feia fenua nei: te vai nei râ te manaˈoraa no Iseraela i taua parau nei â. 3 E teie nei, e faaau na tatou i te parau i to tatou Atua, e tuu ê atu i taua mau vahine nei e ta ratou mau tamarii, ta oe ta tau fatu e parau na, e ta te feia atoa e rurutaina i te parau a te Atua; e haapao â i te ture a na reira ai. 4 A tia; e au hoi teie nei parau ia oe: e na matou oe e tauturu atu: e faaitoito, e rave. 5 Ua tia aˈera Ezera, ua tuu atura i te tǎpǔ i te feia tahuˈa rarahi ra e te ati Levi, e ia Iseraela atoa ra, e haapao ratou i taua parau ra. Ua tǎpǔ ihora ratou.

6 Ua tia maira Ezera mai mua mai i te fare o te Atua ra, e ua haere atura i roto i te piha o Iohanana a Eliasiba: e tae atura i reira, aore i amu i te maa, aore i inu i te pape: te oto ra hoi oia i te hara a te feia i hopoi-ê-hia ra. 7 Ua faaite haere atura ratou i te parau i to Iuda atoa e Ierusalema, i te mau tamarii i hopoi-ê-hia ra, ia haaputu mai ratou i Ierusalema: 8 e te ore e tae maira e rui toru aˈera, i te parau a te feia tahuˈa e te feia paari ra, e pau ta ˈna taoˈa, e faataa-ê-hia oia iho i taua feia i hopoi-ê-hia ra.

9 Ua putuputu maira to Iuda atoa e to Beniamina i Ierusalema i taua rui toru ra. Tei te iva ïa o te marama, e tei te taau hoê o te mahana, te parahi noa ra te mau taata i roto i te vahi atea o te fare o te Atua, te rurutaina ra i taua mea ra, e te ûa rahi. 10 Ua tia aˈera te tahuˈa ra o Ezera i nia, e ua na ô atura ia ratou, Ua hara outou, ua rave i te mau vahine ěê i rahi ai te hara a Iseraela. 11 E tena na, e faˈi i ta outou hara i te Atua o to outou mau metua ra ia Iehova; e haapao hoi i ta ˈna parau: e faataa ê hoi ia outou i te mau taata o teie nei fenua e teie nei mau vahine ěê. 12 Ua parau maira taua amuiraa rahi atoa ra, na ô maira i te pii-noa-raa, O ta oe â i parau maira, ua tia ia matou ia rave. 13 Te rahi nei râ te taata, e anotau ûa hoi teie, e ore matou e tia ia parahi noa i rapae, e ere hoi teie i te ohipa no te mahana hoê e te piti: e feia rahi hoi matou i rave i taua mea nei. 14 E faataa na râ i te feia rarahi atoa i to matou nei amuiraa, e haere mai hoi te feia atoa i to matou nei mau oire i rave i te vahine ěê ra i te taime i haapaohia ra, e te feia paari atoa no te mau oire atoa ra, e te feia haava, e ia ruri-ê-hia te riri rahi o to tatou Atua ia tatou i taua mea nei.

15 O Ionatana a Asahela anaˈe ra, e o Iahazia a Tikava tei rave i taua ohipa ra; e o Mesulama e o Sabetai ati Levi, te tauturu ia raua. 16 E ua na reira te mau tamarii i hopoi-ê-hia ra. Ua maiti ihora te tahuˈa ra o Ezera i te tahi pae i taua feia rahi matahiapo i te utuafare o to ratou ra metua, e ua faaitehia i te iˈoa, parahi ihora ratou i raro i te mahana hoê i te marama hoê ahuru, e imi i taua parau ra. 17 E tae aˈera i te mahana hoê i te marama hoê ra, hope roa aˈera te mau taata i rave i te vahine ěê ra.

18 Itea ihora to roto i te mau tamarii a te feia tahuˈa ra i tei rave i te vahine ěê ra: to te mau tamarii a Iesua a Iozadaka, e to ˈna mau taeae; o Maaseia, e o Eliezera, e o Iariba, e o Gedalia. 19 Ua horoa maira ratou i te rima e tuu ê ratou i ta ratou mau vahine; e ua hopoi ratou i te hoê mamoe oni no roto i te nǎnǎ no ta ratou hara. 20 E to te mau tamarii a Imera ra; o Hanani, e o Zebadia. 21 E to te mau tamarii a Harima ra; o Maaseia, e o Elia, e o Semaia, e o Iehiela, e o Uzia. 22 E to te mau tamarii a Pasura; o Elioenai, e o Maaseia, e o Isemaela, e o Netaneela, e o Iozabada, e o Elasa. 23 O to te ati Levi hoi; o Iozabada, e o Simei, e o Kelaia, oia hoi o Kelita, e o Petahia, e o Iuda, e o Eliezera. 24 E to te feia himene atoa; o Eliasiba; e to te mau tiai uputa; o Saluma, e o Telema, e o Uri. 25 E to Iseraela atoa ra; to te mau tamarii a Parosa; o Ramia; e o Iezia, e o Malekia, e e o Miamina, e o Eleazara, e o Malekia, e o Benaia. 26 E to te mau tamarii a Elama; o Matania, e o Zekaria, e o Iehiela, e o Abadi, e o Ieremota, e o Elia. 27 E to te mau tamarii a Zatu; o Elioenai, e o Eliasiba, e o Matania, e o Ieremota, e o Zabadi, e o Aziza. 28 E to te mau tamarii a Bebai; o Iehohanana, e o Hanania, e o Zabai, e o Atalia. 29 E to te mau tamarii a Bani; o Mesulama, e o Maluka, e o Adaia, e o Iasuba, e o Seala, e o Ramota. 30 E to te mau tamarii a Pahata-moabi; o Adana, e o Kelala, e Benaia, e o Maaseia, e o Matania, e o Bezaleala, e o Binui, e o Manase. 31 E to te mau tamarii a Harima; o Eliezera, e o Isihia, e o Malekia, e o Semaia, e o Simeona, 32 e o Beniamina, e o Maluka, e o Semaria, 33 E to te mau tamarii a Hasuma; o Matenai, e o Matata, e o Zabada, e o Elipheleta, e o Ieremai, e o Manase, e o Simei. 34 E to te mau tamarii a Bani; o Madai, e o Amerama, e o Uela, 35 e o Benaia, e o Bedeia, e o Keluha, 36 e o Vania, e o Meremota, e o Eliasiba, 37 e o Matania, e o Matenai, e o Iasau, 38 e o Bani, e o Binui, e o Simei, 39 e o Selemia, e o Natana, e o Adaia, 40 e o Makenadebai, e o Sasai, e o Sarai, 41 e o Azareela, e o Selemia, e o Semaria, 42 e o Saluma, e o Amaria, e o Iosepha. 43 E to te mau tamarii a Nebo; o Ieiela, e o Matitia, e o Zabada, e o Zebina, e o Iadau, e o Ioela, e o Benaia. 44 I rave na taua feia atoa nei i te vahine ěê, e e tamarii ta te tahi pae, ta taua mau vahine ra i fanau.