Paraleipomeno 2
IOSIA I TE HAAPAO-MAITE-RAA I TE TAHI PASA RAHI RA.
35 Ua haapao atura Iosia i te pasa na Iehova i Ierusalema: e ua patia ratou i te pasa i te mahana hoê ahuru e ma maha i te marama matamua ra. 2 Ua tuu atura oia i to te feia tahuˈa ra toroa, e ua faaitoito ia ratou ia rave i te ohipa i te fare o Iehova. 3 Ua parau atura oia i te ati Levi, no te mea, ua haamoˈahia ratou no Iehova, o ratou te haapii ia Iseraela atoa ra, A tuu na i te afata moˈa i roto i te fare faatiahia e Solomona a Davida arii no Iseraela ra, ei vairaa; eita ˈtura hoi e hopoi-haere-hia i nia i to outou mau tapono: e rave hoi outou i ta to outou Atua i ta Iehova, e ta to ˈna ra mau taata ra Iseraela. 4 Ia parahi hoi outou ma te ineine, i to outou mau fare metua, e to outou mau pǔpǔ, i tei faaitehia mai e te arii o Iseraela e Davida, e tei faaitehia hoi e ta ˈna tamaiti e Solomona. 5 E tia ˈi hoi outou i te vahi moˈa ra, i te haapaoraa hoi i te tufaraa i te feia metua i to outou mau taeae, i te mau taata ra; e te haapaoraa hoi i te faataaraa i te mau fetii ati Levi ra. 6 E na reira i te patiaraa i te pasa, e te haamoˈaraa ia outou, e te faaineineraa i to outou mau taeae; ia haapao maite ratou i te parau a Iehova i te vaha o Mose ra.
7 Ua horoa ˈtura Iosia no roto i te nǎnǎ i te pinia mamoe e te pinia puaaniho na te taata, na te feia atoa i tae maira, ei hopoiraa no taua pasa ra, a toru ahuru i te tausani, a toru tausani hoi i te puaatoro: no roto i ta te arii iho te reira. 8 E te feia rahi i ǒ o ˈna ra, ua horoa noa ratou i ta te mau taata ra, i ta te feia tahuˈa e ta te mau ati Levi, o Hilikia, e o Zekaria, e o Iehiela, na tavana ïa i te fare o te Atua ra, e piti tausani e e ono hanere pinia mamoe e te pinia puaaniho ta ratou i horoa i te feia tahuˈa ra, ei hopoiraa no te pasa, e toru hoi hanere i te puaatoro. 9 E o Konania atoa, e o Semaia, e o Netaneela, na taeae no ˈna ra, e o Hasabia, e o Ieiela, e o Iozabada, e raatira no te ati Levi, o tei horoa na te ati Levi ei hopoiraa no taua pasa ra, e pae tausani pinia mamoe e te pinia puaaniho, e pae hoi hanere i te puaatoro. 10 Nehenehe aˈera taua oroa ra, e te feia tahuˈa i te tiaraa i to ratou vahi, e te mau ati Levi i to ratou ra mau pǔpǔ, i ta te arii hoi i parau maira. 11 Ua patia ihora ratou i te mau puaa no te pasa ra, e na te feia tahuˈa i pîpî i te toto i to ratou rima, e na te mau ati Levi i hohore. 12 Ua faataa ê atura ratou i te mau tusia taauahi, ia tia ia horoa ˈtu i ta te mau fetii a te mau taata ra, ia hopoi atu i ta Iehova, i tei papaihia i roto i te buka a Mose. E ua na reira hoi ratou i te mau puaatoro ra. 13 Ua tunu paa ihora ratou i te pasa i te auahi, i tei haapaohia ra: area te tahi pae i taua mau tusia moˈa ra, ua tunu-pape-hia ïa i roto i te pôti, e te pani rahi, e te pani rii, e ua tufa etaeta ihora i te taata atoa ra. 14 E oti aˈera, ua faaitoito ihora i ta ratou iho, e te feia tahuˈa; no te mea, e ohipa ta te feia tahuˈa, te mau tamarii a Aarona, te hopoi ra ïa i te mau tusia taauahi, e te toâhua, e rui noa ˈtura; i faaitoito ai te ati Levi i ta ratou iho, e ta te feia tahuˈa ra, te mau tamarii a Aarona ra. 15 E te feia himene, te mau tamarii a Asapha, tei to ratou ïa tiaraa, i tei parauhia mai e Davida, e Asapha, e Hemana, e e Iedutuna, te hiˈo a te arii ra: e te tiai ra hoi te mau tiai uputa i te mau uputa atoa; eita ratou e tia ia faarue i ta ratou ohipa; na to ratou mau taeae te mau ati Levi hoi i faaitoito i ta ratou. 16 Ineine roa aˈera taua ohipa a Iehova ra i te mahana hoê, ia haapao i te pasa, e te mau tusia taauahi i nia i te fata a Iehova, i tei parauhia mai e te arii ra e Iosia. 17 Haapao atura te mau tamarii a Iseraela i tae maira, i taua pasa ra, e te oroa i te maa faahopue ore ra e rui hitu aˈera. 18 Aita ïa e pasa i itea i Iseraela nei mai ia Samuela peropheta mai â aore hoi te mau arii o Iseraela i haapao i te pasa mai ta Iosia, e te mau tahuˈa, e te mau ati Levi, e ta Iuda atoa, e o Iseraela i tae maira, e to Ierusalema atoa hoi. 19 Tei te matahiti hoê ahuru e ma vau i te hau o Iosia ra i haapaohia ˈi taua pasa nei.
20 E i muri aˈe i te reira, e nehenehe aˈera te hiero ia Iosia, ua haere maira te arii o Aiphiti o Neko e aro i Karekemisa, i te pape ra, i te Eupharate: e ua haere atura Iosia e aro ia ˈna. 21 Ua tono maira râ oia i te tiatiavea ia ˈna, na ô maira, Te aha nei hoi au ia oe, e tena na arii no Iuda? e ere oe tei haerehia mai e au i teie nei mahana, te tahi utuafare ê râ, e te tamaˈi nei au i te reira: ua parau mai hoi te Atua ia ˈu e ia peepee i te rave, eiaha oe e mârô mai i te Atua, tei ia ˈu nei hoi oia, a pohe hoi oe ia ˈna. 22 Aita aˈera râ Iosia i fariu ê i to ˈna mata ia ˈna, ua haamoe ihora râ i to ˈna iho huru, ia aro atu â oia ia ˈna, aore aˈera i faaroo i te parau a Neko no ǒ i te Atua ra, ua haere ihora, ua aro i te peho ra i Megido. 23 Ua teˈa maira te feia teˈa i te arii ra ia Iosia; ua parau atura te arii i te mau tavini, E hopoi ê outou ia ˈu, ua puta roa vau. 24 Ua rave ihora te mau tavini, ua iriti aˈera ia ˈna i taua pereoo ra, e ua tuu ihora i roto i te piti o te pereoo no ˈna ra; e ua faahoˈi maira i Ierusalema, pohe ihora oia, e tanuhia ihora i roto i te hoê menema no to ˈna ra mau metua. Oto ihora Iuda atoa e Ierusalema ia Iosia ra.
25 Oto ihora hoi Ieremia ia Iosia: e faahiti â te mau himene tane e te mau himene vahine ia Iosia ia oto ratou, e tae roa aˈenei i teie nei mahana, e peu mau hoi na Iseraela; inaha, ua oti hoi i te papaihia i roto i te otohaa ra. 26 E te toea o te parau a Iosia, e te maitai hoi no ˈna, mai tei papaihia i roto i te ture a Iehova: 27 e ta ˈna ohipa i rave, tei mua e tei muri, inaha, ua papaihia i roto i te buka a te mau arii o Iseraela e o Iuda.