Paraleipomeno 2
NO TE HAU O IEHOAHAZA, E NO IEHOIAKIMA, NO IEHOIAKINA, E NO ZEDEKIA RA.
36 Ua rave ihora te taata o te fenua ia Iehoahaza a Iosia, e ua faaarii atura ia ˈna ei mono i tana metua i Ierusalema. 2 Tei te matahiti taau ma toru Iehoahaza i arii ai oia, e toru hoi o ˈna marama i te ariiraa i Ierusalema. 3 E hopoi-ê-hia oia i Ierusalema e te arii o Aiphiti, e ua tuu ihora i te aufau i nia i te fenua hoê hanere taleni ario hoê hoi taleni auro. 4 Ua faariro atura te arii o Aiphiti i tana taeae ia Eliakima ei arii no Iuda e Ierusalema, e ua ruri aˈera i to ˈna iˈoa ia Iehoiakima. Ua rave ihora Neko i te tuaana ia Iehoahaza e ua hopoi atura i Aiphiti.
5 Tei te matahiti taau ma pae Iehoiakima i arii ai oia, hoê ahuru ma hoê o ˈna matahiti i te ariiraa i Ierusalema; e ua rave oia i te parau ino i te aro o to ˈna Atua o Iehova. 6 Oia tei tiihia mai e te arii o Babulonia e Nebukanesa, e ua tapea ia ˈna i te tapea e ua hopoi i Babulonia. 7 E ua hopoi-atoa-hia e Nebukanesa te tahi pae taoˈa no te fare o Iehova i Babulonia, e ua tuu ihora i roto i te hiero no ˈna i Babulonia. 8 E te toea o te parau a Iehoiakima, te parau faufau ta ˈna i rave, e tei itea i roto ia ˈna, inaha, ua papaihia ïa i roto i te buka a te mau arii o Iseraela e o Iuda: riro aˈera te hau i te tamaiti ra ia Iehoiakina.
9 Tei te matahiti vau ra Iehoiakina i arii ai oia; e toru hoi o ˈna marama hoê ahuru mahana i te ariiraa i Ierusalema: ua rave oia i te parau ino i te aro o Iehova. 10 E hope aˈera te matahiti, ua tono maira te arii ra o Nebukanesa i te taata, e ua aratai mai ia ˈna i Babulonia, e te mau taoˈa maitatai atoa no te fare o Iehova, e ua faariro atura i te hoê metua no ˈna ia Zedekia ai arii no Iuda e Ierusalema.
11 Hoê taau ma hoê o Zedekia matahiti i arii ai oia, hoê ahuru ma hoê o ˈna matahiti i te ariiraa i Ierusalema. 12 Ua rave oia i te parau ino i te aro o to ˈna Atua o Iehova, e aore hoi i auraro atu i te peropheta ia Ieremia, i te parauraa mai i te parau a Iehova. 13 Ua orure hoi oia i te hau o te arii ra o Nebukanesa, tei faatǎpǔ ati ia ˈna i te Atua e e ore e hauti: ua faaetaeta ihora râ oia, e ua hauti atura te aau, aore aˈera i fariu i te Atua o Iseraela ia Iehova.
14 Rahi atura hoi ta te feia tahuˈa rarahi ra hara, e ta te taata atoa, i te mau parau faufau a te etene; e ua haaviivii i te fare o Iehova tei haamoˈahia e na i Ierusalema. 15 Ua tono maira te Atua o to ratou mau metua o Iehova i te vea, aita i tuutuu; no te mea te aroha ra oia i to ˈna mau taata, e to ˈna ihora parahiraa. 16 Ua tâhito râ ratou i te mau vea a te Atua, e ua vahavaha i ta ˈna parau, e ua hamani ino i te mau peropheta na ˈna, e tupu roa aˈera te riri o Iehova i to ˈna taata, e aita roa aˈera e haapuraa. 17 I tuu mai ai oia i te arii o te Kaladaio, tei tâpû noa i te mau taata apî i te ˈoˈe i roto i to ratou vahi moˈa, aore roa i aroha i te taata apî, e te potii rii apî, i te taata paari, e tei piˈo i raro i te ruhiruhia: tuu-atoa-hia ˈtura i tana rima. 18 E te mau mea atoa o te fare o te Atua, te mea rahi e te mea rii, e te mau taoˈa atoa no te fare o Iehova, e te taoˈa a te arii, e to te hui raatira atoa, ua hopoi-atoa-hia e ana i Babulonia. 19 Ua tutui hoi ratou i te fare o te Atua i te auahi, e ua haaparari i te aua i Ierusalema; ua tutui hoi i te fare o te hui arii i te auahi, e ua vavahi i te mau taoˈa maitatai atoa ra. 20 E te feia i ora i te ˈoˈe ra, ua hopoi oia i te reira i Babulonia; e riro atura ei tavini no ˈna e no ta ˈna mau tamarii, e tae roa aˈera i te hau i te basileia ra i Peresia. 21 Ia tupu te parau a Iehova i te vaha o Ieremia, ia noaa to taua fenua ra sabati; te vai pau noa ra hoi, te haapao ra â ïa i te sabati e e hitu ahururaa i te matahiti.
22 Tae aˈera i te matahiti matamua o te arii o Peresia ra o Kuro, ia tupu te parau a Iehova i te vaha o Ieremia, i faaaraara ˈtu ai Iehova i te aau o te arii o Peresia o Kuro, ia papai i te tahi ture papai, e ua faaite haere e ati noa ˈˈe to ˈna fenua, na ô atura, 23 Te na ô maira te arii o Peresia o Kuro, Ua horoa mai te Atua no te raˈi o Iehova i te mau basileia atoa o te ao nei; e ua poroi mai ia ˈu e faatia i te tahi hiero no ˈna i Ierusalema, i Iuda ra. O vai to outou i to ˈna atoa ra taata? ei ia ˈna to ˈna ra Atua o Iehova, a haere ai oia i nia ra.