Paraleipomeno 2

TE HAU MAITAI O IOSIA RA, E TE IDOLO I TE PAURAA IA ˈNA.

34 Tei te matahiti vau Iosia i arii ai oia, e toru ahuru hoê tiahapa o ˈna matahiti i te ariiraa i Ierusalema. 2 Ua rave oia i te parau tia i te aro o Iehova, e ua haapao i te eˈa o tana metua o Davida, aore i ohipa ê na te rima atau e na te rima aui.

3 Tae aˈera hoi i te matahiti vau o to ˈna ra hau, i te vai-apî-raa oia ra, ua imi ihora oia i te Atua o tana tupuna o Davida; e tae aˈera i te matahiti hoê ahuru e ma piti, ua tamâ atura oia ia Iuda e ia Ierusalema i te mau vahi teitei, e te mau uru raau, e te mau idolo otiotihia e te mau idolo faatôhia ra. 4 Ua vavahihia hoi te mau fata a Baala i mua i tana aro; e te mau hohoˈa mahana i nia ê ra, ua tâpûhia ïa, e ua tâpû hoi oia i te mau uru raau, e te mau idolo otiotihia e te mau idolo faatôhia, ua haapararihia ïa, e ua taataahi e huˈahuˈa roa aˈera, e ua ueue i nia iho i te tanuraa o te feia i hopoi i te tusia ia ratou ra. 5 E ua tutui hoi oia i te mau ivi o te feia tahuˈa i taua mau idolo ra i nia iho i ta ratou iho mau fata, e ua tamâ ihora ia Iuda e Ierusalema. 6 E i roto i te mau oire o Manase, e Epheraima, e Simeona, e tae noa ˈtura i Naphatali, ua rave oia e ua haaparari i te mau vahi moe o te mau idolo e ati noa ˈˈe ra. 7 E ua rave, ua haaparari i te mau fata, e te mau uru raau, e ua taataahi i te mau idolo e huˈahuˈa roa aˈera, e ua tâpû i te mau hohoˈa mahana e ati roa aˈera taua fenua ra o Iseraela: e mai reira hoi, ua hoˈi maira i Ierusalema.

8 E tae aˈera i te ahuru ma vau o te matahiti o to ˈna ra hau, ua mâ aˈera taua fenua ra e te fare, ua tono aˈera ia Saphana a Azalia, e ia Maaseia tavana o te oire, e ia Ioa a Ioahaza, tapao parau ra, e rave e haamaitai faahou i te fare o to ˈna ra Atua o Iehova. 9 E tae atura ratou i te tahuˈa rahi ra ia Hilikia, ua tuu atura ratou i te moni i hopoihia mai i roto i te fare o te Atua, tei haaputuhia e te mau ati Levi tiai uputa no ǒ ia Manase ra, e no Epheraima, e no ǒ i te toea atoa o Iseraela, e no ǒ ia Iuda e Beniamina, e to Ierusalema atoa hoi. 10 Ua tuu aˈera hoi ratou i roto i te rima o te feia i faaitoito i te ohipa o te fare o Iehova, e ua tuu aˈera ratou i te feia i rave i te ohipa i te fare o Iehova, ei rave e ia etaeta faahou te fare: 11 i te feia tahuˈa, e tei patu faahou i te fare ta ratou i horoa ˈtu, ei hoo i te ofai tarai, e te raau ei faaetaeta, ei tahuˈa no te mau piha i parari i te mau arii no Iuda ra. 12 Rave-maitai-hia aˈera te ohipa e taua mau taata ra; e te feia faaitoito ra, o Iahata ïa, e o Obadia, na ati Levi no te mau tamarii a Merari; e o Zekaria, e o Mesulama, no te mau ati Kohata ïa ei faaite, e te mau ati Levi atoa i ite i te faaoto i te mau mea e faaotohia ra. 13 Ua tuu-atoa-hia hoi to te ati Levi, ei papai parau, e ei feia toroa; e ei tiai uputa, e nia iho i te feia hopoi i te hopoia, e ei faaitoito i te feia e rave i te mau ohipa atoa ra. 14 Te tii ra ratou i te moni i hopoihia mai i roto i te fare o Iehova, i ite atu ai Hilikia tahuˈa i te buka ture a Iehova i papaihia e Mose ra. 15 Ua parau atura Hilikia ia Saphana papai parau, na ô atura, Ua itea ia ˈu te buka ture i roto i te fare o Iehova. Ua tuu maira Hilikia i taua buka ra ia Saphana ra. 16 Ua hopoi atura Saphana i taua buka ra i te arii ra, e ua parau atura i te arii, na ô atura, Te ohipa ta oe i tuu mai i te mau taata, ua ravehia ïa e ratou. 17 Ua haaputu ratou i te moni i itea i roto i te fare o Iehova, e ua tuuhia ˈtu e ratou i te rima o te feia faaitoito, e te rima atoa o te feia i rave i te ohipa ra. 18 Ua parau atura Saphana papai parau ra i te arii, na ô atura, Ua hopoi mai Hilikia tahuˈa i teie nei buka ia ˈu. Ua taio atura Saphana i taua parau ra i mua i te aro o te arii ra. 19 E ite aˈera te arii i taua parau i roto i te ture ra, ua hahae ihora i tana ahu. 20 Ua parau atura te arii ia Hilikia, e ia Ahikama a Saphana, e ia Abadona a Mika, e ia Saphana papai parau, e ia Asaia, e tavini no te arii, na ô atura, 21 E haere, e ui ia Iehova ia ˈu, e te feia e toe i Iseraela nei e Iuda atoa, i te parau i te buka i itea iho nei: te rahi ra hoi te riri o Iehova, i te maniiraa mai i nia ia tatou, no te mea, aita aˈenei to tatou mau metua i haapao i te parau a Iehova, i te raveraa i te mau mea atoa i papaihia i roto i taua buka nei. 22 Ua haere atura Hilikia e te feia atoa i parauhia mai e te arii ra, i taua peropheta vahine ra i Hulada, (te vahine a Saluma a Tikava, a Hasara, e tiai i te piha ahu ra,) i parahi i te hiti i Ierusalema, e ua parau atura i taua parau ra.

23 Ua na ô maira oia ia ratou, Te na ô maira te Atua o Iseraela o Iehova, E parau atu outou i te taata i tono mai ia outou na. 24 Te parau maira Iehova, Inaha, e hopoi mai au i te ino i teie nei vahi, e i nia i te taata atoa, oia te mau ino i papaihia i roto i te buka i taiohia i te aro o te arii o Iuda ra. 25 No te mea, ua faarue ratou ia ˈu, e ua tutui i te mea noˈanoˈa i te mau atua ěê, i riri atu ai au i te mau mea atoa ta ratou e rave nei, e teie nei, e manii atu to ˈu riri i nia i teie nei vahi, e ore e pohe ia tinai. 26 Area i te arii o Iuda, tei tono mai ia outou e ui ia Iehova, e na ô outou i te parauraa ˈtu ia ˈna, Te na ô maira te Atua o Iseraela o Iehova, No te mea, ua mǎrû ihora to oe aau i te parau ta oe i faaroo ra, 27 E ua faahaehaa oe ia oe iho i te aro o te Atua, i te iteraa oe i to ˈna nei parau i teie nei vahi, e te taata atoa no ǒ nei, e ua faahaehaa oe ia oe iho i mua ia ˈu nei, e ua hahae oe i to oe ahu e ua oto ihora oe i mua i tau aro nei, ua faaroo ïa vau ia oe, te na reira maira Iehova. 28 Inaha, e hopoi maite au ia oe i to mau metua ra, e e afaihia hoi oe i to tanuraa ma te hau, e ore to mata e ite i te rahi o te ino ta ˈu e hopoi mai i teie nei vahi, e i nia atoa i to ǒ nei taata. Ua hopoi maira ratou i taua parau ra i te arii ra.

29 Ua tono aˈera te arii e haaputu mai i te feia paari o Iuda e to Ierusalema. 30 Ua haere ihora te arii, e to Iuda atoa ra, e to Ierusalema, e te mau tahuˈa, e te mau ati Levi, e te taata atoa ra, te feia rarahi e te taata rii, i te fare o Iehova: ua taio ihora oia i te mau parau atoa i roto i taua buka faufaa i itea i roto i te fare o Iehova ra ia ite mai ratou. 31 Te tia noa ra te arii i to ˈna tiaraa, e ua faaau ihora i te faufaa i te aro o Iehova, e e pee oia ia Iehova, e haapao â oia i ta ˈna parau, e ta ˈna haapaoraa, e ta ˈna mau peu, ma te aau atoa, e ma te varua atoa, i te haapao-maite-raa i te parau i te faufaa i papaihia i roto i taua buka nei. 32 Ua faaitoito ihora oia i to Ierusalema e to Beniamina, e faatia i taua parau ra. Ua haapao atura to Ierusalema i te faufaa a te Atua, te Atua o to ratou mau metua ra. 33 Ua rave ihora Iosia e ua faarue i te mau mea faufau o te mau fenua no te tamarii a Iseraela, e ua faaitoito atura i to Iseraela e parahi maira ia haamori, ia haamori i to ratou Atua ia Iehova. E aita aˈera ratou i faarue i te pee i te Atua o to ratou mau metua ia Iehova, e hope roa aˈera o ˈna pue mahana i te ao nei.