Paraleipomeno 2

TE HAU O AMAZIA, E TE PAURAA O TE ATI EDOMA IA ˈNA.

25 Tei te matahiti taau ma pae i arii ai Amazia, hoê taau ma iva o ˈna matahiti i te ariiraa i Ierusalema. O Iehoadana te iˈoa o tana metua vahine, no Ierusalema oia. 2 Ua rave oia i te parau tia i te aro o Iehova, aita râ i tia maitai mau te aau.

3 E papu aˈera te hau ia ˈna ra i to ˈna ra utuafare, ua taparahi oia i tana mau tavini, tei taparahi i tana metua, i te arii ra. 4 Aita oia i taparahi i ta ratou mau tamarii, i tei papaihia hoi i roto i te ture, i te buka a Mose, ta Iehova i parau maira e, Eiaha te feia metua ia pohe i te hara a te tamarii, e eiaha te tamarii ia pohe i te hara a te metua; e pohe râ te taata atoa i ta ˈna iho hara.

5 Ua haaputuputu maira Amazia a Iuda, e ua faariro atura ia ratou ei raatira no nia i te mau tausani, e ei raatira no nia i te mau hanere, no te mau fare o to ratou mau metua, e ati noa ˈˈe Iuda e Beniamina atoa: e tei tae i te matahiti hoê taau e nia ˈtu, tei taiohia ïa, e te itearaa ihora, e toru hanere i te tausaniraa i te taata maitatai e tia ia haere i te tamaˈi, o tei rave i te maehae e te paruru. 6 Ua tarahu atura hoi oia hoê hanere i te tausaniraa i te taata i te feia aito anaˈe no roto ia Iseraela i na taleni ario hoê hanere. 7 Ua haere maira râ te tahi taata no te Atua ia ˈna ra, na ô maira, E te arii e, eiaha te nuu o Iseraela ia pee ia oe; aita hoi Iehova i au ia Iseraela, e te mau tamarii atoa a Epheraima. 8 Ia haere râ oe ra, e faaitoito i tena na tamaˈi, e pau oe i te Atua i te aro o te enemi: e tia hoi i te Atua ia tauturu mai, e tia hoi ia haapau. 9 Ua parau maira Amazia i taua taata no te Atua ra, Eaha ra tatou i na taleni ario hoê hanere i horoahia ˈtu e au i te nuu o Iseraela? Ua parau atura taua taata no te Atua ra, E tia ia Iehova ia faahoˈi mai e rahi noa ˈtu â. 10 Ua faataa ˈtura Amazia i taua feia mai Epheraima maira, ia hoˈi i te utuafare: riri roa aˈera ratou ia Iuda, hoˈi atura ratou i te utuafare ma te riri rahi.

11 Ua faaitoito ihora Amazia, e ua aratai i to ˈna ra mau taata, haere atura i te peho miti ra, e ua tairi atura i to Seira, hoê ahuru i te tausani. 12 E hoê ahuru hoi i te tausani i vaiiho-ora-noa-hia, e ua aratai-tîtî-noa-hia e te mau tamarii a Iuda; e ua aratai ia ratou i nia roa i te mato ra, e ua huri atura ia ratou i raro mai nia mai i taua mato ra, parari roa aˈera ratou. 13 Area na feia i faahoˈihia e Amazia ra, ia ore ratou ia tae atoa i te tamaˈi, ua rave atura ïa i te mau oire i Iuda e Samaria, e tae noa ˈtura i Bete-horona, pau ihora na taata e toru tausani, e rave rahi te taoˈa i pau.

14 E tae maira Amazia mai te taparahiraa i te ati Edoma, ua hopoi atoa maira i te mau atua o te mau tamarii o Seira, e ua faatia aˈera ei atua no ˈna iho, e ua piˈo ihora i raro i mua ia ratou, e ua tutui i te mea noˈanoˈa ia ratou. 15 Tupu atura te riri o Iehova ia Amazia, e ua tono atura i te hoê peropheta ia ˈna, o tei parau atu ia ˈna e, Eaha te mea i imi ai oe i te ora, i te mau atua o te etene tei ore i faaora i to ratou iho mau taata i to oe na rima? 16 E te paraparau noa ra oia ia ˈna ua parau maira te arii ia ˈna, Ua haapaohia anei oe ei aˈo i te arii? A mamu na, e ia pohe atoa ˈtu anei oe? Ua mamu noa ihora taua peropheta ra, ua na ô aˈera râ, Ua ite au, ua opua maite Atua ia oe ia pohe roa, no te mea oe i na reira mai, e aore oe i faaroo mai i ta ˈu i aˈo atu ia oe ra.

17 Ua imi ihora te arii o Iuda ra o Amazia i te parau, e ua tono aˈera i te vea ia Ioasa a Iehoahaza, a Iehu, arii no Iseraela, na ô atura, E haere mai e hiˈohiˈo tâua i to tâua pue mata. 18 Ua tono maira te arii o Iseraela o Ioasa i te vea i te arii o Iuda ia Amazia, na ô atura, Ua tono maira te hoê motuu i Lebanona i te vea i te hoê arezi i Lebanona, na ô maira, Ho mai na i to tamahine ei vahine na tau tamaiti: ua haere noa maira te hoê puaa oviri no Lebanona, ua taataahi noa ihora i taua motuu ra i raro. 19 Te parau noa na oe, Inaha, ua pau te ati Edoma ia ˈu; e no te teitei o to aau na ua faaahaaha oe; e parahi noa i te utuafare na; e hauti mai â oe ia pohe e ia hiˈa ˈtu oe e Iuda atoa hoi? 20 Aita râ Amazia i faaroo; te tuu noa ra te Atua ia riro ratou i te rima o to ratou mau enemi, no te mea te imi ra ratou i te ora i te mau atua no Edoma ra. 21 Ua haere ihora te arii o Ioasa i nia, e ua hiˈohiˈo hoi raua i to raua pue mata, oia e te arii o Iuda o Amazia, i Bete-semesa, i ǒ Iuda ra. 22 Pau ihora Iuda i te aro o Iseraela, e ua horo anaˈe ihora ratou, te taata atoa i to ˈna ihora utuafare. 23 Ua rave ihora te arii o Iseraela o Ioasa i te arii o Iuda ia Amazia a Ioasa, a Iehoahaza, i Bete-semesa, e ua hopoi mai i Ierusalema, e ua vavahi i te aua i Ierusalema, mai te uputa i Epheraima e tae noa ˈtura i te uputa i te hiti ra, e maha atoa hanere kubiti ra. 24 E ua rave oia i te auro e te ario e te mau farii i roto i te fare o te Atua ia Obeda-edoma, e te mau taoˈa atoa o te fare o te arii ra, e te mau paruru, e ua hoˈi atura i Samaria.

25 Te ora noa ra Amazia a Ioasa arii no Iuda ra, i muri aˈe i te poheraa o Ioasa a Iehoahaza arii no Iseraela, e hoê ahuru ma pae i te matahiti. 26 E te toea o te parau ia Amazia ra, te matamua e te hopea, e ere anei ua oti i te papaihia i roto i te parau a te mau arii no Iuda e no Iseraela?

27 E i muri aˈe i to Amazia faarueraa ia Iehova, ua amui ihora ratou i Ierusalema e rave ia ˈna, e ua horo atura oia i Lakisa; ua tono atura râ ratou i te taata i Lakisa, e ua taparahi ia ˈna i reira. 28 E ua faauta maira ratou ia ˈna na nia i te puaahorofenua, e ua tanu atura ia ˈna i to ˈna ra mau metua i te oire o Davida.