Paraleipomeno 2
E HAAMAITAI TO UZIA, I TE ANOTAU IA ZAKARIA RA.
26 Ua rave aˈera to Iuda atoa ia Uzia, hoê ahuru ma ono o ˈna matahiti, e ua faaarii aˈera ia ˈna ei mono i tana metua ia Amazia ra. 2 Ua patu faahou aˈera oia ia Elata, e ua faahoˈi maira ia Iuda, ia taoto ra te arii i ǒ to ˈna ra mau metua. 3 Tei te matahiti hoê ahuru ma ono ra i arii ai Uzia ra, e a pae aˈera ahuru ma piti o ˈna matahiti i te ariiraa i Ierusalema. O Iekolia te iˈoa o to ˈna metua vahine no Ierusalema. 4 Ua rave oia i te parau tia i te aro o Iehova, mai ta tana metua mai ia Amazia i rave i te matamehai ra. 5 Te imi ra oia i te Atua i te oraraa o Zakaria ra, tei ite i te orama o te Atua ra: e te imi ra oia ia Iehova ra, te horoa maira te Atua i te maitai no ˈna. 6 Ua haere atura oia e ua aro atura i te Philiseti, e ua parari te patu i Gata ia ˈna, e te patu i Iabene, e te patu i Asadoda, e ua patu faahou i te mau oire apî i pihaiiho ia Asadoda, e i roto i te mau Philiseti. 7 Ua tauturu maira te Atua ia ˈna i te raveraa i te Philiseti, e te raveraa hoi i to Arabia, tei parahi i Gura-baala, e te ati Mehuni atoa. 8 E ua hopoi mai te ati Amona i te taoˈa na Uzia; e ua tae roa to ˈna iˈoa i te tomoraa ˈtu i Aiphiti ra; ua etaeta roa hoi oia. 9 Ua patu ihora hoi Uzia i te pare i Ierusalema, i te uputa i te hiti ra, e te uputa i te peho ra, e te mau poro i taua patu ra, e ua faaetaeta hoi i taua mau vahi ra. 10 Ua patu hoi oia i te pare i te medebara, e rave rahi te apoo pape i ôhia; e puaatoro rahi hoi ta ˈna, i te mau peho ra, e te mau vahi papu atoa: e te faaapu fenua, e te tope vine, i nia i te mouˈa, e i nia ia Karemela, e ohipa au ïa na ˈna. 11 E rave rahi ta Uzia taata tamaˈi, o tei haere pǔpǔ noa a tamaˈi ai, o tei papaihia e te papai parau e Ieiela, e te tavana ra e Maaseia, tei te raatira a te arii ra tei ia Hanania te parau e tae ai. 12 Te feia matahiapo i te taioraa, e piti ïa tausani, e ono hanere, e feia aito anaˈe. 13 E o raro aˈe i te reira ra, e nuu atoa ïa e toru hanere ma hitu i te tausani, e pae hoi hanere tiahapa, e aro tamaˈi anaˈe, e nuu rahi ei tauturu i te arii i to ˈna enemi. 14 Ua imi ihora Uzia i te mauhaa na ratou, na taua nuu atoa ra, i te paruru, e te maehae, e te taupoo, e te ahu tamaˈi, e te fana, e te maa ofai. 15 Ua hamani ihora hoi oia i te ravea i imihia e te feia paari, a tuu ai i nia i te mau pare, e i nia i te mau vahi paruruhia ra, e pee ai hoi te ohe e te ofai rahi. Tui atura to ˈna roo i te mau fenua atoa, i turuhia mai hoi oia i taua mau ravea ra e etaeta noa ˈtura hoi oia.
16 Etaeta aˈera râ oia ra, ua teoteo aˈera e pohe atura: ua rave hoi oia i te hara i to ˈna Atua ia Iehova ra, ua haere hoi oia i roto i te hiero o Iehova e tutui i te mea noˈanoˈa i nia i te fata mea noˈanoˈa ra. 17 Ua pee atura Azaria tahuˈa ia ˈna, oia e na tahuˈa na Iehova e vau ahuru, e feia aito anaˈe: 18 ua patoi atura ratou i taua arii ra, ia Uzia, e ua parau atura, E ere hoi o oe tei haapaohia ei tutui i te mea noˈanoˈa na Iehova, e Uzia, na te mau tahuˈa râ, na te mau tamarii a Aarona, o tei haamoˈa-mau-hia ei tutui i te mea noˈanoˈa: e haere oe i rapae au i tena na vahi moˈa; ua hara hoi oe; e ore hoi tena e riro ei maitai no oe i te Atua ia Iehova ra. 19 Riri aˈera Uzia, e ua rave ihora i te hoê farii i tana rima e tutui â i te mea noˈanoˈa: e te riri noa ra oia i taua feia tahuˈa ra, ua tupu ihora te lepera i nia i to ˈna rae, i te aro o taua feia tahuˈa ra, i roto â i te fare o Iehova, i pihaiiho i taua fata mea noˈanoˈa ra. 20 Ua hiˈo atura te tahuˈa rahi ra o Azaria, e te mau tahuˈa atoa ra ia ˈna; e inaha, ua leperahia to ˈna rae, ua tute atura ratou ia ˈna i rapae; e ua ru atoa hoi oia iho i te haere i rapae, no te mea, ua ravehia oia e Iehova. 21 Riro atura taua arii ra o Uzia ei lepera, e tae noa ˈtura i te mahana e pohe ai ra, e ua parahi lepera noa i roto i te hoê fare ê; ua faataa-ê-hia hoi oia i te fare o Iehova: riro atura te tamaiti ra o Iotama, ei nia ïa i te utuafare o te arii, i te faaauraa i te parau i te mau taata no taua fenua ra.
22 E te toea o te mau parau a Uzia, tei mua e tei muri, ua papaihia ïa e Isaia peropheta a Amoza ra. 23 Taoto ihora Uzia i ǒ to ˈna ra mau metua, e tanuhia ˈtura oia i ǒ to ˈna ra mau metua i roto i te aua tanuraa a te mau arii ra; ua na ô aˈera hoi ratou, E lepera oia; monohia aˈera oia i te hau i te tamaiti ra ia Iotama.