Paraleipomeno 2
I HAAMAITAI IOASA I TE VAI-TIA-RAA O IEHOIADA RA.
24 Tei te hitu o to Ioasa matahiti i arii ai oia, e maha ahuru hoi o ˈna matahiti i te ariiraa i Ierusalema. O Zibia te iˈoa o te metua vahine, no Bere-seba. 2 Ua parau atura Ioasa i te parau-tia i te aro o Iehova, e hope roa aˈera na mahana o Iehoiada tahuˈa ra. 3 Ua rave aˈera Iehoiada i na vahine na ˈna toopiti; e ua fanau a ˈna pue tamarii tamaroa e na tamahine.
4 E i muri aˈe i te reira, ua opua ihora Ioasa e rave e patu i te fare o Iehova. 5 Ua haaputuputu maira oia i te mau tahuˈa, e te mau ati Levi, e ua parau atura ia ratou, E haere outou i te mau oire atoa o Iuda, e tipee haere i te moni ia Iseraela atoa ra, no te fare o to outou Atua, i tera matahiti i tera matahiti, e faaitoito hoi i te rave ia oti vave. Aita râ te ati Levi i faaitoito. 6 Ua parau atura te arii i te tahuˈa rahi ra ia Iehoiada, e ua na ô atura ia ˈna, Eaha oe i ore i parau atu ai i te mau ati Levi e hopoi mai i te taoˈa aufau na Iuda e na Ierusalema i haapaohia e Mose, e te tavini o Iehova, na te amuiraa na Iseraela atoa no te sekene ture ra? 7 Na te mau tamarii a taua vahine paieti ore ra a Atalia i vavahi i te fare o te Atua: e ua hopoi ratou i te mau mea atoa i haamoˈahia no te fare o Iehova, no te mau peu a Baala. 8 E ia parauhia mai ratou e te arii ra, ua hamani ihora ratou i te hoê piha e ua tuu aˈera i rapae au mai i te uputa o te fare o Iehova. 9 Ua poro haere ihora ratou na roto ia Iuda e Ierusalema atoa, e hopoi mai i te taoˈa aufauhia ra ia Iehova, i tei tuuhia ˈtu e te tavini o te Atua ra e Mose i nia ia Iseraela i te medebara ra. 10 Ua oaoa aˈera te feia rarahi e te taata atoa ra, e ua hopoi mai e ua huri i ta ratou i aufau maira i roto i te piha e hope aˈera. 11 E ua hopoi-anaˈe-hia mai taua piha ra i roto i te piha o te arii ra, i te rima o te ati Levi, e ite aˈera ratou e moni rahi, ua haere maira te papai parau a te arii, e te taata toroa o te tahuˈa rahi ra, ua iriti aˈera i te moni i taua piha ra, e ua rave, ua faahoˈi i te vairaa ra. I na reira ratou i tera mahana i tera mahana, e pue aˈera te moni e rave rahi. 12 Ua hopoi atura te arii raua o Iehoiada i taua moni ra i te feia e faaitoito i taua ohipa i te fare o Iehova ra; e ua tarahu atura i te tahuˈa tarai ofai, e te tamuta, ei rave i taua fare o Iehova ra; e te feia tiapai auri e te veo, ei faaetaeta i taua fare o Iehova ra. 13 E no te itoito a rave to taua feia rave ohipa ra, aore aˈera i mahia ua oti taua ohipa ra, riro atura taua fare o te Atua ra te etaeta tahito â te etaeta.
14 E oti aˈera taua fare ra, ua hopoi maira ratou i te toea o te moni i te arii ra e ia Iehoiada; ua rave aˈera ratou i te reira ei peu no te fare o Iehova, ei peu no te ohipa e no te tusia, e ei farii, e te mau peu auro e te ario ra. E aore aˈera ratou i faaea i te hopoi i te mau tusia taauahi i roto i te fare o Iehova i taua anotau o Iehoiada ra.
15 Ruhiruhia ˈtura râ Iehoiada, e ua hope o ˈna pue mahana i pohe ai ra; ua tae oia i te hanere hoê e toru ahuru hoi o ˈna matahiti tiahapa i pohe ai ra. 16 Tanuhia ihora e ratou i te oire o Davida, i roto i te mau arii ra, no te mea, e ohipa maitai ta ˈna i rave ia Iseraela, i te Atua, e to ˈna ra fare.
17 E pohe atura Iehoiada, ua haere maira te feia rarahi i Iuda ra, e ua tahopu maira i te arii. E ua faaroo atura te arii ia ratou. 18 Ua faarue maira ratou i te fare o te Atua o to ratou mau metua o Iehova, e ua haamori i te mau idolo no te uru raau, e te mau idolo atoa: roohia maira Iuda e Ierusalema e te riri o Iehova, i taua hara na ratou ra. 19 Ua tono maira oia i te mau peropheta ia ratou, ei faahoˈi mai ia ratou ia Iehova; e ua faaite hua ˈtura ratou: aita râ ratou i faaroo. 20 Tei nia noa maira te Varua o te Atua ia Zekaria a Iehoiada tahuˈa ra, te tia ra oia i te vahi teitei, e ua parau maira ia ratou, Te na ô maira te Atua, Eaha outou i faarue ai i te parau a Iehova, i ore i tupu ai ta outou ra? No te mea ua faarue outou ia Iehova, ua faarue atoa mai hoi oia ia outou. 21 Ua amui aˈera ratou i ta ratou parau ia ˈna, e ua tui ihora i te ofai i te parau a te arii ra, i roto i te aumoa i te fare o Iehova. 22 Aita aˈera taua arii ra o Ioasa i manaˈo i te hamani maitai a tana metua a Iehoiada, ia ˈna, ua taparahi hoi oia i ta ˈna tamaiti; o tei parau mai hoi i te poheraa ra e, Na Iehova teie e hiˈo mai e na ˈna e tahoo mai.
23 E hope aˈera te matahiti, ua haere maira te nuu o Arama e rave ia ˈna: ua tae maira ratou i Iuda e Ierusalema, e pau roa aˈera te feia rahi o te mau taata atoa ra i te pohe, e ua hapono atura i ta ratou mau taoˈa i te arii o Damaseko. 24 E nuu iti haihai hoi to Arama ra, e nuu rahi roa râ ta Iehova i tuu i to ratou rima, no te mea ua faarue taua feia ra i te Atua o to ratou mau metua ia Iehova. E ua tahoo atura ratou ia Ioasa. 25 Faarue maira hoi ratou ia ˈna ma te putaputa e rave rahi. E reva anaˈe atura ratou, ua amui aˈera to ˈna iho mau tavini e rave ia ˈna, i te toto hoi o te tamarii a Iehoiada tahuˈa ra, e ua rave atura, ua taparahi ia ˈna i nia i to ˈna iho roi: e pohe atura, ua tanu atura ia ˈna i roto i te oire o Davida, aita râ i tanu i roto i te menema o te mau arii ra. 26 Teie hoi taua feia i amui e rave ia ˈna ra; o Zabada a Simeata, e vahine ati Amona, e o Iehozabada a Simirita, e vahine ati Moabi.
27 O te mau tamarii na ˈna, e te rahi o te teiaha i tuuhia e ana i nia ia ratou, e te paturaa i te fare o te Atua, inaha, ua oti i te papaihia i roto i te parau a te mau arii o Iuda. Monohia aˈera oia i te hau e te tamaiti ra e Amazia.