Paraleipomeno 2
O IEHORAMA I TE TAPARAHIRAA I TO ˈNA RA MAU TAEAE.
21 Taoto ihora Iehosaphata i ǒ to ˈna ra mau metua, e tanuhia ihora i ǒ to ˈna mau metua i te oire o Davida, e monohia aˈera oia i te hau i te tamaiti ra ia Iehorama. 2 E taeae anaˈe hoi to ˈna, te mau tamarii a Iehosaphata, o Azaria, e o Mikaela, e o Sephatia, e o Iehiela, e o Zekaria, e o Azaria: e mau tamarii anaˈe ïa na te arii o Iseraela no Iehosaphata. 3 E taoˈa rahi ta to ratou metua i horoa mai no ratou, i te ario, e te auro, e te taoˈa maitatai, e te mau oire i faaetaetahia i Iuda ra: area te basileia, ua horoa oia i te reira ia Iehorama: no te mea e matahiapo oia. 4 E noaa aˈera ia Iehorama te basileia o to ˈna ra metua, itoito ihora oia, pau roa aˈera tana mau taeae i te taparahihia e ana i te ˈoˈe, e te hoê mau raatira atoa i Iuda ra.
5 Tei te toru ahuru ma piti to Iehorama matahiti i arii ai oia, e vau hoˈi o ˈna matahiti i te ariiraa i Ierusalema. 6 E ua haapao atura oia i te parau a te mau arii o Iseraela, e mai to te utuafare o Ahaba, o te tamahine a Ahaba hoi ta ˈna vahine. Hamani ino noa ra oia i te aro o Iehova. 7 Aita Iehova i rave i te utuafare o Davida ia pau, no te faufaa i faaauhia e ana ia Davida, e no te mea ua parau mai â oia e horoa mai â oia i te tahi mori na ˈna, e na ta ˈna mau tamarii atoa e a muri noa ˈtu.
8 Tei to ˈna ra anotau to te ati Edoma taivaraa, aore aˈera i auraro ia Iuda, e ua faaarii i te hoê arii no ratou iho. 9 Ua haere ihora Iehorama e te hui raatira, e te mau pereoo atoa; i te rui te haereraa, e pau ihora te ati Edoma i haaati mai ia ˈna, e te mau raatira o te mau pereoo ra. 10 E haere ê râ te ati Edoma i te rima o te arii o Iuda, e tae roa aˈenei i teie nei mahana. E ua faarue atoa maira hoi Libena i te rima no ˈna i taua anotau ra; no te mea, ua faarue oia i te Atua o to ˈna ra mau metua ia Iehova. 11 Ua hamani ihora hoi oia i te vahi teitei anaˈe i te mau mouˈa i Iuda ra, na ˈna i faariro i to Ierusalema ei faaturi, e ua faahepo atoa hoi i to Iuda.
12 Ua tae maira te hoê leta ia ˈna na Elia peropheta, na ô maira, Te na ô maira te Atua o to tupuna ra o Davida, o Iehova, No te mea aita aˈenei oe i haapao i te eˈa o to metua o Iehosaphata, e te eˈa o te arii o Iuda a Asa, 13 ua haapao râ oe i te eˈa o te mau arii o Iseraela, e ua faariro ia Iuda e to Ierusalema atoa ei faaturi, mai te faaturi o te utuafare atoa o Ahaba, e ua taparahi hoi i to mau taeae no te utuafare o to metua ra, tei huru maitai aˈe ia oe ra: 14 inaha, e pohe rahi ta Iehova e tuu i nia i to mau taata nei, e to mau tamarii, e to mau vahine, e to mau taoˈa atoa ra: 15 e roohia oe e te maˈi rahi roa, e maˈihia to opu; e rave rahi aˈera te mahana e mairi ai to aau i rapae, i te rahi o taua maˈi ra.
16 Ua faaaraara aˈera hoi Iehova i te aau o te Philiseti e rave ia Iehorama, e to Arabia atoa hoi, i pihaiiho i to Kusa. 17 Ua haere anaˈe maira ratou o Iuda, e ua haaparari haere, e hopoi ê atura, te mau mea atoa i te fare o te arii ra, e te mau tamarii na ˈna, e te mau vahine atoa; e aore aˈera e tamaiti toe na ˈna, maori râ te tamaiti hopea roa o Ahazia.
18 E i muri atoa ˈˈe i te reira tairihia maira oia e Iehova i te maˈi ora ore i roto i tana aau. 19 E maoro aˈera, hope aˈera na matahiti e piti, ua mairi ihora tana aau i rapae, i te rahi o taua maˈi ra; pohe atura oia i te maˈi iino ra. Aore to ˈna mau taata i tutui i te auahi ia ˈna, mai ta te mau metua no ˈna ra. 20 Ua tae oia i te toru ahuru e ma piti o to ˈna matahiti i arii ai oia, e vau aˈera hoi o ˈna matahiti i te ariiraa i Ierusalema. I pohe hoi oia ma te oto-ore-hia, ua tanu râ ratou ia ˈna i roto i te oire o Davida, aita râ i tuuhia i roto i te menema o te hui arii ra.