Paraleipomeno 2
TE ARII RA O AHAZA I TE TAPARAHIRAA E IEHU RA.
22 Faaariihia aˈera tana tamaiti hopea ra o Ahazia e to Ierusalema, ei mono mai i tana metua, no te mea o taua pǔpǔ taata i haere atoa ratou atoa e to Arabia i puhapa ra, ua taparahi ïa i te mau tamarii paari. Arii aˈera Ahazia a Iorama te arii no Iuda.
2 E piti taau ma piti o Ahazia matahiti i arii ai oia, hoê hoi o ˈna matahiti i te ariiraa i Ierusalema. O Atalia te iˈoa o to ˈna metua vahine, e mootua no Omeri. 3 Ua haapao atoa ˈtura hoi oia i te eˈa o te utuafare o Ahaba: o tana metua vahine hoi te aˈo ia ˈna i te parau ino ra. 4 I rave ai oia i te parau ino i te aro o Iehova, mai te utuafare atoa o Ahaba ra; o ratou hoi tei aˈo ia ˈna ia pohe tana metua, e pohe atura oia iho. 5 Haapao atura hoi oia i ta ratou i aˈo maira, e ua pee atura ia Iorama a Ahaba, arii o Iseraela, e tamaˈi i te arii o Arama ia Hazaela, i Ramota-gileada: pohe ihora Iorama i to Arama. 6 E ua hoˈi ihora oia i Iezereela ia faaorahia to ˈna maˈi i puta ˈi oia i to Arama i Rama, a tamaˈi ai oia i te arii o Arama ia Hazaela ra. Ua haere ihora Ahazia a Iehorama, arii no Iuda, e hiˈo ia Iorama a Ahaba, i Iezereela, no te mea, ua maˈihia oia. 7 O to Ahazia ïa pohe i haapaohia e te Atua, oia i haere e hiˈo ia Iorama; tae atura hoi oia, ua haere atoa ihora oia e Iorama atoa e rave ia Iehu a Nimesi, tei haapaohia e Iehova ia pau te utuafare o Ahaba ia ˈna. 8 E te rave ra Iehu e tahoo i te utuafare o Ahaba; e itea ihora te hui arii o Iuda, e te mau tamarii a te mau taeae o Ahazia, o tei tauturu ia Ahazia, ua taparahi ihora ia ratou. 9 E ua imi oia ia Ahazia: e noaa ihora oia, (ua faatapunihia hoi oia i roto i Samaria,) ua aratai maira ia ˈna ia Iehu: e pohe atura oia i te taparahihia, ua tanu atura ratou: ua na ô aˈera ratou, No te mea, e mootua oia na Iehosaphata o tei imi ia Iehova ma te aau atoa ra. E ore hoi te utuafare o Ahazia e tia ia tapea i taua basileia ra.
10 Ite aˈera hoi Atalia te metua vahine o Ahazia ra, e ua pohe ta ˈna tamaiti, ua tia aˈera oia e ua rave pohe roa i te huaai arii o te utuafare o Iuda. 11 Ua rave aˈera râ Iehosabeata, te tamahine a te arii, ia Ioasa, a Ahazia, (i eiâhia e ana na roto i te mau tamarii a te arii i taparahihia ra,) e ua tuu ia ˈna e te hii atoa no ˈna i roto i te hoê piha taotohia no te hiero ra. I na reira oia o Iehosabeata, e tamahine na te arii ra na Iorama e vahine hoi na Iehoiada tahuˈa ra, e tuahine hoi oia no Ahazia, i te hunaraa ia ˈna ia Atalia, aita aˈera oia i taparahi ia ˈna. 12 E ono o ˈna matahiti i te hunaraahia e ratou i roto i te fare o te Atua: riro atura te hau ia Atalia i taua fenua ra.