Paraleipomeno 2

TE PURE A IEHOSAPHATA I TE HAAATIRAAHIA E TE NUU RA.

20 E i muri aˈe hoi i te reira, ua haere maira te tamarii a Moabi, e e tamarii a Amona, e te tahi pae ati Edoma atoa ra, e rave ia Iehosaphata e tamaˈi. 2 Ua haere maira te tahi mau taata, ua faaite maira ia Iehosaphata, na ô maira, E feia rahi tera te tii maira ia oe, mai te tahi pae moana mai, mai Edoma; e inaha, tei Hazazona-tamara ratou, oia Ene-gedi. 3 Ua mǎtaˈu ihora Iehosaphata, e ua faanahonaho ihora e imi ia Iehova, e ua poro haere i te mahana haapaeraa e ati noa ˈˈe Iuda atoa ra. 4 Ua haaputuputu maira Iuda e ani ia Iehova ia turuhia mai; mai roto mai i te mau oire atoa o Iuda to ratou haerea mai e imi ia Iehova.

5 Ua tia maira Iehosaphata i roto i te amuiraa o Iuda e Ierusalema, i roto i te fare o Iehova, i mua i te aumoa apî ra, 6 E ua na ô atura, E te Atua o to matou mau metua e, e Iehova e, e ere anei oe i te Atua i nia i te raˈi, e tei ia oe te parau i te mau basileia atoa o te ao nei? e ere anei tei to rima te mana e te puai, e aore roa e taata e tia ia patoi atu ia oe? 7 E ere anei o oe, e to matou Atua, i puehu ai te taata o teie nei fenua i mua i te aro o to mau taata ia Iseraela, e ua horoa mai oe na te huaai o to hoa ra o Aberahama, e a muri noa ˈtu? 8 E ua parahi ratou i reira, e ua faatia i te vahi moˈa i reira no to oe ra iˈoa, ua parau e, 9 Ia roohia mai matou e te ino ra, mai te pau ra, e mai te maˈi, e mai te oˈe, ia tia matou i mua i teie nei fare, i mua i to oe aro, (ua mairihia hoi teie nei fare i te iˈoa no oe ra,) e ia tiaoro atu matou ia oe i to matou ra pohe, e faaroo mai oe i reira, e e tauturu mai. 10 E teie nei, inaha, te mau tamarii a Amona, e o Moabi, e te mouˈa ra o Seira, o tei ore i tiahia mai e oe ia rave Iseraela, ia ratou i haere mai mai Aiphiti maira; fariu ê maira hoi ratou, e aita i taparahihia ˈtu; 11 e inaha, te hamani ino maira ratou ia matou nei, te tii maira ia matou ia hee atu matou i te tufaa na oe nei, ta oe i ho mai ia matou nei ei parahiraa. 12 Eita anei oe e faahapa ia ratou, e to matou Atua? aita hoi o matou nei e puai ia rave atu i teie nei feia rahi e tii mai e rave ia matou nei; aita hoi matou i ite i te ravea ia rave: tei ia oe râ to matou mata. 13 Te tia noa ra Iuda atoa i mua ia Iehova, e ta ratou mau tamarii rii, e ta ratou mau vahine, e ta ratou mau tamarii atoa.

14 Ua haere maira te Varua o Iehova i nia ia Iahaziela a Zekaria, a Benaia, a Ieiela, a Matania, e ati Levi, no te mau tamarii a Asapha, i ropu i te amuiraa atoa ra; e ua na ô maira, 15 A faaroo mai na, e Iuda atoa ra, e outou atoa to Ierusalema, e o oe hoi, e te arii, e Iehosaphata, te na ô maira Iehova ia outou, Eiaha outou e mǎtaˈu, eiaha e hitimaue i teie nei feia rahi; e ere i ta outou teie nei aroraa, na te Atua râ. 16 Ananahi outou e haere ai i raro e rave ia ratou; inaha, te na nia maira ratou i te maa mato ra o Ziza; e roohia ˈtu e outou tei te hopea mai o te pape ra, i te pae i te medebara ra o Ieruela. 17 E ore outou e aro i tena na, e haamau outou, e tia noa mai, e hiˈo i te ora na Iehova e horoa mai na outou. E Iuda e Ierusalema atoa, eiaha e mǎtaˈu, eiaha e taiâ; ananahi a tii a rave ia ratou: tei ia outou hoi Iehova. 18 Ua piˈo ihora te upoo o Iehosaphata i raro te mata i te repo; ua tipapa maira to Iuda e to Ierusalema atoa i raro i te repo i te aro o Iehova, e ma te haamori atoa ia ˈna. 19 E te mau ati Levi, no te mau tamarii a Kohata, e no te mau tamarii a Kora, ua tia maira e himene, ma te reo rahi teitei, i te Atua no Iseraela ia Iehova.

20 Ua tia aˈera ratou i te poipoi roa, haere atura i te medebara ia Tekoa; te haere noa ra ratou, ua tia noa maira Iehosaphata, na ô maira, A faaroo mai na, e Iuda, e to Ierusalema atoa; e tiaturi i to outou Atua ia Iehova, e ore ïa outou e aueue, e faaroo i te mau peropheta na ˈna, e maitai ïa outou. 21 E oti aˈera ta ˈna paraparauraa i te mau taata, ua faataa ˈtura i te feia himene ia Iehova, ei haamaitai ia ˈna ma te moˈa e te maitai, a na mua ˈi ratou i taua nuu ra i te haere, a na ô ai e, E haamaitai ia Iehova, e tia hoi to ˈna aroha i te vai-maite-raa.

22 E tei te haamataraa ratou i taua himene ra, ia haamaitai ia Iehova, ua tuu aˈera Iehova i te taoto i te mau tamarii a Amona e ia Moabi, e to te mouˈa ra to Seira tei haapaohia ei rave ia Iuda, ei rave e pau ihora ratou. 23 Ua rave atura te mau tamarii a Amona e Moabi, i to te mouˈa ra to Seira, e taparahi e ia pau roa ratou; e pau aˈera to te mouˈa ra to Seira, ua tahutu noa ˈtura i te taparahiraa ia ratou iho. 24 E tae atura Iuda i te pare tiairaa i te medebara, ua hiˈo atura ratou i taua feia rahi ra, e inaha, te vai noa ra ratou i nia i te fenua, ua pohe roa; aita roa i ora. 25 E ia haere Iehosaphata e te mau taata atoa no ˈna e rave i te taoˈa ra, e roohia ˈtura e ratou i nia i te tino taata pohe, e taoˈa rahi roa, e te mau mea maitai, o tei taratarahia ïa e ratou, e aore aˈera e manaa, a toru aˈera o ratou mahana i te raveraa i te taoˈa, i te rahi. 26 E tae aˈera i te rui maha, ua haaputuputu ihora i te peho ra o Beraka; i reira hoi ratou i te haamaitairaa ia Iehova: i mairihia ˈi taua vahi ra, o te peho ra o Beraka, e tae roa aˈenei i teie nei mahana.

27 Ua hoˈi anaˈe maira to Iuda e to Ierusalema, o Iehosaphata atoa i na mua ia ratou, i Ierusalema ma te oaoa; ua horoa mai hoi Iehova i te oaoa ia ratou i to ratou mau enemi. 28 Ua haere anaˈe maira hoi ratou ma te nabala, e te kinura, e te pu, i Ierusalema i roto i te fare o Iehova. 29 Roohia ihora te mau basileia atoa e ati noa ˈˈe i te mǎtaˈu i te Atua, i te iteraa ratou e ua ravehia e Iehova te mau enemi o Iseraela. 30 Hau ihora to te fenua o Iehosaphata; ua horoa mai hoi to ˈna Atua i te hau no ˈna e ati noa ˈˈe.

31 Hau ihora to Iehosaphata i nia ia Iuda: ua tae oia i te toru ahuru ma pae o tana matahiti i arii ai oia, e hoê taau ma pae o ˈna matahiti i te ariiraa i Ierusalema. O Azuba te iˈoa o tana metua vahine, e tamahine na Silehi. 32 E ua haapao atura oia i te parau a tana metua a Asa, aore i ohipa ê, i te raveraa i te mea tia i te aro o Iehova. 33 Aita râ te mau vahi teitei i hope i te hopoi-ê-hia: aita hoi te mau taata i faaau maitai i to ratou aau i te Atua o to ratou mau metua ra. 34 E te toea o te parau a Iehosaphata, te matamehai e te hopea, inaha, ua oti i te papaihia i roto i te parau a Iehu a Hanani ra, o tei papaihia i roto i te parau a te mau arii o Iseraela.

35 E i muri aˈe i te reira, ua taati atura te arii o Iuda o Iehosaphata, i te arii o Iseraela ia Ahazia, na ˈna te parau ino rahi ra. 36 I amui oia ia ˈna e tarai i te pahi e fano i Taresisa; ua tarai ihora ratou i te pahi i Ezioni-gabera. 37 Ua tohu ihora Eliezera o Dodava i Marase ia Iehosaphata, na ô aˈera, no te mea ua taati oe ia Ahazia, ua parari ta oe ohipa ia Iehova. Parari atura te mau pahi, aita ˈtura i tae i Taresisa.