Paraleipomeno 2
IEHOSAPHATA I AˈOHIA E IEHU, HAERE ATURA E HIˈO I TO ˈNA FENUA.
19 Te hoˈi ra te arii o Iuda o Iehosaphata i te utuafare i Ierusalema ma te ora. 2 Ua haere maira Iehu, te tamaiti a Hanani hiˈo ra, e farerei ia ˈna, e ua parau maira i taua arii ra ia Iehosaphata, E tauturu â oe i te feia paieti ore, e au â oe i tei ore i au mai ia Iehova? i au ai te riri o Iehova ia oe i te reira. 3 Te vai ra râ te parau maitai i roto ia oe ra, o oe i hopoi ê i te mau vahi uru raau i teie nei fenua, e ua tano maite hoi to oe aau i te imi i te Atua.
4 E maoro aˈera to Iehosaphata parahiraa i Ierusalema, ua haere faahou oia na roto i te mau taata, mai Bere-seba e tae noa ˈtura i te mouˈa ra o Epheraima, e ua faahoˈi mai ia ratou i te Atua o to ratou mau metua ia Iehova ra. 5 E ua haapao atura oia i te feia haava i te fenua ra; i te mau oire i faaetaetahia i Iuda ra, i te mau oire atoa ra. 6 Ua parau atura oia i taua mau haava ra, E ara i ta outou e rave na; e ere na te taata ta outou e haava na, na Iehova râ, tei pihaiiho hoi oia ia outou ia haava ra. 7 E tena na, ia vai â te mǎtaˈu ia Iehova i nia ia outou, e ara, ei parau tia; aita hoi e vahi hapa i to tatou Atua ia Iehova, aore e haapaoraa i te huru o te taata, aore e raveraa tarahu.
8 Ua haapao atura hoi Iehosaphata i te tahi pae ati Levi i Ierusalema, e te tahi pae tahuˈa, e te tahi pae i te feia matahiapo o Iseraela, ei haava i te parau ia Iehova ra, e te parau i mârôhia, i to ratou hoˈiraa mai i Ierusalema ra. 9 E ua aˈo atura oia ia ratou, na ô atura, E rave outou ma te mǎtaˈu ia Iehova, e ma te aau parau tia e te haavare ore, a na reira ˈi outou: 10 ia hopoihia mai te parau a to outou mau taeae tei parahi i roto i to ratou mau oire; i te toto e te toto, e te parau e te ture ra: te haapaoraa, e te parau faaauhia ra; e haapii outou ia ratou ia ore ia hara ia Iehova ra, o te tae mai hoi te riri i nia ia outou e i nia atoa i to outou mau taeae; e na reira outou ia ore outou ia roohia e te hara. 11 E inaha, o Amaria te tahuˈa rahi, tei nia ïa ia outou i te mau parau atoa a Iehova; e o Zebadia a Isemaela, te tavana i te utuafare o Iuda, ei te mau parau ïa a te arii ra: ei feia toroa hoi te mau ati Levi i mua ia outou. E faaitoito i te rave e na Iehova e au mai i te feia haapao maitai.