Paraleipomeno 2

TE AMUIRAA O IEHOSAPHATA E AHABA I TE TAMAˈI.

18 E taoˈa rahi e te tura rahi to Iehosaphata, e ua taati atura oia ia Ahaba. 2 E hope aˈera e fanu matahiti ra, haere atura oia i Samaria ia Ahaba ra. E rave rahi ta Ahaba mamoe e te puaatoro i te tiapai na ˈna, e na te mau taata i pee mai ia ˈna ra, e ua taparu maira ia ˈna ia tae atoa i Ramota-gileada. 3 Ua parau maira te arii o Iseraela ra o Ahaba, i te arii o Iuda ia Iehosaphata, E tae atoa anei oe i Ramota-gileada? Ua parau atura oia, Tei to oe hinaaro, ei reira atoa vau; tei to oe ra mau taata, ei reira atoa to ˈu; ei te tamaˈi ra, ei reira atoa tatou.

4 Ua parau atura Iehosaphata i te arii o Iseraela, a ui na oe i ta Iehova parau i teie nei mahana. 5 Ua haaputuputu maira te arii o Iseraela i te mau peropheta e maha atoa hanere i te taata, e ua parau atura ia ratou, E haere anei tatou i Ramota-gileada i te tamaˈi, e eiaha anei? Ua parau maira ratou, A haere, na te Atua hoi e tuu mai i te rima o te arii. 6 Ua parau atura râ Iehosaphata, Aita ˈtu a Iehova peropheta toe i ǒ nei ia ui â tatou i reira? 7 Ua parau maira te arii o Iseraela ia Iehosaphata, Hoê nei taata toe, ia ui tatou ia Iehova: e vahia râ ïa no ˈu; e ore roa hoi e parau maitai mai ia ˈu nei, o te parau ino anaˈe ra: o Mikaia a Imela. Ua parau atura Iehosaphata, Eiaha te arii e na reira mai. 8 Ua parau atura te arii o Iseraela i te hoê taata toroa i o ˈna ra, e ua parau atura, Aratai etaeta mai ia Mikaia a Imela ra. 9 Te parahi maira te arii o Iseraela, e te arii o Iuda o Iehosaphata, i nia i to raua pue terono ra, ma te ahu atoa i te ahuraa, tei te hoê vahi atea i te tomoraa mai i te uputa i Samaria ra, e te tohu anaˈe ra te mau peropheta i mua ia raua. 10 E pue tara auri hoi tei hamanihia e Zedekia a Kenaana, e ua na ô maira, Te parau maira Iehova, E tui oe ia Arama i teie, e pau atu ratou. 11 E ua na reira atoa mai te mau peropheta, na ô maira, A haere i Ramota-gileada, e ia ora ˈtu: na Iehova hoi e tuu mai i te rima o te arii. 12 Ua parau atura te vea i tii ia Mikaia, na ô atura Inaha, te parau a te mau peropheta aˈera, e parau maitai anaˈe ïa i te arii, hoê â parau; ia faito atoa na hoi ta oe parau i ta ratou, ei parau maitai â. 13 Ua parau maira Mikaia, Te ora ra Iehova, o ta tau Atua e parau mai ia ˈu ra, o ta ˈu ïa e parau. 14 E tae maira oia i te arii ra, ua parau atura te arii ia ˈna, E Mikaia, e haere anei tatou i Ramota-gileada i te tamaˈi, e eiaha anei? Ua parau maira oia, A haere outou, e ia ora ˈtu, e tuuhia mai ïa ratou i to outou rima. 15 Ua parau atura te arii ia ˈna; Taihia a ˈu faatǎpǔraa ˈtu ia oe, e ei parau mau â ta oe e parau mai ia ˈu i te iˈoa o Iehova? 16 Ua parau maira oia, Hiˈo atura vau ia Iseraela atoa, ua puehu i nia i te mouˈa mai te mamoe aore e tiai: ua parau maira Iehova, Aita a ratou nei e fatu; e hoˈi anaˈe te taata atoa i te utuafare mau ma te hau. 17 Ua parau atura te arii o Iseraela ia Iehosaphata, E ere au tei parau atu ia oe e, e ore oia e parau mai i te parau maitai ia ˈu, o te ino anaˈe ra? 18 Ua parau faahou maira oia, E faaroo mai na oe i te parau a Iehova; ite aˈera vau ia Iehova i te parahiraa i nia i to ˈna terono, e te nuu atoa o te raˈi i te tiaraa i tana rima atau, e tana rima aui, 19 ua ui atura Iehova, Na vai e haavare atu i te arii o Iseraela ia Ahaba, ia haere oia e ia pohe i Ramota-gileada? Ua parau maira te tahi i ta ˈna, ua parau maira hoi te tahi i ta ˈna. 20 Ua haere maira te hoê varua ua tia maira i mua ia Iehova, e ua na ô maira, Na ˈu e haavare atu. Ua parau atura Iehova ia ˈna, E nahea? 21 Ua parau maira oia, E haere au ei varua haavare i roto i te vaha o te mau peropheta atoa na ˈna. Ua parau atura Iehova, Na oe â e tii e haavare, e e tupu â ta oe: a haere, a na reira. 22 E teie nei, inaha, ua tuu mai Iehova i te varua haavare i roto i te vaha o te mau peropheta na oe nei; ua parau mai hoi Iehova i te parau ino ia oe na. 23 Ua haere ihora Zedekia a Kenaana i pihaiiho, ua moto atura ia Mikaia i te mata, e ua na ô atura, I nahea iho nei te Varua o Iehova i te faarueraa ia ˈu e i parau atu ai ia oe? 24 Ua parau maira oia, Inaha, e ite oe ia tae i te mahana e haere ai oe i roto i te hoê piha i roto ra a pupuni ai. 25 Ua parau maira te arii o Iseraela, A rave outou ia Mikaia e hopoi ia Amona, i te tavana o te oire, e ia Ioasa, i te tamaiti a te arii; 26 a parau atu ai, Te parau maira te arii, E tuu i tera ra taata i roto i te tapearaa, a faaamu atu ai i te maa eita e ora rea ra, e i te pape eita e ora rea ra, e ia hoˈi mai au ma te hau. 27 Ua parau atura Mikaia ra, Ia hoˈi mai oe ma te hau, e ere maori i ta Iehova ta ˈu e parau nei. E ua na ô atura oia, E faaroo mai, e te taata atoa ra.

28 Ua reva ˈtura te arii o Iseraela, e o Iehosaphata te arii o Iuda, i Ramota-gileada. 29 Ua parau maira te arii o Iseraela ia Iehosaphata, E faahuru ê au ia ˈu, a haere ai i te aroraa ra; e ahu râ oe i to oe na ahu mau. Ua faahuru ê atura te arii o Iseraela; e ua haere atura raua i te aroraa. 30 Ua oti hoi te mau raatira o te mau pereoo e tia i pihaiiho ia ˈna ra, i te aˈohia e te arii o Arama ua na ôhia, Eiaha outou e aro noa ˈtu i te taata rii e te taata rahi, maori râ i te arii o Iseraela anaˈe ra. 31 E ite aˈera te mau raatira o te mau pereoo ra ia Iehosaphata, ua na ô aˈera ratou, Teie te arii o Iseraela. Ua fariu aˈera e rave ia ˈna; ua pii atura râ Iehosaphata, e ua turu mai Iehova ia ˈna; e faafariu-ê-hia aˈera ratou e te Atua. 32 E ite aˈera te mau raatira o te mau pereoo ra, e ere i te arii o Iseraela, ua fariu ê maira ratou, aita aˈera i auau atu. 33 Na te hoê taata râ i faafifi noa i te fana, e puta ihora te arii o Iseraela i ropu i te tiaatiraa i te paruru ra; i parau atu ai oia i te faahoro pereoo no ˈna ra, A fariu ê atu oe e hopoi ia ˈu i rapae; ua puta vau. 34 Tupu atura râ te tamaˈi i taua mahana ra; e ua turuhia te arii o Iseraela i taua mahana ra i roto i tana pereoo e rave i to Arama e ahiahi noa ˈtura: e tei te mairiraa o te mahana ra, pohe ihora oia.