Paraleipomeno 2
TE HAAMATARAA I TE HAU O IEHOSAPHATA RA.
17 Monohia aˈera oia i te hau i te tamaiti ia Iehosaphata, e ua faaetaeta ihora ia ˈna iho e rave ia Iseraela. 2 Ua tuu ihora oia i te feia aito i roto i te mau oire i faaetaetahia i Iuda ra, e ua haapao hoi i te feia tiai i taua fenua ra o Iuda, e te mau oire atoa i Epheraima, i tei noaa i tana metua ia Asa ra. 3 Ite maira Iehova ia Iehosaphata, no te mea, ua haapao oia i te haerea matamua o tana ra metua e o Davida, e aore i imi ia Baala; 4 imi atura râ i te Atua o tana metua, e ua haapao i ta ˈna parau, aore i rave i to Iseraela. 5 Ua haapapu maira Iehova i te mana ia ˈna; e ua hopoi mai to Iuda atoa ra i te taoˈa na Iehosaphata; e taoˈa rahi roa ta ˈna e ua faatura-roa-hia. 6 Itoito aˈera tana aau i te mau parau a Iehova: e ua hopoi-ê-hia e ana te mau vahi teitei e te mau uru raau i Iuda ra.
7 E tae aˈera i te toru o te matahiti o to ˈna ra hau, ua tono aˈera oia i te feia rarahi i o ˈna ra, o Bene-haila, e o Obadia, e o Zakaria, e o Netaneela, e o Mikaia, ei haapii i te mau oire o Iuda, 8 o ratou e te ati Levi i te haere-atoa-raa, o Semaia, e o Netania, e o Zebadia, e o Asahela, e o Semiramota, e o Iehonatana, e o Adonia, e o Tobia, e o Toba-adonia, e na tahuˈa atoa toopiti o Elisama, e o Iehorama i te haere-atoa-raa. 9 E ma te buka ture a Iehova ta ratou i te hopoi-atoa-raa, e ua haapii atura ratou i Iuda; e ua haere noa ihora ratou na roto i te mau oire atoa i Iuda, e ua haapii i te taata.
10 Roohia ihora te mau basileia e te mau fenua atoa e ati noa ˈˈe Iuda i te mǎtaˈu ia Iehova, e aore aˈera ratou i tamaˈi mai ia Iehosaphata. 11 Ua hopoi maira te tahi pae Philiseti i te taoˈa ia Iehosaphata, e te ario aufau; e ua hopoi maira to Arabia i te nǎnǎ puaa, e hitu tausani e hitu hanere i te mamoe oni, e hitu hoi tausani e hitu hanere i te puaaniho oni.
12 Tupu atura Iehosaphata i te rahi, e ua patu oia i te mau pare e te mau oire vairaa taoˈa i Iuda ra. 13 E ohipa rahi hoi ta ˈna i te mau oire i Iuda ra: area te feia tamaˈi e feia aito ïa, tei Ierusalema ïa. 14 Teie hoi to ratou huru ia taio, i to ratou mau utuafare metua: to te mau raatira no nia i te mau tausani o Iuda ra, o Adana te taata rahi; e toru hoi hanere i te tausaniraa i te feia aito i te amui-atoa-raa ia ˈna. 15 E te raatira i muri aˈe ia ˈna ra, o Iehohanana ïa; e na taata atoa e piti hanere e vau ahuru i te tausani. 16 E muri aˈe ia ˈna, o Amasia ïa a Zikeri, o tei horoa hua ia ˈna iho ei taata no Iehova, e na taata hoi e piti hanere i te tausaniraa i te feia aito anaˈe. 17 E to Beniamina, o Eliada ïa, e taata mǎtaˈu ore, e te amui-atoa-raa mai ia ˈna na taata e piti hanereraa i te tausani, ma te fana e te paruru. 18 E muri aˈe ia ˈna ra, o Iehozabada ïa, e te amuiraa mai ia ˈna, hoê hanere e vau ahuru i te tausani, o te feia haapii-maite-hia i te tamaˈi. 19 E tia teie nei feia i pihaiiho i te arii, te taa ˈtura tei tuuhia e te arii i roto i te mau oire i faaetaetahia ra e ati noa ˈˈe Iuda atoa ra.