Paraleipomeno 2
TO ASA TIATURIRAA IA BENEHADA, TE AˈO A HANANI IA ˈNA.
16 E tae aˈera i te matahiti e toru ahuru ma ono o te hau o Asa, ua haere maira te arii o Iseraela o Baasa e rave ia Iuda, e ua patu ihora ia Rama, ia ore roa te taata ia tae i te arii o Iuda ia Asa ra. 2 Ua rave maira Asa i te ario e te auro no roto i te pueraa i roto i te fare o Iehova, e no roto i te fare o te arii, e ua hapono atura ia Benehada, i te arii o Arama i parahi i Damaseko ra, na ô atura, 3 E parau faaau ta tâua, mai te parau a to metua tane e to ˈu ra metua tane: inaha, tera mai te ario e te auro na oe: e haere mai e faaore i te faufaa na oe i te arii o Iseraela ia Baasa, ia haere ê oia ra. 4 Ua faaroo maira Benehada i taua arii ra ia Asa, e ua tono maira i te feia raatira o te nuu na ˈna e rave i te mau oire o Iseraela; e pau ihora Iona, e o Dana, e o Abela-maima, e te mau oire vairaa maa i Naphatali. 5 E ite aˈera Baasa i te reira, ore aˈera e patu i Rama, faaoti aˈera i ta ˈna ohipa. 6 Ua aratai atura taua arii ra o Asa ia Iuda atoa ra; e ua rave mai ratou i te mau ofai i Rama ra, e te raau, i tei patuhia e Baasa ra; e ua rave ihora i te reira, ua patu ihora ia Geba, e ia Mizepe.
7 I reira to Hanani hiˈo ra haereraa mai i te arii ra ia Asa, arii no Iuda, e ua parau maira ia ˈna, No te mea, ua tiaturi oe i te arii o Arama ra, aore i tiaturi i to Atua ra ia Iehova, e teie nei, e ora te nuu o te arii o Arama i to rima na. 8 E ere anei i te nuu rahi to Kusa e to Lubi, e te pereoo i te rahi, e te feia puaahorofenua? no te mea râ, ua tiaturi oe ia Iehova, ua tuu maira oia ia ratou i to rima. 9 Te hiˈo nei te mata o Iehova i to te ao atoa nei, ia horoa mai oia i te etaeta i te feia i tia te aau ia ˈna. E parau maamaa ta oe i tena ra: e teie nei, ei tamaˈi â ta oe. 10 Riri aˈera Asa i taua hiˈo ra, e ua tuu atura i roto i te fare tapearaa; no taua parau nei hoi oia i riri ai ia ˈna. Ua hamani ino maira hoi Asa i te tahi pae i taua mau taata ra.
11 E inaha, te mau parau na Asa, te matamua e tae noa ˈtu i te hopea, inaha, ua papaihia ïa i roto i te buka a te mau arii o Iuda e o Iseraela atoa ra. 12 E tae aˈera i te toru ahuru ma iva o te matahiti i te hau o Asa, ua maˈihia ihora to ˈna avae, e ua tupu atura to ˈna maˈi i nia, aita râ oia i imi ia Iehova i taua maˈi no ˈna ra, tiaturi atura râ i te feia rapaau maˈi ra.
13 Taoto ihora Asa i ǒ to ˈna ra mau metua, pohe atura i te piti taau ma hoê o te matahiti o to ˈna ra hau. 14 Ua tanu ihora ratou ia ˈna i roto i to ˈna iho menema, i hamanihia e ana no ˈna iho i te oire o Davida, ua tuu ihora ratou ia ˈna i nia i te vairaa ra, ua oti i te faaîhia i te raau noˈanoˈa, e te monoˈi putuhia i te peu a te putu ra; e auahi rahi tei ama ia ratou ia ˈna.