Paraleipomeno 1

TE FEIA TIAI UPUTA I TE FAATAA-HAERE-RAAHIA RA.

26 I te tufaraa i te feia tiai uputa ra: to te ati Kora ra, o Meselemia a Kora, na te mau tamarii a Ebiasapha; 2 e ta Meselemia, o Zekaria ïa, te matahiapo; e o Iediaela, te toopiti; e o Zebadia, te tootoru; e o Iateniela, te toomaha; 3 e o Elama, te toopae; e o Iehohanana, te tooono; e o Elioenai, te toohitu. 4 E muri aˈe i te reira, o na tamarii ïa a Obeda-edoma, o Semaia, te matahiapo ïa; e o Iehozabada, te toopiti; e o Ioa, te tootoru; e o Sakara, te toomaha; e o Netaneela, te toopae; 5 e o Amiela, te tooono; e o Isakara, te toohitu; e o Peulatai, te toovau; ua haamaitai mai hoi te Atua ia ˈna. 6 O ta te tamaiti hoi ta Semaia, ua fanau atoa te tamarii na ˈna, o tei mana ïa i to ratou metua; e feia mǎtaˈu ore hoi ratou. 7 Na tamarii a Semaia ra, o Oteni ïa, e o Rephaela, e o Obeda, e o Elezabada, e to ratou pue taeae o Elihu e o Semakia, o na taata aito ïa. 8 O na tamarii ïa a Obeda-edoma: o te reira ta Obeda-edoma, e ta ratou tamarii, e to ratou mau taeae, e ono ahuru e piti tiahapa ma te itoito e te puai i te raveraa i te ohipa. 9 Area o Meselemia e a ˈna pue tamarii e o ˈna pue taeae, hoê roa ïa ahuru i te taata itoito e ma vau.

10 E tamarii atoa ta Hosa, no te mau tamarii a Merari oia, o Simiri to ratou i hau, e ere râ oia i te matahiapo, faarirohia ˈtura e tana metua e ia hau oia; 11 o Hilikia, te toopiti; o Tebalia, te tootoru; o Zekaria, te toomaha: te mau tamarii atoa e te mau taeae atoa o Hosa ra, hoê ïa ahuru e ma toru. 12 No roto i teie nei feia te mau tiai uputa i te tufaraahia, no roto i te mau taata rarahi, ei rave i te ohipa, i to ratou ra mau pǔpǔ, i te fare o Iehova.

13 Ua tuu ihora ratou i te kelero, te taata rii e te feia rarahi, i to ratou mau fare metua, i te mau uputa atoa. 14 Riro maira te kelero no te uputa i te hitia o te râ ra ia Selemia; ua tuu ihora ratou i te kelero no te tamaiti no Zekaria, e taata ite i te parau; riro maira ta ˈna kelero no te uputa i te pae i apatoerau ra. 15 Riro maira te uputa i te pae i apatoa ia Obeda-edoma; e tei tana mau tamarii te mau piha taoˈa i nia ra. 16 Riro maira te uputa i te pae i te tooa o te râ ra ia Suphima e ia Hosa ra, e te uputa faarueraa, i te pae eˈa faateiteihia ra; o tei tiraha mai te tahi piha i te tahi ra. 17 Tooono ati Levi tei faanohohia i te uputa i te pae i te hitia o te râ ra; toomaha hoi tei te pae i apatoerau i te mau mahana atoa; toomaha hoi tei te pae i apatoa i te mau mahana atoa; e tei na piha vairaa taoˈa ra toopiti ïa e toopiti. 18 Tei Parapara i te pae i te tooa o te râ ra, toomaha i te eˈatia ra; toopiti hoi i Parapara ra. 19 O te tufaraa teie i te mau tiai uputa i te mau tamarii a Kora, e te mau tamarii a Merari.

20 E to te ati Levi ra, o Ahia ïa to nia i te mau taoˈa o te fare o te Atua ra, e to nia atoa i te mau taoˈa haamoˈahia ra. 21 O te mau tamarii a Laadana; te mau tamarii a Laadana ati Geresona; te mau matahiapo a Laadana ati Geresona, o Iehieli ïa. 22 E o na tamarii a Iehieli, o Zetama ïa, e tana taeae o Ioela, tei nia ïa i te mau tauhaa o te fare o Iehova; 23 e te tahi pae, ati Amerama, e te ati Izehara, e to Heberona, e te ati Uziela. 24 E o Sebuela a Geresoma, a Mose ra, tei nia ïa i te mau taoˈa. 25 E to ˈna ra mau taeae ia Eliezera; Rehabia, e tamaiti ïa na ˈna, e o Iesaia ta ˈna, e o Iorama ta ˈna, e o Zikeri ta ˈna, e o Selomita ta ˈna. 26 O taua Selomita hoi, e to ˈna ra mau taeae, tei nia ïa i te mau taoˈa i haamoˈahia ra, ta te arii ra ta Davida, e te mau matahiapo, te mau raatira no nia i te mau tausani, e no nia hoi i mau hanere, e te feia rarahi o te nuu, i haamoˈa ra. 27 No roto i te mau taoˈa i noaa i te tamaˈi tei haamoˈahia e ratou, ei taoˈa no te fare o Iehova. 28 E taua hiˈo ra o Samuela, e ta Saula a Kisa, e ta Abinera a Nere, e ta Ioaba a Zeruia i haamoˈa ra; o taua mau taoˈa atoa i haamoˈahia ra tei ia Selomita ïa, e tei to ˈna ra mau taeae.

29 To te ati Izehara, o Kenania ïa, e ta ˈna ra mau tamarii, tei nia ïa ia Iseraela ei feia toroa, e ei haava, i te mau parau a te taata nei. 30 E to Heberona, o Hasabia ïa, e to ˈna mau taeae, e feia aito, hoê tausani, e hitu hanere, e feia toroa ïa i roto ia Iseraela, i te pae i te tooa o te râ i te pape ra o Ioridana, i te mau ohipa atoa a Iehova, e i te ohipa a te arii ra. 31 I to Heberona ra, o Ieria tei hau i roto i to Heberona, i te fanauraa o to ˈna mau metua, a imihia ˈi ratou i te matahiti e piti taau i te hau ia Davida ra, itea ihora i to Iazera, i Gileada, e feia aito anaˈe. 32 Oia e to ˈna ra mau taeae, e piti ïa tausani, e hitu hanere, e aito anaˈe, e feia matahiapo, o tei faarirohia e te arii ra e Davida ei tavana i nia i te ati Reubena, e te ati Gada, e i nia atoa i te opu vaehaa o Manase, no te mau parau atoa a te Atua, e te mau parau atoa a te arii ra.