Paraleipomeno 1

TE MAU RAATIRA O TE NUU RA, E TE FEIA RARAHI RA.

27 I faataahia te tamarii a Iseraela ei pǔpǔ, te feia matahiapo, e te mau raatira o te mau tausani e no te mau hanere, e to ratou feia toroa atoa, tei rave i te ohipa a te arii ra, o tei tufahia ïa ei pǔpǔ; o tei haere mai ma te haapao i te marama, e ua haere i rapae ma te haapao i te marama e hope roa aˈera te mau marama atoa o te matahiti nei: hoê ïa pǔpǔ ra, hoê taau ïa ma maha i te tausani. 2 To nia i te pǔpǔ matamua ra e te marama matamua, o Iasobeama ïa, te tamaiti na Zabadiela, hoê taau ma maha i te tausani i to ˈna ra pǔpǔ. 3 No te mau tamarii a Phereza, o te taata rahi ïa i te mau raatira o te nuu atoa ra no te marama matamua ra: 4 to te pǔpǔ i te piti o te marama ra, o Dodai ïa, e ati Ahohi; e te taata faaitoito i taua pǔpǔ ia ˈna ra i raro aˈe ia ˈna, o Mikilota ïa: hoê raau ma maha i te tausani i to ˈna ra pǔpǔ. 5 E te toru o te raatira o te nuu no te toru o te marama, o Benaia ïa a Iehoiada e tahuˈa rahi; e tei to ˈna ra te pǔpǔ hoê taau ïa ma maha i te tausani. 6 O taua Benaia nei tei hau i na taata e toru ahuru mǎtaˈu ore ra, ua hau â oia i taua toru ahuru ra: tei to ˈna ra hoi pǔpǔ te tamaiti iho a Amizabada. 7 E te maha o te raatira no te maha hoi o te marama, o Asahela ïa, e taeae no Ioaba; e muri aˈe ia ˈna te tamaiti ra o Zebadia; hoê taau hoi e ma maha tiahapa i te tausani i to ˈna ra pǔpǔ. 8 Te pae o te raatira, no te marama e pae ra, o Samahuta ïa ati Izehara: e tei to ˈna ra pǔpǔ hoê ïa taau e maha tiahapa i te tausani. 9 E te ono o te raatira no te marama e ono ra, o Ira ïa a Ikesa, i Tekoa ra; e tei to ˈna ra pǔpǔ hoê ïa taau e maha tiahapa i te tausani. 10 E te hitu o te raatira, no te marama e hitu ra, o Heleza ïa, i Peloni, no te mau tamarii a Epheraima: e tei to ˈna ra pǔpǔ hoê ïa ma maha i te tausani. 11 Te vau o te raatira, no te marama vau ra, o Sibekai ïa, i Husa, e huaai ïa no Zara: e tei to ˈna ra pǔpǔ hoê ïa taau ma maha i te tausani. 12 Te iva o te raatira no te marama iva ra, o Abiezera ïa, i Anatota, e huaai no Beniamina: e tei to ˈna ra pǔpǔ hoê ïa taau ma maha i te tausani. 13 Te ahuru o te raatira no te marama hoê ahuru ra, o Maharai ïa, i Netopha, e huaai o Zara: e tei to ˈna ra pǔpǔ hoê ïa taau ma maha tiahapa i te tausani. 14 Te ahuru ma hoê o te raatira, no te marama hoê ahuru ma hoê ra, o Benaia ïa, i Piratoni, no te huaai o Epheraima: e tei to ˈna ra pǔpǔ hoê taau ïa e maha tiahapa i te tausani. 15 Te ahuru ma piti o te raatira, no te ahuru ma piti o te marama, o Heledai ïa, i Netopha, e huaai no Otaniela: e tei to ˈna ra pǔpǔ hoê ïa taau e maha tiahapa i te tausani.

16 Teie hoi te feia tavana i haapaohia no nia i te mau opu atoa o Iseraela. Te tavana o te ati Reubena ra, o Eliezera ïa a Zikeri: to te ati Simeona ra, o Sephatia ïa a Maaka ra: 17 to te ati Levi ra, o Hasabia a Kemuela ïa: to te ati Aarona ra, o Zadoka ïa: 18 to Iuda ra, o Elihu ïa, te hoê taeae o Davida: to Isakara ra, o Omeri a Mikaela ïa: 19 to zebuluna ra, o Isamaia a Obadia ra: to Naphatali ra, o Ieremota a Azeriela ïa: 20 to te mau tamarii a Epheraima ra, o Hosea ïa a Azazia ra: to te opu vaehaa o Manase ra, i teie pae i Ioridana, o Ioela ïa a Pedaia ra: 21 to te opu vaehaa o Manase i Gileada ra, o Ido ïa a Zakaria ra: to Beniamina ra, o Iaasiela ïa a Abinera ra: 22 to Dana ra, o Azareela ïa a Ierohama ra. O na tavana ïa o te mau opu o Iseraela.

23 Aita râ Davida i taio i to te mau opu i tei ore i tae i te taau hoê o to ˈna ra matahiti, no te mea ua parau mai Iehova e, e faarahi mai oia ia Iseraela mai te fetia i nia i te ra ˈi ra. 24 Tamata ihora hoi Ioaba a Zeruia i te taio, aita râ i faaoti, no te mea, ua roohia ihora Iseraela e te riri o te Atua i te mea ua taiohia; e aita taua taioraa ra i papaihia i roto i te parau a te arii ra a Davida.

25 E te tiai i te taoˈa a te arii ra, o Azamaveta ïa a Adiela: e tei nia i te mau fare vairaa i roto i te ô ra, e i roto i te mau oire, e te mau oire rii, e i roto i te mau pare ra, o Iehonatana ïa a Uzia ra. 26 E to nia i te feia faaapu, o tei utaru i te repo ra, o Ezeri ïa o Keluba. 27 To nia i te mau ô vine ra o Simei ïa, i Rama; area to nia i to te mau ô vine ra, i roto i te vairaa uaina ra, o Zabadi ïa, i Sephama. 28 E to nia i te olive e te mau sukamino i te vahi papu ra, o Baala-hamana ïa, i Gederi: e to nia i te mau vairaa hinu ra, o Ioasa ïa. 29 E to nia i te mau puaatoro i faaamuhia i Sarona, o Sitarai ïa, i Sarona; e to nia i te mau puaatoro i faaamuhia i te mau peho ra o Saphata ra, o te tamaiti ïa a Adelai. 30 To nia i te mau kamela ra, o Obili ïa, e ati Isemaela; e to nia i te asini ra, o Iehedeia ïa, i Meronoti. 31 E to nia i te mau mamoe ra, o Iaziza ïa, i Hageri ra. E feia tavana anaˈe ratou no te taoˈa a te arii ra a Davida. 32 E te taeae o te metua o Davida ra o Ionatana, e taata paari ïa, e aˈo, e e papai parau hoi; e o Iehiela a Hakemoni, tei ia ˈna te tiai i na tamarii a te arii ra. 33 E o Ahitophela o te aˈo ïa, i te arii; e o Husai i Areki, e hoa ïa no te arii. 34 E muri aˈe ia Ahitophela, o Iehoiada a Benaia, e o Abiatara: e te raatira o te nuu a te arii ra, o Ioaba ïa.