Paraleipomeno buka matamua

26 Teie te mau pǔpǔ tiai uputa:+ no te ati Kora, o Meselemia+ te tamaiti a Kore, e huaai no Asapha. 2 E tamaiti ta Meselemia: o Zekaria te matahiapo, Iediaela te piti, Zebadia te toru, Iateniela te maha, 3 Elama te pae, Iehohanana te ono, Elieho-enai te hitu. 4 E tamaiti ta Obeda-edoma: o Semaia te matahiapo, Iehozabada te piti, Ioa te toru, Sakara te maha, Netanela te pae, 5 Amiela te ono, Isakara te hitu e Peulatai te vaˈu. Ua haamaitai hoi te Atua ia Obeda-edoma.

6 E ta ta ˈna tamaiti o Semaia, e tamaiti ta ˈna o tei riro mai ei aratai o to ratou mau opu fetii, e tane puai hoi ratou e te haapao maitai. 7 Na tamaiti a Semaia: o Oteni, Rephaela, Obeda, e Elezabada, e to ˈna na fetii o Elihu raua Semakia, e tane haapao maitai atoa raua. 8 E huaai anaˈe ratou no Obeda-edoma. E tane haapao maitai e tano no tera ohipa ratou, ta ratou mau tamaiti e to ratou mau taeae: 62 huaai no Obeda-edoma. 9 E tamaiti e e taeae to Meselemia:+ 18 tane haapao maitai. 10 E tamaiti ta Hosa, e huaai no Merari. O Simiri te aratai, no te mea noa ˈtu e ere o ˈna te matahiapo, ua maiti to ˈna metua tane ia ˈna ei aratai, 11 o Hilikia te piti, Tebalia te toru, Zekaria te maha. E 13 rahiraa tamaiti e taeae to Hosa.

12 I roto i tera mau pǔpǔ tiai uputa, e hopoia ta te mau aratai, mai to ratou mau taeae, no te tavini i te fare o Iehova. 13 Ua tuuhia te kelero+ no te faataa na vai e tiai te uputa tataitahi ia au i te mau opu fetii, te mea nainai tae noa ˈtu te mea rahi. 14 Riro maira te kelero no te pae hitia o te râ ia Selemia. No Zekaria ta ˈna tamaiti, te hoê taata aˈo maramarama, ua tuuhia te kelero e riro maira ta ˈna kelero i te pae apatoerau. 15 Tei apatoa ta Obeda-edoma, e ua horoahia i ta ˈna mau tamaiti+ te mau fare vairaa maa. 16 Tei tooa o te râ ta Supima raua Hosa,+ i pihai iho i te uputa Saleketa, i pihai iho i te eˈa rahi e haere ra i nia, te tahi pǔpǔ tiai i pihai iho i te tahi pǔpǔ tiai. 17 E ono ati Levi i hitia o te râ, e maha i apatoerau i te mau mahana atoa e e maha i apatoa i te mau mahana atoa. E no te mau fare vairaa maa,+ e piti tiai i pihai iho e piti tiai ê atu. 18 No te anairaa pou i tooa o te râ, e maha i te eˈa rahi+ e e piti i te anairaa pou. 19 Tera te mau pǔpǔ tiai uputa no roto mai i te ati Kora e te ati Merari.

20 No te ati Levi, na Ahia e haapao i te mau vairaa taoˈa o te fare o te Atua mau e te mau piha i vaiihohia ˈi te mau taoˈa i faataahia no te haamoriraa.*+ 21 Te mau tamaiti a Ladana: te mau tamaiti a te ati Geresona no roto ia Ladana, te mau upoo o te mau utuafare no roto ia Ladana ati Geresona, o Iehieli+ 22 e na tamaiti a Iehieli, o Zetama e to ˈna taeae o Ioela. Na ratou i haapao i te mau vairaa taoˈa o te fare o Iehova.+ 23 No roto i te ati Amerama, te ati Izahara, te ati Heberona e te ati Uziela,+ 24 o Sebuela te tamaiti a Geresoma, te tamaiti a Mose. E aratai oia o tei haapao i te mau fare vairaa maa. 25 No to ˈna mau taeae, no roto ia Eliezera,+ te vai ra Rehabia+ ta ˈna tamaiti, Iesaia ta ˈna tamaiti, Iorama ta ˈna tamaiti, Zikeri ta ˈna tamaiti e Selomota ta ˈna tamaiti. 26 Na teie Selomota e to ˈna mau taeae i haapao i te mau piha atoa i vaiihohia ˈi te mau taoˈa i faataahia no te haamoriraa,+ o ta te arii Davida,+ te mau upoo o te mau utuafare,+ te mau raatira tausani e raatira hanere e te mau raatira o te nuu, i haamoˈa. 27 Ua faataa ratou no te haamoriraa hoê tuhaa o te mau mea i haruhia mai i te tamaˈi,+ no te atuaturaa i te fare o Iehova. 28 Te vai atoa ra te mau mea ta Samuela te taata tatara orama,+ ta Saula te tamaiti a Kisa, ta Abinera+ te tamaiti a Nere e ta Ioaba+ te tamaiti a Zeruia,+ i faataa no te haamoriraa. Te mau mea atoa i faataahia no te haamoriraa, ua horoahia ia Selomita* ra e to ˈna mau taeae.

29 No roto i te ati Izahara,+ na Kenania e ta ˈna mau tamaiti i haapao i te ohipa e rave rau e ere no te fare o te Atua.+

30 No roto i te ati Heberona,+ na Hasabia e to ˈna mau taeae, 1 700 tane haapao maitai, i tiaau ia Iseraela i te tuhaa fenua i te pae tooa o te râ o Ioridana. Na ratou i haapao i te mau ohipa atoa no te tuhaa taviniraa ia Iehova e te tuhaa taviniraa i te arii. 31 No roto i te ati Heberona, o Ieriaha+ te upoo o te ati Heberona, ia au i te pǎpǎraa tupuna. I te 40 o te matahiti te faatereraa Davida,+ ua imihia e ua itehia mai i rotopu ia ratou te tane itoito e te puai i Iazera,+ i Gileada. 32 E to ˈna mau taeae, e 2 700 rahiraa ratou. E tane haapao maitai ratou, e upoo o te mau utuafare. Ua tuu ïa te arii Davida ia ratou i nia i te ati Reubena, te ati Gada e te afaraa o te opu o te ati Manase, no te mau ohipa atoa a te Atua mau e te mau ohipa atoa a te arii.