Paraleipomeno 1

TE MAU VEA A DAVIDA I TONOHIA E HAAMAHANAHANA IA HANUNA RA.

19 E muri aˈera i te reira, ua pohe ihora te arii o te mau tamarii a Amona o Nahasa, e monohia aˈera oia i te hau i te tamaiti ra ia Hanuna. 2 Ua na ô aˈera Davida, E hamani maitai au ia Hanuna a Nahasa, no te mea, ua hamani maitai mai tana metua ia ˈu. Ua tono atura Davida i te vea ei haamahanahana ia ˈna i tana metua i pohe ra. E ua tae atura na tavini o Davida i te fenua o te mau tamarii a Amona, e ia Hanuna ra, e haamahanahana ia ˈna ra. 3 Ua parau maira te mau tavana o te mau tamarii a Amona ia Hanuna, Te faatura ra Davida i ta oe hiˈoraa i to metua tane, oia i tono mai i te haamahanahana ia oe ra? e ere anei i te tere hiˈo to to ˈna mau tavini nei, e imi haere hoi, e ia huri-tumu-hia te fenua nei? 4 Ua rave aˈera Hanuna i taua mau tavini o Davida ra, e ua hahu ihora i te taa, e ua tâpû i to ratou ahu tei ropu i te humaha te tâpûraa, e ua tuu atura ia haere na. 5 Ua haere ihora vetahi ua faaite atura ia Davida i te rave i ravehia ˈi taua na taata ra; ua tono maira oia i te taata ia farerei ia ratou; ua rahi roa hoi to ratou haama: ua na ô maira te arii, A parahi i Ieriko na e ia tupu to outou umiumi, a hoˈi mai ai.

6 Te ite ra te mau tamarii a Amona e ua faafaufauhia mai ratou e Davida; ua hapono aˈera Hanuna e te mau tamarii a Amona i na taleni ario hoê tausani, ei tarahu i te pereoo e te feia puaahorofenua i Mesopotamia, e i to Arama-maaka, e i to Zoba. 7 Ua tarahu atura ratou i na taata faahoro puaahorofenua ra e toru ahuru ma piti i te tausani, e te arii o Maaka, e to ˈna ra mau taata, o tei haere mai e ua patia i te puhapa i Medeba. Ua haaputuputu atoa te tamarii o Amona mai roto mai i te mau oire i haere mai i te tamaˈi. 8 E ite aˈera Davida i te reira, ua faaue aˈera oia ia Ioaba, e te nuu taata aito atoa ra. 9 Ua haere maira te mau tamarii a Amona i rapae au; e ua haamau i te aro i mua i te uputa o te oire; area te mau arii tei haere mai ra, tei roto ïa i te ô, ratou anaˈe iho. 10 Ia hiˈo aˈera râ Ioaba e ua mau te aro, i mua e i muri, ua maiti aˈera oia i na taata maitatai i Iseraela, e ua haamau i te aro e rave i to Arama ra. 11 E te toea o te taata ra, ua tuu aˈera ïa i raro aˈe i tana taeae ia Abisai, e na ˈna i haamau ei rave i te mau tamarii a Amona. 12 Ua parau atura oia, I etaeta to Arama ia ˈu, na oe e tauturu mai, i etaeta te tamarii a Amona ia oe, na ˈu oe e tauturu atu. 13 E faaitoito, ia papu te rave i to tatou hoi mau taata, e te mau oire hoi a to tatou Atua: e na Iehova e rave i tei tia ia ˈna ia rave ra. 14 Ua haere ihora Ioaba e te taata atoa e aro i to Arama ra; e ua fati atura ratou na mua ia ˈna. 15 Te hiˈo noa maira te mau tamarii a Amona e te fati ra to Arama, ua fati ihora ratou i mua i te aro o tana taeae o Abisai, e ua tomo atura i roto i te oire. Ua hoˈi maira Ioaba i Ierusalema.

16 Ite aˈera to Arama e ua pau ratou i te aro o Iseraela, ua tono aˈera i te vea e ua aratai maira i to Arama i te tahi pae pape ra; tei raro aˈe ratou ia Sobaka, e raatira no te nuu a Hadarezera. 17 E ia faaitehia Davida i te reira, ua haaputuputu maira oia ia Iseraela atoa ra, e ua haere atura i te tahi pae Ioridana, e tae atura i Helama, e ua haamau ihora ratou i te aro. E mau aˈera ia Davida taua aro ra e rave i to Arama ra, ua aro maira ratou ia ˈna; 18 fati atura râ to Arama i te aro o Iseraela; pau ihora to Arama ia Davida e hitu hanere pereoo, e hitu tausani i te feia puaahorofenua, e maha hoi ahuru i te tausani i te taata haere noa. Pohe atura hoi Sobaka raatira o te nuu ra. 19 Ite aˈera te mau taata o Hadarezera e ua pau ratou i te aro o Iseraela, ua imi aˈera ratou i te hau ia Davida, e ua riro atura ei tavini no ˈna; aita aˈera to Arama i tauturu faahou i te mau tamarii a Amona.