Paraleipomeno 1
TE PHILISETI E TE ATI MOABI I TE PAURAA IA DAVIDA RA.
18 E i muri aˈe i te reira, pau ihora te Philiseti ia Davida, vi atura, riro maira Gata e te mau oire rii i te rima o te Philiseti. 2 E ua tairi ihora oia ia Moabi; riro maira te ati Moabi ei tavini no Davida, e ua aufau maira.
3 Ua tairi ihora Davida i te arii o Zoba o Hadarezera i Hamata, ia ˈna i haere e haamau faahou i to ˈna hau i te pape ra i Eupharate. 4 Pau ihora ia Davida na pereoo hoê tausani, e na taata puaahorofenua ra e hitu tausani, e na taata haere noa hoê taau ïa tausani: e ua tâpû Davida i te uaua avae o te mau puaahorofenua pereoo ra, hoê hanere pereoo i faatoehia. 5 E no te mea, te tauturu maira to Arama i Damaseko i te arii o Zoba ia Hadareza, ua pau ihora to Arama hoê taau e piti tiahapa i te tausani i te taata ia Davida. 6 Ua tuu ihora Davida i te feia tiai i Arama Damaseko; riro maira to Arama ei tavini no Davida, e ua hopoi maira i te taoˈa aufau. Ua ora ihora Davida ia Iehova i te mau haerea atoa no ˈna ra. 7 Ua rave aˈera Davida i te mau paruru auro i nia i te mau tavini o Hadarezera, e ua hopoi maira i Ierusalema. 8 E ua rave maira hoi Davida i te veo rahi no ô no Tebahata, e no Kuna, no na oire o Hadarezera, tei ravehia e Solomona ei farii-vai-veo, e na pou, e te mau farii veo atoa ra.
9 Ite aˈera te arii o Hamata o Tou e ua pau roa te nuu o te arii o Zoba o Hadarezera ia Davida ra. 10 Ua tono maira i te tamaiti ia Hadorama i te arii ra ia Davida, e ui ia ˈna i te oraraa, e aroha hoi ia ˈna, no te mea, ua aro oia ia Hadarezera e ua pau ia ˈna; (te aro ra hoi Hadarezera ia Tou.) Ua hopoi atoa maira hoi oia i te mau farii auro, e te ario, e te veo, e rave rahi. 11 Ua faataahia te reira e te arii e Davida na Iehova, e te mau ario, e te auro i ravehia mai no te mau fenua ěê ra: no Edoma, e no Moabi, e no ǒ i te mau tamarii a Amona, e no ǒ i te Philiseti ra, e no ǒ ia Amaleka.
12 Pau ihora hoi to Edoma ia Abisai a Zeruia i te peho miti ra, hoê ahuru ma vau i te tausani. 13 Ua tuu ihora oia i te feia tiai i Edoma; riro maira to Edoma ei tavini no Davida. Ua ora ihora Davida ia Iehova i to ˈna ra mau haerea atoa.
14 Riro maira te hau ia Davida i nia ia Iseraela atoa ra, e ua rave i te parau tia e te au i to ˈna atoa ra mau taata. 15 E o Ioaba a Zeruia ra tei nia ia i te nuu; e o Iehosaphata a Ahiluda, o te tapao parau ïa; 16 e o Zadoka a Ahituba, e o Abimeleka a Abiatara, o na tahuˈa ïa; e o Savasa te papai parau; 17 e o Benaia a Iehoiada, tei nia ïa i te Kereti e te Peleti; e na tamarii a Davida o tei hau ïa, e tia i pihaiiho i te arii ra.