Paraleipomeno buka matamua
19 I muri aˈe, pohe atura Nahasa te arii o te ati Amona, e riro maira ta ˈna tamaiti ei arii ei mono ia ˈna.+ 2 Na ô atura Davida: “E faaite au i te hamani maitai*+ ia Hanuna te tamaiti a Nahasa, ua faaite hoi to ˈna metua tane i te hamani maitai* ia ˈu.” Tono ihora ïa Davida i te vea no te haere e tamahanahana ia ˈna i te poheraa o to ˈna metua tane. I te taeraa râ ta Davida mau tavini i te fenua o te ati Amona+ no te tamahanahana ia Hanuna, 3 parau ihora te huiarii a te ati Amona ia Hanuna: “Te manaˈo ra anei oe e no te faatura i to oe metua tane i tono mai ai Davida i to ˈna mau taata no te tamahanahana ia oe? E ere anei no te imi haere, e no te haamou ia oe e no te hiˈopoa i teie fenua?” 4 Rave ihora ïa Hanuna i te mau tavini a Davida, hahu ihora ia ratou,+ tâpû ihora i to ratou ahu i te faito o te ohure e tuu ihora ia ratou ia haere. 5 I te faaiteraahia te parau no taua mau tane ra ia Davida, tono ihora oia i te tahi atu mau taata e farerei ia ratou, ua faahaama-roa-hia hoi ratou. Teie te poroi ta te arii i faatae atu: “A faaea i Ieriko+ e ia tupu faahou mai to outou huruhuru taa, i reira outou e hoˈi mai ai.”
6 I muri iho, taa aˈera i te ati Amona e ua riro ratou ei faufauraa na Davida. Tono aˈera ïa Hanuna e te ati Amona i te vea e 1 000 taleni* ario no te tarahu i te pereoo e no te tihepu i te feia faahoro puaahorofenua no Mesopotamia,* Arama-maaka e Zoba.+ 7 Ua tarahu ïa ratou 32 000 pereoo e ua tihepu mai i te arii o Maaka e ta ˈna nuu.* Haamau ihora ratou i to ratou puhapa i mua ia Medeba.+ Haere maira te ati Amona i rapae i to ratou mau oire e haaputuputu aˈera no te tamaˈi.
8 I to Davida faarooraa i te reira, tono ihora oia ia Ioaba,+ ta ˈna mau aito puai roa ˈˈe e te nuu taatoa.+ 9 Haere maira te ati Amona i rapae e faanaho aˈera ia ratou no te aro i te tomoraa o te oire, a tia noa ˈi na arii o tei haere mai e tauturu ia ratou i te hoê vahi ateatea.
10 I to Ioaba iteraa e te haere mai ra te mau enemi e aro ia ˈna na mua mai e na muri mai, maiti ihora oia vetahi o te mau faehau itoito roa ˈˈe o Iseraela e faanaho atura ia ratou no te aro i to Suria.+ 11 Tuu atura oia i te toea o te mau faehau i raro aˈe i te aratairaa a* to ˈna taeae o Abisai+ ia faanaho oia ia ratou no te aro i te ati Amona. 12 Na ô atura oia ia ˈna: “Mai te peu mea puai roa to Suria+ no ˈu, e haere mai oe e tauturu ia ˈu. Mai te peu râ mea puai roa te ati Amona no oe, na ˈu ïa e haere atu e tauturu ia oe. 13 Ia puai e ia itoito+ tâua no to tâua nunaa e no te mau oire o to tâua Atua, e na Iehova e haapao i te toea.”
14 Haere aˈera Ioaba e ta ˈna mau faehau e aro i to Suria, e horo ê ihora to Suria.+ 15 I to te ati Amona iteraa e ua horo to Suria, horo atoa ˈtura ratou mai mua ˈtu ia Abisai te taeae o Ioaba e tapuni aˈera i roto i te oire. I muri aˈe i te reira, hoˈi maira Ioaba i Ierusalema.
16 I to Suria pauraa ia Iseraela, tono aˈera ratou i te vea no te titau i te tahi atu feia no Suria, no te tuhaa fenua o te Anavai.*+ Na Sophaka te raatira o te nuu a Hadadezera i aratai ia ratou.+
17 I te faaiteraahia taua ohipa ra ia Davida, haaputuputu oioi ihora oia i te nuu taatoa o Iseraela, haere atura oia i te tahi atu pae o Ioridana, tae atura oia i to Suria ra, e faanaho ihora oia i ta ˈna mau faehau no te aro ia ratou. Ua faanaho Davida i ta ˈna mau faehau no te aro ia ratou, e aro maira to Suria ia ˈna.+ 18 Tera râ, horo ê aˈera to Suria i mua ia Iseraela. Taparahi pohe ihora Davida i to Suria 7 000 taata faahoro pereoo e 40 000 faehau haere avae, e haapohe ihora oia ia Sophaka te raatira o ta ratou nuu. 19 I te iteraa te mau taata o Hadadezera e ua pau ratou i te ati Iseraela,+ faatupu oioi aˈera ratou i te hau e o Davida e auraro aˈera ratou ia ˈna.+ Aita roa to Suria i hinaaro faahou e tauturu i te ati Amona.