Te mau arii 2
O IEZEBELA I TE POHERAA, E NA TAMARII A AHABA I TE POHE-ATOA-RAA.
10 E hitu ahuru a Ahaba tamarii tamaroa i Samaria. Ua papai ihora Iehu i te leta, e ua hapono atura i Samaria i te mau tavana o Iezereela, e te feia tahito, e te feia i faaamu i te mau tamarii a Ahaba, na ô atura, 2 Tae atura teie nei parau ia outou, e tei ǒ outou te mau tamarii a to outou fatu, e pereoo hoi tei ǒ na, e te puaahorofenua, e te oire auahia, e te mauhaa tamaˈi: 3 e imi iho na outou i tei au maitai i taua na tamarii a to outou fatu ra, a tuu atu ai i nia i te terono o to ˈna metua, a aro ai i te tamaˈi i te utuafare o to outou fatu. 4 Ua rahi râ to ratou mǎtaˈu, e ua na ô aˈera, Toopiti hoi arii i te aroraa ia ˈna e aore aˈera i mau: a tae atu ai ia tatou nei? 5 E to nia iho i taua utuafare ra e to nia hoi i te oire, e te mau taata paari, e te feia i faaamu i te mau tamarii a Ahaba, ua tono aˈera i te vea ia Iehu, na ô maira, E tavini anaˈe hoi matou nei no oe ra, e ta oe e parau ia matou nei, na matou ïa e rave; e ore matou e faaarii noa atu i te taata: na oe râ e rave i ta oe e hinaaro ra. 6 Ua papai faahou atura oia, o te piti ïa o te leta, na ô atura, No ˈu outou na, e faaroo mai outou i ta ˈu nei parau, tâpû ê atu outou i te upoo o te mau tamarii a to outou fatu, a haere mai ai ia ˈu nei i Iezereela nei, ananahi mai teie nei. Tera hoi taua mau tamarii a te arii e hitu ahuru ra, tei te mau taata rarahi o te oire, tei faaamu ia ratou ra. 7 E tae atura taua leta ra ia ratou, ua rave ihora ratou i te mau tamarii a te arii ra, ua taparahi, e hitu ahuru, ua oomo aˈera i te mau upoo i roto i te farii, e ua hapono aˈera i Iezereela ia ˈna ra.
8 Ua haere maira te hoê vea, ua faaite maira ia ˈna, na ô maira, Teie te mau upoo o te mau tamarii a te arii ua hopoihia mai. Ua parau maira oia, E vaiiho atu i te tomoraa i roto i te oire nei, ia piti vairaa e ia ao. 9 E ao aˈera, ua haere ihora oia i rapae, ua tia noa ihora, e ua parau atura i te mau taata atoa, E parau tia ta outou: inaha, ua opua hoi au i to ˈu ra fatu, e taparahi atura ia ˈna: na vai râ teie feia i rave? 10 ia ite maira outou, e ore roa te hoê vahi i te parau a Iehova i parau i te utuafare o Ahaba e toe i te tupu; e rave hoi Iehova i ta ˈna i parau mai i te vaha o to ˈna tavini o Elia ra. 11 Ua taparahi ihora Iehu i tei toe i te utuafare o Ahaba, i Iezereela, e te feia rarahi atoa ra, e te mau hoa here no ˈna ra, e te mau tahuˈa na ˈna, aore roa te hoê i vaiihohia.
12 Ua tia aˈera oia i nia, haere atura i Samaria; ia tae râ i te fare paotiraa i te eˈatia ra, 13 ua farerei aˈera Iehu i te mau taeae o te arii o Iuda o Ahazia, ua na ô atura, O vai outou na? Ua parau maira ratou, E mau taeae matou no Ahazia; e te haere nei matou e aroha i te mau tamarii a te arii, e te mau tamarii a te arii vahine o Iseraela. 14 Ua parau atura oia, E haru ora noa ia ratou; ua haru ora noa ihora e ua taparahi i te apoo o te fare paotiraa, e maha ahuru ma piti; aore roa te hoê i vaiihohia.
15 E reva ˈtura oia, ite aˈera ia Iehonadaba a Rekaba te haere maira e farerei ia ˈna: ua aroha ˈtura oia ia ˈna, e ua na ô atura, Te au ra anei to oe ra aau i to ˈu mai to ˈu nei aau e au i to oe ra? Ua parau maira Iehonadaba, Oia ïa. Oia mau ra, ho mai na i to rima. Ua horoa maira hoi oia i te rima; ua tuu maira oia ia ˈna i nia i te pereoo. 16 Ua parau atura oia, A haere mai na ia ite oe i to ˈu nei itoito ia Iehova. Ua faanaho ihora oia ia ˈna i nia i te pereoo. 17 E tae atura oia i Samaria, pau ihora ta Ahaba i toe i Samaria, e mou roa aˈera oia, i te parau hoi a Iehova i parau mai ia Elia ra.
18 Ua haaputu ihora Iehu i te taata atoa, e ua parau atura, Ua haapao hoi Ahaba ia Baala, e rahi aturâ to Iehu haapao. 19 E tena na, e tii i te mau peropheta a Baala, e te mau tavini, e te mau tahuˈa na ˈna; eiaha roa ia toe; e tusia rahi hoi ta ˈu te vai nei na Baala; e o tei toe ra, e ore ïa e ora. E haavare râ ta Iehu, ia pau roa te feia haamori ia Baala ia ˈna. 20 Ua na ô aˈera Iehu, A faaite na ei apooraa moˈa ta Baala. Ua faaite aˈera hoi ratou. 21 Ua tono aˈera Iehu e ati noa ˈˈe Iseraela atoa; e ua hope roa maira te feia i haamori ia Baala, aore roa e taata toe i te tae mai, Ua haere maira hoi ratou i roto i te fare o Baala; î roa aˈera te fare o Baala mai te tahi pae, e tae noa ˈtura i te tahi pae. 22 Ua parau atura oia i te tiai i te piha ahu, A rave mai i te ahu no te feia e haamori ia Baala. Ua hopoi maira oia i te ahu no ratou. 23 Ua haere ihora Iehu, e o Iehonadaba a Rekaba i roto i te fare o Baala, e ua parau atura i te feia haamori ia Baala, A imi maitai ia itea-maitai-hia e, aita o ǒ nei taata no Iehova, maori râ o te feia haamori ia Baala anaˈe ra. 24 E ia haere ratou i roto e hopoi i te tusia, e te tusia taauahi, ua haapaohia e Iehu na taata e maha taau i rapae, e ua na ô atura, O te taata e tuu noa i teie nei pue taata, ta ˈu e hopoi mai i roto i to outou rima, oia iho ïa te hoo o taua taata ra. 25 E oti aˈera taua tusia taauahi ra i te hopoihia, ua parau atura Iehu i te faehau e te mau raatira, A haere i roto a taparahi ia ratou; eiaha roa te hoê ia ora mai. Ua tâpû hoi ratou ia ratou i te ˈoˈe, e ua huri mai te mau faehau e te mau raatira i rapae au. Ua tomo atura ratou i roto i te oire o te fare o Baala; 26 e ua hopoi maira i te mau tii no roto i te fare o Baala, e ua tutui i te auahi. 27 E oti aˈera te mau tii a Baala i te haapararihia, ua vavahi ihora ratou i taua fare o Baala ra e faarirohia ˈtura ei tiria pera, e tae roa aˈenei i teie nei mahana. 28 Pau roa aˈera Baala i Iseraela ia Iehu.
29 I te hara râ a Ieroboama a Nebata ra, i hara ˈi Iseraela, i te faatiaraa i te mau kafa auro i Betela e i Dana, aore ïa te reira i faaruehia e Iehu ra. 30 Ua parau maira Iehova ia Iehu, No te mea, e parau maitai ta oe i te raveraa i te mea tia i mua ia ˈu nei, e ua rave oe i te utuafare o Ahaba i tei au i tau aau nei, e tae roa i te maha o te ui ra te parahiraa o to oe ra tamarii i nia i te terono i Iseraela nei. 31 Aita aˈera râ Iehu i faaitoito ia haapao-hua-hia e to ˈna aau te ture a te Atua o Iseraela a Iehova; aore hoi oia i faarue i te mau hara a Ieroboama i hara ˈi Iseraela ra.
32 Tei taua anotau ra ta Iehova faarueraa ia Iseraela: ua pau hoi ratou ia Hazaela i te mau vahi atoa i Iseraela ra; 33 mai Ioridana mai i te hitia o te râ ra; e te fenua atoa ra o Gileada; o te ati Gada, e te ati Reubena, e te ati Manase, mai Aroera, i te hiti o te pape ra o Aranona; o Gileada atoa, e Basana atoa.
34 E te toea o te mau parau ia Iehu, e te mau mea ta ˈna i rave ra, e to ˈna ra puai, e ere anei ua papaihia i roto i te buka, te parau no te mau mahana o te mau arii o Iseraela? 35 Taoto ihora Iehu i ǒ tana mau metua atoa, e tanuhia ihora oia i Samaria. Monohia aˈera oia i te hau i te tamaiti ra ia Iehoahaza. 36 E to Iehu ra ariiraa i nia ia Iseraela i Samaria, hoê taau ïa matahiti e ma vau.