Te mau arii 2
O IOASA I TE ORARAA I TE TAPARAHI A ATALIA RA.
11 Ite aˈera Atalia te metua vahine o Ahazia ra e ua pohe ta ˈna tamaiti, ua tia aˈera oia ua rave i te huaai o te hui arii ra ia pohe. 2 Area o Iehoseba, te tamahine a te arii ra a Iorama, e tuahine hoi no Ahazia ra, ua rave aˈera ia Ioasa a Ahazia i tei eiâhia e ana no roto i te mau tamarii a te arii i taparahihia ra, ua oomo aˈera ia ˈna e te metua faaamu atoa i roto i te hoê piha roi no te hiero: huna ihora ia ˈna ia ore Atalia ia ite, aore aˈera hoi oia i taparahihia. 3 Moe ihora oia e te metua faaamu atoa i roto i te fare o Iehova e a ono aˈera matahiti. Mahere aˈera te hau ia Atalia i taua fenua ra.
4 Ia tae ra i te hitu o te matahiti, ua tono aˈera Iehoiada i te vea e tii i te mau tavana o te mau hanere, e te mau raatira e te feia faehau, e ua aratai mai ratou ia ˈna i te fare o Iehova, e ua faaau i te parau ia ratou, e ua tuu i te tǎpǔ i nia ia ratou i te fare o Iehova. Ua faaite aˈera oia ia ratou i te tamaiti a te arii; 5 ua parau atura oia ia ratou, na ô atura, Teie ta outou e rave; ia toru o outou tufaa, o te toru ra o te tufaa ra o te feia e tomo mai i roto i te sabati, ei tiai ïa i te fare o te arii ra; 6 e te tahi tufaa ra, ei te uputa ïa ei Sura; e te tahi tufaa ra, ei te opani ïa i muri mai i te feia faehau. E na reira outou i te tiai i te fare, ia ore ia vahia mai. 7 E ia piti hoi tufaa to te feia e haere i rapae i te sabati, na ratou e tiai i te arii, i te fare o Iehova. 8 E na outou e haaati i te arii, te taata atoa ma te mauhaa i te rima; e o tei tomo mai i roto i taua anai tiai ra, ia pohe atu ïa: ei pihaiiho outou i te arii ia tomo i rapae, e ia haere mai i roto ra. 9 Ua na reira te mau raatira o te mau hanere, i ta Iehoiada tahuˈa i parau maira: ua maiti ihora ratou i to ratou ihora, o tei tomo mai i te sabati, e o tei haere i rapae i te sabati, e ua haere maira ratou ia Iehoiada tahuˈa ra. 10 Ua hopoi atura taua tahuˈa ra i te mau maehae e te mau paruru a te arii ra a Davida, i te mau raatira o te mau hanere ra, i roto i te hiero o Iehova. 11 Ua tia noa ihora taua feia faehau ra te taata ma ta ˈna mauhaa atoa i te rima i te haaatiraa i te arii mai te tahi poro hiero i te pae atau ra, e tae noa ˈtura i te poro hiero i te pae aui, na te pae fata ra, e te fare ra. 12 Ua aratai maira oia i te tamaiti o te arii ra, e ua tuu i te korona i nia ia ˈna, e ua tuu atoa ˈtu i te ture: ua faaarii aˈera ratou ia ˈna, e ua faatahinu ia ˈna; e ua papai ihora ratou i te rima, e ua na ô aˈera, Ia ora te arii.
13 E ite aˈera Atalia i te muhu o te taata e te mau faehau, ua haere maira oia i taua mau taata ra, i roto i te hiero o Iehova. 14 Ua hiˈo ihora oia, e inaha, te tia noa maira te arii i pihaiiho i te pou ra, o te peu noa iho â ïa, e i pihaiiho i te arii ra, o te feia mana ïa e te feia faaoto i te pu ra; oaoa roa aˈera te taata atoa o te fenua ra, e ua faaoto i te mau pu: ua hahae ihora Atalia i to ˈna ahu, e ua pii atura, E orure hau, orure hau. 15 Ua faaue aˈera râ Iehoiada tahuˈa i te mau raatira hanere, te feia toroa i taua nuu ra, na ô atura, Aratai atu i rapae au i te nanai pou ra; e te taata e pee ia ˈna ra e tâpû i te ˈoˈe. Ua parau na hoi taua tahuˈa ra, Eiaha oia e taparahihia i roto i te fare o Iehova. 16 Ua rave ihora ratou ia ˈna, e tae atura oia i te eˈa tomoraa no te mau puaahorofenua i te fare o te arii ra, taparahihia ihora i reira.
17 Ua faaau ihora Iehoiada i te faufaa i te arii raua o Iehova, e te mau taata atoa, ei taata ratou no Iehova; e te tahi faufaa hoi i te mau taata, e te arii. 18 Ua tomo atura te taata atoa no te fenua i roto i te fare o Baala, e ua vavahi ihora; i te mau fata, e te mau tii ua haaparari-hua-hia ïa e ratou, ua taparahi ihora ia Matana, te tahuˈa a Baala ra, i mua i te mau fata ra. Ua faataa ihora te tahuˈa ra o Iehoiada i te feia toroa i nia i te fare o Iehova. 19 Ua rave aˈera oia i na tavana no te mau hanere, e te mau raatira, e te mau faehau, e te taata atoa o te fenua ra; e ua aratai maira i te arii mai te fare mai te fare o Iehova maira, e ua na te uputa faehauhia ra i te haere i roto i te fare o te arii, ua parahi ihora oia i nia i te terono o te arii. 20 Oaoa aˈera te taata atoa o te fenua ra; e aore roa i aueue taua oire ra, taparahi noa ratou ia Atalia i te ˈoˈe, i pihaiiho i te fare o te arii ra. 21 Tei te hitu o to Iehoasa matahiti i arii ai oia.