Te mau arii 1

TONOHIA ELIA IA AHABA, E TE TOHU O ELIA IA ˈNA RA.

18 E rave rahi aˈera te mahana i mairi, ua tae i te toru o te matahiti, i tae mai ai te parau a Iehova ia Elia ra, na ô maira, A haere, e faaite ia Ahaba; e na ˈu e hopoi atu i to ûa i nia i te fenua nei; 2 ua haere ihora Elia e faaite ia Ahaba. Te rahi ra te oˈe i Samaria. 3 Ua parau atura Ahaba ia Obadia, o te tiaau ïa o to ˈna utuafare, (Te rahi ra to Obadia ra mǎtaˈu ia Iehova: 4 a taparahi ai hoi Iezebela i te mau peropheta a Iehova ra, ua rave aˈera Obadia i te hoê hanere peropheta, ua faatapuni, taipae ahuru i roto i te ana hoê, e ua faaamu i te pane e te pape.) 5 Ua parau maira Ahaba ia Obadia. Haere mai, mai haere tâua na nia i te fenua atoa nei, e te mau pape pihaa ra, e te ana rii pape: peneiaˈe o te itea ˈtu te aihere rii ia ora te mau puaahorofenua, e te mau pheradi, o te hope roa hoi te mau taoˈa i te pohe. 6 Ua ooti ihora raua i te fenua, a haere ai na nia iho; reva ˈtura Ahaba na to ˈna eˈa oia anaˈe ra; reva ˈtura Obadia na to ˈna eˈa oia anaˈe ra.

7 Te haere noa ra Obadia, e inaha farerei aˈera Elia ia ˈna; e ua ite aˈera oia ia ˈna, ua tipapa ihora oia i raro te mata, ua na ô aˈera, O tau fatu ra anei oe o Elia? 8 Ua parau maira oia ia ˈna, O vau: a haere, e parau atu i to fatu, Inaha, tera ˈˈe Elia. 9 Ua parau atura Obadia, Eaha ra ta ˈu nei hara, i tuu ai oe ia ˈu i roto i te rima o Ahaba ia pohe au? 10 Te ora ra to Atua o Iehova, aita roa e fenua, aita e basileia i toe aore tau fatu i tono i te vea i te imi ia oe i reira: e ia parau mai ratou e, Aore oia i ǒ nei, ua faatǎpǔ atu oia i taua fenua ra e taua Basileia ra, e aita oe i itea. 11 E tena na, te parau maira oe, E haere, e faaite i tau fatu, Inaha, teie Elia. 12 Tei te revaraa vau ra, e riro paha te Varua o Iehova i te hopoi ê ia oe e eita e itea ˈtu e au; e ia haere au e ia faaite ia Ahaba, e aore oia e ite ia oe, e riro vau i te pohe ia ˈna. E teie nei, i mǎtaˈu noa na to tavini ra o vau ia Iehova mai to ˈu itiraa mai â. 13 Aita oe i faaitehia mai, e tau fatu, ta ˈu nei ravea, a taparahi ai Iezebela i te mau peropheta a Iehova, e ua faatapuni au i te hoê hanere o taua mau peropheta a Iehova ra taipae ahuru i roto i te ana hoê, e ua faaamu vau ia ratou i te pane e te pape? 14 E tena na, te parau mai na oe, E haere, e faaite i tau fatu, inaha, tera ˈˈe Elia: e riro hoi au i te pohe ia ˈna. 15 Ua na ô maira Elia: te ora ra te Atua sabaota o Iehova, ta ˈu e tia noa i mua tana aro, e faaite hua ˈtu vau ia ˈu iho ia ˈna i teie nei mahana.

16 Haere atura Obadia e farerei ia Ahaba, e ua faaite oia ia ˈna; e ua haere maira Ahaba e farerei ia Elia.

17 E ia hiˈo mai Ahaba ia Elia, ua na ô maira oia ia ˈna, O oe anei tei haapeapea ia Iseraela nei? 18 Ua parau atura oia, E ere au tei haapeapea ia Iseraela; o oe râ, e te utuafare o to metua, o outou i faarue i te parau a Iehova, e ua pee i te mau atua ěê. 19 E tena na, e tono i te vea, e tii ia Iseraela atoa e haere mai ia ˈu nei, i te mouˈa nei ia Karemela, e te mau peropheta o Baala e maha atoa hanere e pae ahuru, e na peropheta o te vahi uru raau, e maha hanere, o tei amu i te maa i te amuraa a Iezebela ra. 20 Ua tono aˈera Ahaba i te vea ia Iseraela atoa, e ua haaputu mai i te mau peropheta i te mouˈa ra o Karemela. 21 Ua haere maira Elia i te mau taata atoa ra, ua na ô maira, Mai te aha te maoro o tena na feaa-piti-raa? o Iehova te Atua ra, a pee ia ˈna; o Baala, a pee ia ˈna. Aita aˈera te mau taata atoa ra i parau noa mai. 22 Ua parau maira Elia i te mau taata atoa, O vau anaˈe nei tei toe i te mau peropheta a Iehova; area te mau peropheta a Baala, e maha ïa hanere e pae ahuru. 23 Ho mai na i e piti puaatoro oni na matou; a rave ai ratou i te hoê puaatoro oni na ratou iho, a tapǔpǔ ai, a tuu ai i nia i te vahie, eiaha râ ei auahi e tuuhia i raro aˈe: e na ˈu e rave i te tahi puaatoro oni, a tuu ai i nia i te vahie, e eiaha ei auahi i raro aˈe: 24 a tau ai outou i te iˈoa o to outou mau atua, a tau hoi au i te iˈoa o Iehova, e te Atua i parau mai i te hopoiraa mai i te auahi, oia te Atua. Ua parau maira te mau taata atoa, na ô maira, E parau maitai taua parau na. 25 Ua parau maira Elia i taua mau peropheta o Baala ra, A rave na outou i te hoê puaatoro oni na outou, e mata na i te rave i te reira; e feia rahi hoi outou; a tau ai outou i te iˈoa o to outou mau atua, eiaha râ ei auahi e tuuhia i raro aˈe. 26 Ua rave ihora ratou i taua puaatoro oni na ratou ra, ua otioti ihora; ua tau ihora i te iˈoa o Baala mai te poipoi mai e avatea ˈtura, i te pii-noa-raa e, E Baala, e faaroo mai ia matou. Aita roa râ e reo; aita e parau. Ua oˈua haere ratou i nia i taua fata i hamanihia e ratou ra. 27 E avatea aˈera, ua tâhitohito maira Elia, na ô maira, E pii hua ˈtu: e atua oia, te imi ra paha i te manaˈo; e aore ra, te ohipa ra, e aore ra, tei te eˈa; e ua taoto aˈenei, e rave ïa e faaara hua e tia ˈi. 28 Ua pii hua ˈtura ratou, e ua otioti ihora ia ratou iho, ta ratou ïa peu, i te tipi e te mahae, e ua ohî noa maira te toto i nia ia ratou. 29 E tapetape aˈera te mahana, ua tamau atura ratou i ta ratou peu e tae noa ˈtura i te hopoiraa i te tusia ahiahi ra; e aita e reo, aita e parau, aore ratou i haapaohia mai.

30 Ua parau maira Elia ia ratou atoa, A haere mai na i ǒ nei ia ˈu nei. Ua haere maira ratou i pihaiiho ia ˈna. Ua rave ihora oia i te fata a Iehova i parari ra. 31 Ua rave ihora Elia i na ofai hoê ahuru ma piti, faito aˈera i na opu i te mau tamarii o Iakoba, ta Iehova i parau maira e, O Iseraela to oe iˈoa: 32 ua faatia aˈera oia i te hoê fata i te iˈoa o Iehova i taua mau ofai ra; ua haapoopoo aˈera oia e ati noa ˈˈe taua fata ra, e ô na farii huero e piti sea. 33 Ua fata ihora oia i te vahie, ua otioti ihora i taua puaatoro oni ra, ua tuu aˈera i nia iho i taua vahie ra, e ua na ô aˈera, A faaî na i na farii pape e maha; a ninii i nia iho i te tusia taauahi, e i nia iho i te vahie ra. 34 E ua na ô maira oia, A na reira faahou ia piti, Ua na reira faahou ratou ia piti. Ua parau maira oia, A na reira faahou ia toru, Ua na reira hoi ratou ia toru. 35 Ua tahe haere noa ihora taua pape ra e ati noa ˈˈe taua fata ra: î roa ˈˈera taua vahi i haapoopoohia ra i te pape. 36 Ua tae aˈera i te hopoiraa i te tusia ahiahi ra, ua haafatata maira taua peropheta ra o Elia, ua na ô aˈera, E te Atua no Aberahama, e no Isaaka, e no Iseraela, e Iehova, e faaite mai oe i teie nei mahana, o oe te Atua i Iseraela nei, e o vau to oe tavini, e no te mea, ua faauehia mai au e oe ra i rave ai au i taua mau mea atoa nei. 37 E faaroo mai oe, e Iehova, e faaroo mai, ia ite teie nei feia e, o oe te Atua o Iehova, e faafariu hoi oe i to ratou aau. 38 Ua mairi maira te auahi a Iehova, pau ihora te tusia taauahi, e te raau, e te ofai, e te repo, e mai te mea mitihia ra taua pape i roto i te vahi poopoo ra. 39 E ite aˈera te mau taata atoa ra i te reira, ua tipapa ihora i raro te mata; ua na ô aˈera, O Iehova, oia te Atua; o Iehova, oia te Atua. 40 Ua parau maira Elia ia ratou, A rave na i te mau peropheta a Baala, eiaha roa te hoê ia ora. Ua rave ihora ratou; ua aratai maira Elia ia ratou i te pape ra o Kisona, e ua taparahi ihora ia ratou i reira.

41 Ua parau maira Elia ia Ahaba, A haere, a amu i te maa e inu hoi i te pape; e ûa rahi teie e haruru mai nei. 42 Haere atura Ahaba e amu i te maa, e inu hoi i te pape; haere atura Elia i nia i te mouˈa ra o Karemela; ua tipapa ihora oia i raro i te repo, ua tuu ihora i te mata i ropu i na turi; 43 ua parau maira i te tavini, A haere i nia e hiˈo tia i tai. Ua haere ihora oia i nia, e ua hiˈo, e ua parau atura, Aita hoê aˈe. Ua parau maira oia, A haere e ia hitu noa ˈtu te haereraa. 44 E tae aˈera i te hitu o te haerea ua parau atura, Inaha, e ata iti te tupu maira na tai maira, mai te rima taata nei â te huru. Ua parau maira oia, A haere i nia, e parau atu ia Ahaba, A faaineine i te pereoo na oe, e haere i raro, a roohia oe i te ûa. 45 E aore aˈera i mahia, ua ereere ihora te raˈi i te ata e te mataˈi, o te ûa ihora hoi e mea rahi. Ua horo ihora Ahaba na nia iho i to ˈna pereoo e tae atura i Iezereela. 46 Tei nia maira te rima o Iehova ia Elia; ua tatua ihora i tana tauupu, ua horo ihora na mua ia Ahaba e tae noa ˈtura i te tomoraa i roto ia Iezereela.